കിഴക്കൻ, തെക്കൻ മേഖലകളിൽ മഴമേഘങ്ങൾ രൂപപ്പെടാൻ സാധ്യത; ജാഗ്രത പാലിക്കാൻ മുന്നറിയിപ്പ്
ദുബായ്, ഒക്ടോബർ 16, 2026 : യുഎഇയുടെ തീരദേശ-ഉൾനാടൻ മേഖലകളിൽ വെള്ളിയാഴ്ച പുലർച്ചെ ശക്തമായ മൂടൽമഞ്ഞ് രൂപപ്പെട്ടു. അന്തരീക്ഷത്തിൽ ഈർപ്പം ഉയർന്നതിനെ തുടർന്ന് കാഴ്ചപരിധി കുറഞ്ഞ റോഡുകളിൽ ഗതാഗത ജാഗ്രതാനിർദേശം നിലനിൽക്കെ, അടുത്ത നാല് ദിവസങ്ങളിൽ രാജ്യത്തിന്റെ വിവിധ ഭാഗങ്ങളിൽ ഇടിയോടുകൂടിയ മഴയ്ക്കും പൊടിക്കാറ്റിനും സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം (NCM) അറിയിച്ചു.
വെള്ളിയാഴ്ച പുലർച്ചെ യുഎഇയുടെ പ്രധാന പാതകളിൽ കാഴ്ചപരിധി ഗണ്യമായി കുറഞ്ഞ സാഹചര്യത്തിലാണ് എൻസിഎം പുതിയ കാലാവസ്ഥാ മുന്നറിയിപ്പ് പുറപ്പെടുവിച്ചത്. രാത്രിയിലെ ഈർപ്പം കൂടിയതോടെ പ്രധാന റോഡുകളിൽ വേഗപരിധി കുറച്ചാണ് ഗതാഗതം നിയന്ത്രിച്ചത്.
പകൽ സമയത്ത് ആകാശം ഭാഗികമായി മേഘാവൃതമായിരിക്കുമെങ്കിലും വെള്ളിയാഴ്ച ഉച്ചയ്ക്ക് ശേഷം കിഴക്കൻ മലയോര മേഖലകളിൽ മഴമേഘങ്ങൾ (convective clouds) കേന്ദ്രീകരിക്കുമെന്നാണ് പ്രവചനം. ഇത് ചിലയിടങ്ങളിൽ പെട്ടെന്നുള്ള മഴയ്ക്ക് കാരണമായേക്കും. മണിക്കൂറിൽ 10 മുതൽ 25 കിലോമീറ്റർ വരെ വേഗതയിൽ വീശുന്ന കാറ്റ്, കാർമേഘ സാന്നിധ്യത്തിൽ 45 കിലോമീറ്റർ വരെ ശക്തിപ്രാപിക്കാൻ സാധ്യതയുണ്ട്. ഇത് തുറസ്സായ മരുഭൂ പ്രദേശങ്ങളിലും ഉൾനാടൻ പാതകളിലും പൊടിക്കാറ്റിന് വഴിവെക്കും. അതേസമയം അറേബ്യൻ ഗൾഫിലും ഒമാൻ കടലിലും കടൽക്ഷോഭമില്ലാതെ ശാന്തമായിരിക്കും.
ശനിയാഴ്ചയും ഞായറാഴ്ചയും സമാനമായ അന്തരീക്ഷ സ്ഥിതി തുടരുമെന്നാണ് കാലാവസ്ഥാ റിപ്പോർട്ട്. രാത്രിയിലും പുലർച്ചെയും അന്തരീക്ഷ ഈർപ്പം ഉയർന്നുനിൽക്കുന്നതിനാൽ ശനി, ഞായർ പ്രഭാതങ്ങളിലും ശക്തമായ മൂടൽമഞ്ഞോ നേരിയ മഞ്ഞോ രൂപപ്പെടാനിടയുണ്ട്. ശനിയാഴ്ച ഉച്ചയ്ക്ക് ശേഷം ഒറ്റപ്പെട്ട മഴ പെയ്തേക്കാം.
ഞായറാഴ്ച ഉച്ചയോടെ വടക്കൻ, കിഴക്കൻ മേഖലകളിലും തിങ്കളാഴ്ചയോടെ തെക്കൻ, കിഴക്കൻ പ്രദേശങ്ങളിലും മഴമേഘങ്ങൾ ശക്തിപ്രാപിക്കാൻ സാധ്യതയുണ്ട്. വരുംദിവസങ്ങളിൽ കാറ്റിന്റെ വേഗത 40 കിലോമീറ്റർ വരെ ഉയർന്നേക്കാമെന്നതിനാൽ ദൂരക്കാഴ്ച കുറയുന്ന സാഹചര്യങ്ങളിൽ വാഹനമോടിക്കുന്നവർ അതീവ ജാഗ്രത പാലിക്കണമെന്ന് അധികൃതർ നിർദേശിച്ചു.
