കോവിഡ് വിവരങ്ങൾ വാട്സാപ്പിലെത്തിച്ച് ഖത്തർ

60060601 എന്ന നമ്പര്‍ ഫോണില്‍ സേവ് ചെയ്താല്‍ കോവിഡ് വിവരങ്ങള്‍ കൃത്യമായി എല്ലാ പ്രവാസികൾക്കും പൗരന്മാർക്കും വാട്‌സാപ്പിൽ ലഭിക്കും.

കോവിഡ് വിവരങ്ങൾ വാട്സാപ്പിലെത്തിച്ച് ഖത്തർ

 

ഖത്തറിലാണോ? ആണെങ്കിൽ കൊറോണ വെെറസ് വ്യാപനത്തെക്കുറിച്ചുള്ള നിങ്ങളുടെ എല്ലാ സംശയങ്ങൾക്കും ഗവൺമെൻ്റ് ഉത്തരം നൽകും. ലോകത്തെയാകെ ആശങ്കയുടെ മുൾമുനയിൽ നിർത്തിക്കൊണ്ട് വെെറസ് വ്യാപിച്ചതോടെ കോവിഡ്-19 നുമായി ബന്ധപ്പെട്ട വിവരങ്ങൾ ജനങ്ങളെ അറിയിക്കാനായി ഖത്തര്‍ ഗവണ്‍മെന്റ് കമ്യൂണിക്കേഷന്‍ ഓഫിസ് (ജിസിഒ) പുതിയ വാട്‌സാപ്പ് സർവീസ് ആരംഭിച്ചു.

60060601 എന്ന നമ്പര്‍ ഫോണില്‍ സേവ് ചെയ്താല്‍ കോവിഡ് വിവരങ്ങള്‍ കൃത്യമായി എല്ലാ പ്രവാസികൾക്കും പൗരന്മാർക്കും വാട്‌സാപ്പിൽ ലഭിക്കും. മലയാളം, അറബിക്, ഇംഗ്ലീഷ്, ഉറുദു, ഹിന്ദി, നേപ്പാളി എന്നിങ്ങനെ ആറ് ഭാഷകളിലായാണ് വിവരങ്ങൾ തികച്ചും സൌജന്യമായി ലഭിക്കുക. https://wa.me/97460060601text=Hi എന്ന ലിങ്ക് വഴിയും ചാറ്റ് ആരംഭിക്കാം.

നമ്പർ സേവ് ചെയ്ത് ചാറ്റ് ആരംഭിക്കുമ്പോൾത്തന്നെ ഭാഷ തിരഞ്ഞെടുക്കാനുള്ള മെനു ലഭിക്കും. മലയാളം തിരഞ്ഞെടുക്കുന്നതിന് 6 എന്ന നമ്പര്‍ ആണ് ടൈപ്പ് ചെയ്യേണ്ടത്. തുടര്‍ന്ന് ലഭിക്കുന്ന മെനുവില്‍ നിന്ന് നമ്പര്‍ തിരഞ്ഞെടുത്താല്‍ നിങ്ങള്‍ക്ക് ആവശ്യമായ എല്ലാ വിവരങ്ങളും മലയാളത്തില്‍ കിട്ടും.

ഇതിന്പുറമെ ജനങ്ങളുടെ കോവിഡ് 19 സംബന്ധമായ ചോദ്യങ്ങള്‍ക്കും പൊതുജനാരോഗ്യ മന്ത്രാലയവും ജിസിഒ അധികൃതരും മറുപടി നല്‍കും. 24 മണിക്കൂറും ഈ സേവനം ലഭിക്കും. കോവിഡ് പ്രതിരോധം, രോഗലക്ഷണങ്ങള്‍, പുതിയ കോവിഡ് ബാധിതരുടെ എണ്ണം, സാമൂഹിക അകലം സൂക്ഷിക്കേണ്ടതിൻ്റെ ആവശ്യം തുടങ്ങി നിര്‍ദേശങ്ങളെക്കുറിച്ചും വിവരങ്ങള്‍ ലഭിക്കും.

നാലു പേരാണ് ഇതുവരെയായി കൊറോണ വൈറസ് ബാധിച്ച് ഖത്തറില്‍ മരിച്ചത്. 88 വയസ്സുള്ള ഖത്തരിയാണ് ഇന്നലെ മരിച്ചത്. ഇന്ന് 228 പേര്‍ക്കു കൂടി പുതുതായി കൊറോണ സ്ഥിരീകരിച്ചു. എട്ട് പേര്‍ക്ക് രോഗം ഭേദമായതായും ഖത്തര്‍ ആരോഗ്യ മന്ത്രാലയം അറിയിച്ചു. പ്രവാസികളും പുതുതായി രോഗം സ്ഥിരീകരിച്ചവരില്‍ ഉള്‍പ്പെടുന്നു. രോഗം സ്ഥിരീകരിച്ചവര്‍ ക്വാറന്റൈനിലാണ്.