ദുബായ്: നഗരത്തിലെ ഗതാഗതക്കുരുക്കിന് ശാശ്വത പരിഹാരം കാണുന്നതിനായി Roads and Transport Authority (ആർ.ടി.എ) നടപ്പിലാക്കുന്ന ഹെസ്സ സ്ട്രീറ്റ് വികസനത്തിന്റെ രണ്ടാം ഘട്ടത്തിന് കരാർ അനുവദിച്ചു. പദ്ധതി പൂർത്തിയാകുന്നതോടെ മേഖലയിൽ യാത്രാസമയം നിലവിലെ 24 മിനിറ്റിൽ നിന്ന് വെറും 5 മിനിറ്റായി കുറയുമെന്ന് ആർ.ടി.എ അറിയിച്ചു.
ഏകദേശം ആറര ലക്ഷത്തോളം ആളുകൾ താമസിക്കുന്ന പത്തോളം പ്രധാന മേഖലകൾക്ക് പദ്ധതിയുടെ പ്രയോജനം ലഭിക്കും. അൽ ഖൈൽ റോഡിൽ നിന്ന് Sheikh Mohammed Bin Zayed Road വരെയുള്ള മൂന്ന് കിലോമീറ്റർ ഭാഗത്താണ് രണ്ടാംഘട്ട വികസനം.
നിലവിൽ ഓരോ ദിശയിലേക്കും രണ്ട് വരികളുള്ള ഹെസ്സ സ്ട്രീറ്റ് നാല് വരികളാക്കി വികസിപ്പിക്കുന്നതോടെ റോഡിന്റെ ശേഷി ഇരട്ടിയാകും. മണിക്കൂറിൽ 4,000 വാഹനങ്ങൾ കടന്നുപോകുന്ന നിലവിലെ ശേഷി 8,000 വാഹനങ്ങളായി ഉയരും. പദ്ധതിയുടെ ഭാഗമായി 8,835 മീറ്റർ നീളത്തിലുള്ള പാലങ്ങളും 480 മീറ്റർ നീളമുള്ള തുരങ്ക പാതയും നിർമിക്കും.
ജെവിസി (JVC), അർജാൻ, ദുബായ് സയൻസ് പാർക്ക്, അൽ ബർഷ സൗത്ത് എന്നിവിടങ്ങളിലെ ഗതാഗത സൗകര്യം മെച്ചപ്പെടും. പദ്ധതി നഗരത്തിന്റെ അടിസ്ഥാന സൗകര്യ വികസനത്തിന്റെ ഭാഗമാണെന്ന് അധികൃതർ വ്യക്തമാക്കി.
പദ്ധതിയുടെ ആദ്യഘട്ടം ഏപ്രിലിൽ പൊതുജനങ്ങൾക്കായി തുറന്നുകൊടുക്കുമെന്ന് ആർ.ടി.എ ഡയറക്ടർ ജനറലും ബോർഡ് ഓഫ് എക്സിക്യൂട്ടീവ് ഡയറക്ടേഴ്സ് ചെയർമാനുമായ മത്തർ അൽ തായർ അറിയിച്ചു. ആദ്യഘട്ടത്തിൽ Sheikh Zayed Road ഉൾപ്പെടെയുള്ള നാല് പ്രധാന കവലകൾ നവീകരിച്ചു.
കൂടാതെ, ദുബായ് ഹിൽസിനെയും ദുബായ് മോട്ടോർ സിറ്റിയെയും ബന്ധിപ്പിക്കുന്ന 10.4 കിലോമീറ്റർ നീളമുള്ള സൈക്ലിംഗ്, ഇ-സ്കൂട്ടർ പാതയും പദ്ധതിയുടെ ഭാഗമാണ്. പരിസ്ഥിതി സൗഹൃദ ഗതാഗതം പ്രോത്സാഹിപ്പിക്കാനാണ് ഈ നീക്കം.
