ദുബായ്: ദുബായ് കെ.എം.സി.സി ആസ്ഥാനത്തെ ലൈബ്രറിയിലേക്ക് പ്രവാസി വായനക്കാരിൽ നിന്ന് വായിച്ചുതീർത്ത മലയാളം, ഇംഗ്ലീഷ് പുസ്തകങ്ങൾ ശേഖരിക്കുന്ന “ഒരു പുസ്തകം കൈമാറൂ, അറിവിന്റെ ഒരു വിളക്ക് കൊളുത്തൂ” പദ്ധതിക്ക് തുടക്കമായി.
അബൂഹൈൽ കെ.എം.സി.സി ഡോ. പി. എ. ഇബ്രാഹിം ഹാജി ഓഡിറ്റോറിയത്തിൽ നടന്ന ചടങ്ങിൽ ദുബായ് കെ.എം.സി.സി കാസർഗോഡ് ജില്ലാ കമ്മിറ്റി ഭാരവാഹികൾ വായിച്ചുതീർത്ത പുസ്തകങ്ങൾ ദുബായ് കെ.എം.സി.സി സംസ്ഥാന വൈസ് പ്രസിഡന്റും മീഡിയ & തൂലിക വിങ് ചെയർമാനുമായ ഇസ്മായിൽ ഏറാമലയ്ക്ക് ദുബായ് കെ എം സി സി കാസറഗോഡ് ജില്ലാ പ്രസിഡന്റ് സലാം കന്യപ്പാടി കൈമാറി.
പ്രവാസി സമൂഹത്തിനിടയിൽ വായനാ സംസ്കാരം കൂടുതൽ ശക്തിപ്പെടുത്താനും പുതിയ തലമുറയിൽ പുസ്തകവായനയുടെ ശീലം വളർത്തിയെടുക്കാനും ഈ ലൈബ്രറി വലിയ പങ്കുവഹിക്കുമെന്ന് ഇസ്മായിൽ ഏറാമല അഭിപ്രായപ്പെട്ടു. ഓരോ പുസ്തകവും ഒരാളുടെ സ്വപ്നങ്ങൾക്ക് ചിറകേകാനും പുതിയ അറിവുകളുടെ ലോകത്തേക്ക് വാതിൽ തുറക്കാനും സമൂഹത്തിന് മികച്ച വ്യക്തിത്വങ്ങളെ സമ്മാനിക്കാനും കഴിയുന്ന വിലമതിക്കാനാവാത്ത സമ്പത്താണെന്നും അദ്ദേഹം പറഞ്ഞു.
വായിച്ചുകഴിഞ്ഞ പുസ്തകങ്ങൾ മറ്റുള്ളവരിലേക്ക് കൈമാറുന്നത് ഒരു ദാനമെന്നതിലുപരി അറിവിന്റെ പങ്കുവെക്കലാണെന്നും, ഓരോരുത്തരും തങ്ങളുടെ വീടുകളിലുള്ള മലയാളം, ഇംഗ്ലീഷ് ഭാഷകളിലെ മികച്ച പുസ്തകങ്ങൾ ലൈബ്രറിയിലേക്ക് സംഭാവന ചെയ്ത് ഈ മഹത്തായ സംരംഭത്തിന്റെ ഭാഗമാകണമെന്നും അദ്ദേഹം അഭ്യർഥിച്ചു. ഒരു പുസ്തകം ഒരാളുടെ കൈകളിലെത്തുമ്പോൾ അത് ഒരു വായനക്കാരനെ മാത്രമല്ല, ഒരു സമൂഹത്തിന്റെ ചിന്തയെയും ഭാവിയെയും പ്രകാശിപ്പിക്കുന്ന അറിവിന്റെ വിളക്കായി മാറുമെന്നും ദുബായ് കെ എം സി സി വൈസ് പ്രസിഡന്റ് അബ്ദുല്ല ആറങ്ങാടി അഭിപ്രായപ്പെട്ടു .
ജില്ലാ പ്രസിഡന്റ് സലാം കന്യപ്പാടി അധ്യക്ഷത വഹിച്ചു. ദുബായ് കെ.എം.സി.സി ഉപാധ്യക്ഷൻ അബ്ദുല്ല ആറങ്ങാടി ചടങ്ങ് ഉദ്ഘാടനം ചെയ്തു. ജില്ലാ ജനറൽ സെക്രട്ടറി ഹനീഫ് ടി.ആർ. സ്വാഗതം പറഞ്ഞു.
ദുബായ് കെ.എം.സി.സി സെക്രട്ടറി അഫ്സൽ മെട്ടമ്മൽ, മീഡിയ വിങ് വൈസ് ചെയർമാൻ അഷ്റഫ് കൊടുങ്ങല്ലൂർ, ജില്ലാ ഭാരവാഹികളായ സലാം തട്ടാഞ്ചേരി, സി. എച്ച്. നൂറുദ്ദീൻ കാഞ്ഞങ്ങാട്, സുബൈർ അബ്ദുല്ല, ഹസൈനാർ ബീജന്തടുക്ക, അഷ്റഫ് ബായാർ, ബഷീർ പള്ളിക്കര, സിദ്ദീഖ് ചൗക്കി, ആസിഫ് ഹൊസങ്കടി പി ഡി നൂറുദ്ദീൻ എന്നിവർ സംബന്ധിച്ചു.
ദുബായ് കെ.എം.സി.സി കാസർഗോഡ് ജില്ലാ കമ്മിറ്റി ട്രഷറർ ഡോ. ഇസ്മായിൽ നന്ദി പറഞ്ഞു
