2027-ലെ സന്ദർശക അനുഭവത്തിനായി ‘ഫ്യൂച്ചർ പെർഫെക്റ്റ്സ്’ കാമ്പയിൻ വഴി തെരഞ്ഞെടുപ്പ്; ആദ്യ 48 മണിക്കൂറിൽ ലഭിച്ചത് 20,000 അപേക്ഷകൾ
ദുബായ്, യുഎഇ — പരമ്പരാഗത ബിരുദ സർട്ടിഫിക്കറ്റുകൾക്കും മുൻ പ്രവൃത്തിപരിചയത്തിനും പകരം ഉദ്യോഗാർഥികളുടെ വ്യക്തിഗത പ്രായോഗിക ശേഷികൾക്ക് മുൻഗണന നൽകുന്ന പുത്തൻ നിയമന രീതിയുമായി ദുബായ് മ്യൂസിയം ഓഫ് ദ ഫ്യൂച്ചർ. 2027-ൽ ആരംഭിക്കുന്ന പുതിയ സന്ദർശക അനുഭവ വിഭാഗത്തിലേക്ക് ജീവനക്കാരെ കണ്ടെത്താനായി ഒക്ടോബർ 21-ന് തുടക്കമിട്ട ‘ഫ്യൂച്ചർ പെർഫെക്റ്റ്സ്’ കാമ്പയിന് ആദ്യ 48 മണിക്കൂറിനുള്ളിൽ ലഭിച്ചത് 20,000 പൂർണ്ണ അപേക്ഷകൾ.
ഈ ദിവസങ്ങളിൽ 42,000 പേരാണ് തൊഴിലവസരങ്ങൾ തേടി ഔദ്യോഗിക വെബ്‌സൈറ്റ് സന്ദർശിച്ചത്. ആശയവിനിമയ പാടവം, ഭാവനാശേഷി, വൈകാരിക വിവേകം (ഇമോഷണൽ ഇന്റലിജൻസ്), പ്രശ്നപരിഹാര മികവ് തുടങ്ങിയ മനുഷ്യശേഷികളെ അടിസ്ഥാനമാക്കിയാണ് റിക്രൂട്ട്‌മെന്റ്.
വിദ്യാഭ്യാസ യോഗ്യതകളോ മുൻ തൊഴിൽ പരിചയമോ ഒരാളുടെ യഥാർത്ഥ കഴിവുകളെ പൂർണ്ണമായി പ്രതിഫലിപ്പിക്കണമെന്നില്ലെന്ന് 2026 ജൂണിൽ പുറത്തിറങ്ങിയ ഒഇസിഡി (OECD) റിപ്പോർട്ട് വ്യക്തമാക്കിയിരുന്നു. നൈപുണ്യത്തിന് മുൻഗണന നൽകുന്ന തൊഴിൽ വിപണിയെക്കുറിച്ചുള്ള അന്താരാഷ്ട്ര പഠനങ്ങളുടെ പശ്ചാത്തലത്തിലാണ് മ്യൂസിയത്തിന്റെ ഈ നടപടി.
2022-ൽ പ്രവർത്തനം ആരംഭിച്ച ശേഷം 180-ലധികം രാജ്യങ്ങളിൽ നിന്നായി 50 ലക്ഷത്തിലേറെ സന്ദർശകരാണ് മ്യൂസിയം ഓഫ് ദ ഫ്യൂച്ചറിലെത്തിയത്. വ്യത്യസ്ത സംസ്കാരങ്ങളിൽ നിന്നുള്ളവരുമായി ഇടപഴകാനും സങ്കീർണ്ണമായ ശാസ്ത്ര ആശയങ്ങൾ ലളിതമായി പങ്കുവെക്കാനും കഴിയുന്ന വ്യക്തികളെയാണ് മ്യൂസിയത്തിന് ആവശ്യം. അതിനാൽ തന്നെ മ്യൂസിയങ്ങളിലോ കസ്റ്റമർ സർവീസ് രംഗത്തോ മുൻപരിചയം ഇല്ലാത്തവർക്കും അപേക്ഷിക്കാം.
ഓൺലൈൻ അപേക്ഷയോടൊപ്പം സമർപ്പിക്കുന്ന ചെറിയ വീഡിയോ ഓഡിഷനോടെയാണ് തെരഞ്ഞെടുപ്പ് പ്രക്രിയ ആരംഭിക്കുന്നത്. മുന്നൊരുക്കങ്ങളില്ലാതെ ഉദ്യോഗാർഥികൾക്ക് സ്വന്തം വ്യക്തിത്വവും ചിന്താരീതികളും പ്രകടിപ്പിക്കാൻ ഇതിലൂടെ സാധിക്കും. ഇതിൽ മികവ് പുലർത്തുന്നവർക്ക് നേരിട്ടുള്ള പ്രാക്ടിക്കൽ അസസ്‌മെന്റുകളും വിദഗ്ദ്ധ സമിതിക്ക് മുന്നിലുള്ള അവസാനഘട്ട ഓഡിഷനും ഉണ്ടാകും. കൂടാതെ, റോക്സി സിനിമാസ്, വിർജിൻ മെഗാസ്റ്റോർ, ദുബായ് ഡിസൈൻ വീക്ക് എന്നിവിടങ്ങളിൽ പൊതുജനങ്ങൾക്കായി സംവേദനാത്മക ഓഡിഷൻ പ്ലാറ്റ്‌ഫോമുകളും സജ്ജീകരിച്ചിട്ടുണ്ട്.
സന്ദർശക അനുഭവങ്ങൾ മെച്ചപ്പെടുത്തുന്നതിന് അക്കാദമിക് യോഗ്യതകൾക്കപ്പുറം ആശയവിനിമയ ശേഷിക്കും മനുഷ്യബന്ധങ്ങൾ സ്ഥാപിക്കാനുള്ള കഴിവിനുമാണ് പ്രാധാന്യം നൽകേണ്ടതെന്ന് മ്യൂസിയം ചീഫ് ഓപ്പറേറ്റിങ് ഓഫീസർ അസ്സ അബ്ദുൽ അസീസ് അൽ നുഐമി വ്യക്തമാക്കി.
തെരഞ്ഞെടുക്കപ്പെടുന്നവർക്ക് ഫുൾടൈം ജോലിയും പ്രത്യേക പരിശീലനവും നൽകും. താല്പര്യമുള്ളവർക്ക് നവംബർ 8 വരെ Futureperfects.ae എന്ന വെബ്‌സൈറ്റ് വഴി അപേക്ഷിക്കാം.
