ടെഹ്‌റാന്‍റെ ലൈഫ്‌ലൈനായ പ്രധാന ടെർമിനലിൽ എണ്ണ ടാങ്കറുകൾ എത്തുന്നില്ലെന്ന് തെളിയിക്കുന്ന ഉപഗ്രഹ ചിത്രങ്ങൾ സ്കോട്ട് ബെസെന്റ് പുറത്തുവിട്ടു.
വാഷിംഗ്ടൺ : പേർഷ്യൻ ഗൾഫിലെ ഇറാന്റെ ഏറ്റവും പ്രധാനപ്പെട്ട ക്രൂഡ് ഓയിൽ കയറ്റുമതി കേന്ദ്രമായ ഖാർഗ് ദ്വീപിൽ നിന്നുള്ള എണ്ണക്കയറ്റുമതി പൂർണമായും സ്തംഭിച്ചതായി യുഎസ് ട്രഷറി സെക്രട്ടറി സ്കോട്ട് ബെസെന്റ് വ്യക്തമാക്കി. ദ്വീപിലെ തുറമുഖങ്ങളിൽ ഒരു എണ്ണക്കപ്പൽ പോലും ഇല്ലാതെ ബെർത്തുകൾ പൂർണ്ണമായി ഒഴിഞ്ഞുകിടക്കുന്നതിന്റെ ഉപഗ്രഹ ദൃശ്യങ്ങൾ അദ്ദേഹം പുറത്തുവിട്ടു.
ഇറാനെതിരെ വാഷിംഗ്ടൺ ശക്തമാക്കിയ ‘ഓപ്പറേഷൻ ഇക്കണോമിക് ഔട്ട്കാസ്റ്റ്’ എന്ന ഉപരോധ നടപടികൾ ഫലം കാണുന്നുവെന്ന് വ്യക്തമാക്കുന്നതാണ് പുതിയ വിവരങ്ങളെന്ന് ബെസെന്റ് അറിയിച്ചു. ഉപരോധം ശക്തമാക്കുന്നതിന് മുൻപും ശേഷവുമുള്ള ഖാർഗ് ദ്വീപിന്റെ ഉപഗ്രഹ ചിത്രങ്ങൾ അദ്ദേഹം താരതമ്യം ചെയ്തു.
“മുമ്പ് ഇറാന്റെ പ്രധാന ഓയിൽ ടെർമിനലിൽ എണ്ണ ടാങ്കറുകൾ നിരന്നുനിൽക്കുകയായിരുന്നു. എന്നാൽ ഇപ്പോൾ അവിടെ ഒരു ക്രൂഡ് ടാങ്കർ പോലും കാണാനില്ല. ഇറാൻ ഭരണകൂടത്തിന്റെ പരാജയത്തിന്റെ സ്മാരകമായി ഖാർഗ് ദ്വീപ് മാറിയിരിക്കുന്നു,” സ്കോട്ട് ബെസെന്റ് പറഞ്ഞു. ജനങ്ങളുടെ ക്ഷേമത്തിന് വിനിയോഗിക്കേണ്ട സമ്പത്ത് ഭരണകൂടം പ്രാദേശിക സംഘർഷങ്ങൾക്കും സൈനിക നീക്കങ്ങൾക്കുമായി ദുരുപയോഗം ചെയ്യുകയാണെന്നും അദ്ദേഹം വിമർശിച്ചു.
ഇറാന്റെ തീരത്തുനിന്ന് ഏകദേശം 25 കിലോമീറ്റർ അകലെ പേർഷ്യൻ ഗൾഫിൽ സ്ഥിതി ചെയ്യുന്ന ഖാർഗ് ദ്വീപ് വഴിയാണ് രാജ്യത്തിന്റെ കടൽമാർഗ്ഗമുള്ള ക്രൂഡ് ഓയിൽ കയറ്റുമതിയുടെ 90 ശതമാനവും നടക്കുന്നത്. അതിനാൽ ഇവിടം നിശ്ചലമാകുന്നത് ഇറാന്റെ വിദേശ വരുമാനത്തെ സാരമായി ബാധിക്കും.
ഇസ്ലാമിക് റെവല്യൂഷണറി ഗാർഡ് കോർപ്സിന് (IRGC) ലഭിക്കുന്ന ഫണ്ടിംഗും ആയുധ ശേഖരണ നീക്കങ്ങളും തടയാൻ ലക്ഷ്യമിട്ടാണ് യുഎസ് സാമ്പത്തിക ഉപരോധം ശക്തമാക്കിയത്. അനധികൃതമായി ഇറാന്റെ എണ്ണ കൊണ്ടുപോകാൻ സഹായിക്കുന്ന അന്താരാഷ്ട്ര കപ്പലുകൾ, ഇൻഷുറൻസ് ഏജൻസികൾ, ഷിപ്പിംഗ് സർവീസ് ദാതാക്കൾ എന്നിവർക്കെതിരെ കർശന നടപടി സ്വീകരിക്കുമെന്ന് യുഎസ് ട്രഷറി മുന്നറിയിപ്പ് നൽകിയിട്ടുണ്ട്.
അന്താരാഷ്ട്ര ഉപരോധം ശക്തമായതോടെ വിദേശ കപ്പൽ കമ്പനികൾ ഖാർഗ് ദ്വീപിലേക്ക് എത്താൻ മടിക്കുന്നതാണ് ഇപ്പോഴത്തെ പ്രതിസന്ധിക്ക് കാരണം. എന്നാൽ, യുഎസ് പുറത്തുവിട്ട ഉപഗ്രഹ ചിത്രങ്ങളിലോ ഖാർഗ് ദ്വീപിലെ പ്രവർത്തന സ്തംഭനത്തെക്കുറിച്ചോ ഔദ്യോഗിക പ്രതികരണം നടത്താൻ ഇറാൻ ഇതുവരെ തയ്യാറായിട്ടില്ല.
