അബുദാബി: വേനൽക്കാലത്ത് വർദ്ധിച്ചുവരുന്ന ചൂടും ഈർപ്പവും കണക്കിലെടുത്ത്, പൊതുജനങ്ങൾക്ക് വ്യായാമം ചെയ്യാനും നടക്കാനും സൗകര്യമൊരുക്കുന്നതിനായി എയർ കണ്ടീഷൻ ചെയ്ത അത്യാധുനിക നടപ്പാതകൾ തുറന്ന് അബുദാബി സിറ്റി മുനിസിപ്പാലിറ്റി.
അൽ ഖാലിദിയ പാർക്ക്, അൽ നഹ്യാൻ ഏരിയയിലെ അൽ മമൂറ വാക്ക്വേ, കിംഗ് ഹമദ് ബിൻ ഈസ അൽ ഖലീഫ പാർക്ക് എന്നീ മൂന്ന് പ്രധാന കേന്ദ്രങ്ങളിലാണ് നിലവിൽ ഈ സൗകര്യം ലഭ്യമാക്കിയിരിക്കുന്നത്. പുറത്ത് കടുത്ത ചൂട് അനുഭവപ്പെടുമ്പോഴും ഈ പാതകളിലെ താപനില 24 മുതൽ 25 ഡിഗ്രി സെൽഷ്യസ് വരെയായി നിലനിർത്താൻ സാധിക്കും.
പൊതുജനങ്ങളുടെ ആരോഗ്യ സംരക്ഷണവും കായികക്ഷമതയും മുൻനിർത്തി നിർമ്മിച്ച ഈ നടപ്പാതകൾ മുതിർന്ന പൗരന്മാർക്കും നിശ്ചയദാർഢ്യക്കാർക്കും (ഭിന്നശേഷിക്കാർ) ഒരുപോലെ ഉപയോഗപ്രദമാണ്. ജിമ്മുകളെ മാത്രം ആശ്രയിക്കാതെ, സൗജന്യമായി വ്യായാമം ചെയ്യാൻ ഇത് വഴിമരുന്നിടുന്നു.
അണ്ടർഫ്ലോർ കൂളിംഗ് സിസ്റ്റവും സ്വാഭാവിക വെളിച്ചം കടന്നുപോകുന്ന തരം മേൽക്കൂരകളും ഉൾപ്പെടുത്തി നിർമ്മിച്ച അൽ മമൂറ വാക്ക്വേയാണ് ഈ സംരംഭത്തിൽ ആദ്യം ശ്രദ്ധനേടിയത്. തുടർന്ന് 700 മീറ്റർ നീളമുള്ള കിംഗ് ഹമദ് ബിൻ ഈസ അൽ ഖലീഫ പാർക്കിലെ വാക്ക്വേയും, 660 മീറ്റർ നീളമുള്ള അൽ ഖാലിദിയ പാർക്ക് വാക്ക്വേയും പൊതുജനങ്ങൾക്കായി തുറന്നുകൊടുത്തു.
കാലാവസ്ഥാ വ്യതിയാനങ്ങൾക്കനുസരിച്ച് നഗര അടിസ്ഥാന സൗകര്യങ്ങൾ മെച്ചപ്പെടുത്തുന്നതിന്റെ ഭാഗമായാണ് നഗരസഭയുടെ ഈ നടപടി. കടുത്ത വേനൽക്കാലത്തും പൊതു പാർക്കുകൾ കാര്യക്ഷമമായി ഉപയോഗിക്കാൻ ഈ അത്യാധുനിക സംവിധാനം ജനങ്ങളെ സഹായിക്കുന്നു.
