20 ട്രക്കുകളിലായി അവശ്യസാധനങ്ങൾ അതിർത്തി കടന്നു; ആകെ എത്തിച്ച ദുരിതാശ്വാസ സാമഗ്രികൾ 1.37 ലക്ഷം ടൺ പിന്നിട്ടു
അബുദാബി —യുഎഇയുടെ മാനുഷിക ദുരിതാശ്വാസ ദൗത്യമായ ‘ഓപ്പറേഷൻ ഷെവൽറസ് നൈറ്റ് 3’ ന്റെ ഭാഗമായി 259 ടൺ ഭക്ഷ്യധാന്യങ്ങളും അവശ്യസാധനങ്ങളുമായി രണ്ട് സഹായവ്യൂഹങ്ങൾ ഗസ്സ മുനമ്പിലേക്ക് പ്രവേശിച്ചു.
Full Article
20 കൂറ്റൻ ട്രക്കുകളിലായി സമാഹരിച്ച ഭക്ഷ്യസാമഗ്രികളാണ് ഈ ആഴ്ച ഗസ്സയിലെ ജനങ്ങളിലേക്ക് എത്തിച്ചതെന്ന് എമിറേറ്റ്സ് വാർത്താ ഏജൻസി (വാം) റിപ്പോർട്ട് ചെയ്തു. പട്ടിണിയും ഭക്ഷ്യക്ഷാമവും രൂക്ഷമായി തുടരുന്ന സാഹചര്യത്തിൽ ഗസ്സയിലെ പലസ്തീൻ ജനതയുടെ അടിയന്തര ആവശ്യങ്ങൾ നിറവേറ്റുന്നതിനായാണ് വിപുലമായ തോതിൽ ഭക്ഷ്യസാധനങ്ങൾ ലഭ്യമാക്കുന്നത്.
പുതിയ സഹായവ്യൂഹം കൂടി എത്തിയതോടെ, ഓപ്പറേഷൻ ഷെവൽറസ് നൈറ്റ് 3 ആരംഭിച്ചതിനു ശേഷം ഇതുവരെ ഗസ്സയിലെത്തിച്ച ആകെ ട്രക്കുകളുടെ എണ്ണം 14,519 ആയി ഉയർന്നു. 137,241 ടൺ ദുരിതാശ്വാസ സാമഗ്രികളാണ് ഇക്കാലയളവിൽ മാത്രം യുഎഇ ഗസ്സയിൽ എത്തിച്ചത്.
ഈജിപ്തിലെ അൽ അരിഷ് നഗരത്തിൽ പ്രവർത്തിക്കുന്ന യുഎഇ ഹ്യുമാനിറ്റേറിയൻ എയ്ഡ് ലോജിസ്റ്റിക്സ് സെന്റർ കേന്ദ്രീകരിച്ചാണ് സാധനങ്ങൾ സമാഹരിക്കുന്നതും അതിർത്തി വഴി അയക്കുന്നതും. അന്താരാഷ്ട്ര തലത്തിൽനിന്നും യുഎഇയിൽനിന്നും എത്തുന്ന അവശ്യവസ്തുക്കൾ ഇവിടെ തരംതിരിച്ച് പാക്ക് ചെയ്ത ശേഷമാണ് ഗസ്സയിലേക്ക് അയക്കുന്നത്.
യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാന്റെ നിർദേശപ്രകാരം നടപ്പിലാക്കുന്ന പദ്ധതിയിലൂടെ ഭക്ഷ്യസഹായത്തിന് പുറമെ കുടിവെള്ള വിതരണ പ്ലാന്റുകൾ, ഫീൽഡ് ആശുപത്രികൾ, ആംബുലൻസുകൾ എന്നിവയും യുഎഇ ഗസ്സയിലേക്ക് ലഭ്യമാക്കുന്നുണ്ട്. വരും ദിവസങ്ങളിലും കൂടുതൽ ട്രക്കുകൾ അതിർത്തി കടത്താനുള്ള തയ്യാറെടുപ്പുകൾ അൽ അരിഷ് കേന്ദ്രത്തിൽ തുടരുകയാണ്.
