ദുബായിലെ ലാഭേച്ഛയില്ലാത്ത പ്രവർത്തിക്കുന്ന സംഘടനകളെ ആദരിക്കുന്ന ‘ഇത്റ’ അവാർഡിന്റെ മൂന്നാം ഘട്ടം ആരംഭിച്ചു

ദുബായ്: സന്നദ്ധ സംഘടനകളുടെ സ്ഥാപന മികവും സാമൂഹിക ഇടപെടലുകളും കൂടുതൽ ശക്തിപ്പെടുത്തുക എന്ന ലക്ഷ്യത്തോടെ ദുബായ് കമ്മ്യൂണിറ്റി ഡെവലപ്‌മെന്റ് അതോറിറ്റി (സി.ഡി.എ) ‘ഇത്റ’ (Ethraa/Ithraa) അവാർഡിന്റെ മൂന്നാം ഘട്ടം ആരംഭിച്ചു.ദുബായ് സോഷ്യൽ അജണ്ട 33-ന്റെ ലക്ഷ്യങ്ങൾക്കനുസൃതമായി മൂന്നാം മേഖല (Third Sector) ശക്തിപ്പെടുത്തുന്നതിനുള്ള സുപ്രധാന പദ്ധതിയായാണ് ഈ സംരംഭം നടപ്പാക്കുന്നത്.

സി.ഡി.എ ഡയറക്ടർ ജനറൽ ഹെസ്സ ബിൻത് ഈസ ബുഹുമൈദ് മൂന്നാം ഘട്ടത്തിന്റെ പ്രഖ്യാപനം നിർവഹിച്ചത് . ദുബായിലെ സമൂഹ വികസനത്തിന് സന്നദ്ധ സംഘടനകൾ കൂടുതൽ സുസ്ഥിരവും ഫലപ്രദവുമായ പങ്കാളികളായി മാറാൻ സഹായിക്കുകയാണ് പദ്ധതിയുടെ ലക്ഷ്യമെന്ന് അവർ പറഞ്ഞു. മനുഷ്യശാക്തീകരണത്തിനും സാമൂഹിക ഐക്യത്തിനും പ്രാധാന്യം നൽകുന്ന ദുബായ് ഭരണനേതൃത്വത്തിന്റെ കാഴ്ചപ്പാടിന്റെ പ്രതിഫലനമാണ് ‘ഇത്റ’ പദ്ധതിയെന്നും അവർ വ്യക്തമാക്കി.

ദുബായ് ഗവൺമെന്റിന്റെ കമ്മ്യൂണിറ്റി ഡെവലപ്‌മെന്റ് അതോറിറ്റിയിൽ രജിസ്റ്റർ ചെയ്ത ലാഭേച്ഛയില്ലാത്ത (Non-Profit) സംഘടനകളെയാണ് ‘ഇത്റ’ പദ്ധതിയുടെ ഭാഗമായി വിലയിരുത്തി ആദരിക്കുന്നത്. സി.ഡി.എയുടെ മേൽനോട്ടത്തിലുള്ള 146 സംഘടനകളും ഈ സ്ഥാപന വികസന പദ്ധതിയിൽ പങ്കാളികളായിട്ടുണ്ട്.

സ്ഥാപനങ്ങളുടെ ഭരണസംവിധാനം, സാമ്പത്തിക കാര്യക്ഷമത, സാങ്കേതിക ശേഷി എന്നിവ കർശനമായ ഗവർണൻസ് മാനദണ്ഡങ്ങളുടെ അടിസ്ഥാനത്തിലാണ് വിലയിരുത്തുക. സ്ഥാപന ശാക്തീകരണവും സദ്ഭരണവും, മാനവ-സാമൂഹിക മൂലധനത്തിന്റെ സുസ്ഥിരത, പ്രകടന മികവ് എന്നീ മൂന്ന് പ്രധാന മാനദണ്ഡങ്ങളിലൂടെയാണ് മൂല്യനിർണയം നടക്കുക.

വിലയിരുത്തലിന് ശേഷം മികച്ച പ്രകടനം കാഴ്ചവയ്ക്കുന്ന സംഘടനകൾക്ക് സ്വർണം, വെള്ളി, വെങ്കലം എന്നീ മൂന്ന് വിഭാഗങ്ങളിലായി ‘ഇത്റ എക്സലൻസ് അവാർഡ്’ സമ്മാനിക്കും.
മുൻ പതിപ്പുകളിൽ വിജയികളായ സ്ഥാപനങ്ങളുടെ എണ്ണം 25ൽ നിന്ന് 30 ആയി ഉയർന്നതും പദ്ധതിയുടെ സ്വാധീനം വ്യക്തമാക്കുന്നതാണെന്ന് അധികൃതർ അറിയിച്ചു.

പദ്ധതിയുടെ ഭാഗമായി ദുബായിലെ വിവിധ സന്നദ്ധ സംഘടനകളുടെ പ്രതിനിധികളെ പങ്കെടുപ്പിച്ച് അൽ ഖവാനിജ് മജ്ലിസിൽ പ്രത്യേക പരിചയപ്പെടുത്തൽ ശിൽപ്പശാലയും സംഘടിപ്പിച്ചു.സി ഡി എ ദുബായുടെ ലൈസൻസുള്ള വിവിധ മലയാളി സംഘടനങ്ങളിൽ നിന്ന് അടക്കമുള്ള വിവിധ പ്രസ്ഥാനങ്ങളിൽ നിന്ന് 200-ലധികം പ്രതിനിധികൾ ശില്പശാലയിൽ പങ്കെടുത്തു.ചടങ്ങിൽ മൂന്നാം മേഖലയിലെ സ്ഥാപന മികവ് ഉയർത്തുന്നതിനുള്ള മാർഗനിർദേശങ്ങളും മികച്ച പ്രവർത്തനരീതികളും വിശദീകരിച്ചു.

“‘ഇത്റ’യുടെ മൂന്നാം ഘട്ടം സന്നദ്ധ സംഘടനകൾക്ക് നൽകുന്ന ഭരണപരവും സാമ്പത്തികവും സാങ്കേതികവുമായ പിന്തുണയിൽ ഗുണപരമായ മുന്നേറ്റമാണെന്ന് നൽകുന്നതെന്ന് സി.ഡി.എയുടെ സോഷ്യൽ റെഗുലേഷൻ ആൻഡ് സർവീസസ് സെക്ടർ സി.ഇ.ഒ ഡോ. അഹമ്മദ് അൽ ഹാഷിമി പറഞ്ഞു.സ്ഥാപന മികവിനെ ഒരു ഐച്ഛിക രീതിയല്ല, മറിച്ച് സ്ഥിരമായ പ്രവർത്തന സംസ്കാരമാക്കി മാറ്റുകയാണ് ഈ ഘട്ടത്തിലൂടെ ലക്ഷ്യമിടുന്നത്. ഇതുവഴി സന്നദ്ധ സംഘടനകളുടെ പ്രവർത്തനക്ഷമതയും സാമൂഹിക സ്വാധീനത്തിന്റെ സുസ്ഥിരതയും കൂടുതൽ ശക്തിപ്പെടുമെന്ന് അദ്ദേഹം വ്യക്തമാക്കി