യാത്രാസമയം 33 മിനിറ്റിൽ നിന്ന് 15 മിനിറ്റായി കുറയും.പുതിയ പദ്ധതിയിൽ ഉൾപ്പെടുക ഉം അൽ ഷീഫ് സ്ട്രീറ്റ് മുതൽ എമറേറ്റ്സ് റോഡ് വരെ
ദുബായ് (12 ജൂലൈ 2026): ദുബായിലെ റോഡ് അടിസ്ഥാന സൗകര്യങ്ങൾ കൂടുതൽ ശക്തമാക്കുന്നതിൻ്റെ ഭാഗമായി 200 കോടി ദിർഹം (2 Billion AED) ചെലവ് വരുന്ന ‘ലത്തീഫ ബിൻത് ഹംദാൻ കോറിഡോർ’ വികസന പദ്ധതിക്ക് ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി (RTA) കരാർ നൽകി. ദുബായുടെ സാമ്പത്തിക-നഗര വളർച്ചയ്ക്ക് വേഗത കൂട്ടാനും ഗതാഗതക്കുരുക്ക് വലിയ തോതിൽ കുറയ്ക്കാനും ലക്ഷ്യമിട്ടാണ് ഈ ബൃഹദ് പദ്ധതി നടപ്പിലാക്കുന്നത്. 2028 അവസാനത്തോടെ പദ്ധതി പൂർത്തിയാകുമെന്ന് അധികൃതർ അറിയിച്ചു.
12 കിലോമീറ്റർ നീളത്തിൽ നിർമ്മിക്കുന്ന ഈ പുതിയ തന്ത്രപ്രധാന പാത ദുബായിലെ പ്രധാന റോഡുകളെ തമ്മിൽ ബന്ധിപ്പിക്കും. ഷെയ്ഖ് സായിദ് റോഡ്, അൽ ഖൈൽ റോഡ്, അൽ മെയ്ദാൻ സ്ട്രീറ്റ്, ഷെയ്ഖ് മുഹമ്മദ് ബിൻ സായിദ് റോഡ്, ഷെയ്ഖ് സായിദ് ബിൻ ഹംദാൻ അൽ നഹ്യാൻ സ്ട്രീറ്റ് എന്നിവയെ എമിറേറ്റ്സ് റോഡുമായി ബന്ധിപ്പിക്കുന്നതാണ് ഈ കോറിഡോർ.
പ്രധാന സവിശേഷതകൾ:
- പാലങ്ങളും തുരങ്കങ്ങളും: 2,300 മീറ്റർ നീളമുള്ള 7 വലിയ പാലങ്ങളും, 900 മീറ്റർ നീളമുള്ള 8 തുരങ്കങ്ങളും (Tunnels) പദ്ധതിയുടെ ഭാഗമായി നിർമ്മിക്കും.
- യാത്രാസമയത്തിൽ വൻ കുറവ്: ഉം അൽ ഷീഫ് സ്ട്രീറ്റിൽ നിന്ന് എമിറേറ്റ്സ് റോഡിലേക്കുള്ള യാത്രാസമയം നിലവിലെ 33 മിനിറ്റിൽ നിന്ന് 15 മിനിറ്റായി കുറയും (54% സമയലാഭം).
- വാഹന ശേഷി: ഇരുവശങ്ങളിലേക്കുമായി മണിക്കൂറിൽ 16,000 വാഹനങ്ങളെ ഉൾക്കൊള്ളാൻ ഈ പാതയ്ക്ക് ശേഷിയുണ്ടാകും. പ്രതിദിനം 1,30,000-ലധികം യാത്രകൾക്ക് ഇത് സഹായകരമാകും.
- സൈക്ലിംഗ് ട്രാക്ക്: സുസ്ഥിര ഗതാഗത സംവിധാനം പ്രോത്സാഹിപ്പിക്കുന്നതിനായി അൽ ഖുദ്ര മുതൽ ജുമൈറ വരെയുള്ള ട്രാക്കുകളെ ബന്ധിപ്പിച്ച് 12.5 കിലോമീറ്റർ നീളത്തിൽ സൈക്ലിംഗ് ട്രാക്കും നിർമ്മിക്കും.
ദുബായ് ഇക്കണോമിക് അജണ്ട (D33), ദുബായ് 2040 അർബൻ മാസ്റ്റർ പ്ലാൻ എന്നിവയുടെ ലക്ഷ്യങ്ങൾ കൈവരിക്കുന്നതിന് ഈ പദ്ധതി വലിയ പിന്തുണ നൽകുമെന്ന് ആർടിഎ ഡയറക്ടർ ജനറലും ബോർഡ് ഓഫ് എക്സിക്യൂട്ടീവ് ഡയറക്ടേഴ്സ് ചെയർമാനുമായ ഹിസ് എക്സലൻസി മത്തർ അൽ തായർ വ്യക്തമാക്കി. നഗരത്തിൻ്റെ കിഴക്ക്-പടിഞ്ഞാറ് ഭാഗങ്ങൾ തമ്മിലുള്ള റോഡ് ശേഷി 12% വർദ്ധിപ്പിക്കാൻ ഈ പദ്ധതിക്ക് സാധിക്കുമെന്നും അദ്ദേഹം കൂട്ടിച്ചേർത്തു.
നാദ് അൽ ഷെബ, അൽ ബരാരി, ദുബായ് ഹിൽസ്, ദുബായ് ഡിസ്ട്രിക്റ്റ് വൺ, ഗ്ലോബൽ വില്ലേജ് തുടങ്ങി നിലവിലുള്ളതും വരാനിരിക്കുന്നതുമായ പ്രധാന പാർപ്പിട-വാണിജ്യ മേഖലകളിലെ 6,50,000-ത്തിലധികം താമസക്കാർക്കും സന്ദർശകർക്കും ഈ പുതിയ കോറിഡോർ ഏറെ പ്രയോജനപ്പെടും. ലത്തീഫ ബിൻത് ഹംദാൻ സ്ട്രീറ്റ് ഇരുവശങ്ങളിലേക്കുമായി നാല് വരിപ്പാതയായി (4 lanes) വികസിപ്പിക്കുന്നതും ഈ പദ്ധതിയുടെ ഭാഗമാണ്.
