കുവൈത്ത് സിറ്റി | UAE വാർത്ത
ഇരുരാജ്യങ്ങൾക്കിടയിലെ ടൂറിസം മേഖലയിൽ കൂടുതൽ സഹകരണവും വികസന സാധ്യതകളും വിലയിരുത്തി കുവൈത്ത്–യുഎഇ മന്ത്രിമാർ കൂടിക്കാഴ്ച നടത്തി. കുവൈത്ത് ഇൻഫർമേഷൻ ആൻഡ് കൾച്ചർ മന്ത്രിയും യുവജനകാര്യ സഹമന്ത്രിയുമായ അബ്ദുൽ റഹ്മാൻ അൽ മുതൈരിയും യുഎഇ സാമ്പത്തിക, ടൂറിസം മന്ത്രിയായ അബ്ദുല്ല ബിൻ തൗഖ് അൽ മാരിയുമാണ് ചർച്ച നടത്തിയത്.
സംയുക്ത ഉന്നത സമിതിയുടെ ആറാമത് സമ്മേളനത്തോടനുബന്ധിച്ച് കുവൈത്ത് വിദേശകാര്യ മന്ത്രാലയത്തിൽ നടന്ന യോഗത്തിനിടെയായിരുന്നു കൂടിക്കാഴ്ച. കുവൈത്തും യുഎഇയും തമ്മിലുള്ള ടൂറിസം ബന്ധം കൂടുതൽ ശക്തിപ്പെടുത്തുന്നതിനുള്ള മാർഗങ്ങൾ ഇരുവരും വിശദമായി വിലയിരുത്തി.
പ്രാദേശിക ടൂറിസം പ്രോത്സാഹനം, സംയുക്ത പ്രചാരണ പരിപാടികൾ, സ്വകാര്യ മേഖലയിലെ പങ്കാളിത്തം, നിക്ഷേപ സാധ്യതകൾ എന്നിവ ചർച്ചകളിൽ ഉൾപ്പെട്ടു. ഗൾഫ് മേഖലയിൽ ടൂറിസം വളർച്ചയ്ക്ക് ഇരുരാജ്യങ്ങളും സഹകരിച്ച് പ്രവർത്തിക്കണമെന്ന് ഇരുപക്ഷവും അഭിപ്രായപ്പെട്ടു.
ടൂറിസം മേഖലയിൽ ദീർഘകാല പങ്കാളിത്തം ഉറപ്പാക്കുന്നതിന് തുടർചർച്ചകൾ നടത്താനും മന്ത്രിമാർ തീരുമാനിച്ചു.
