ദുബൈ: നിയമസഭാ തെരഞ്ഞെടുപ്പിൽ പ്രവാസികളുടെ പങ്കാളിത്തം വർധിപ്പിക്കുന്നതിനായി ‘വോട്ട് ഫോർ കേരള’ ക്യാമ്പയിനുമായി Indian National Congress Overseas (INCAS UAE) രംഗത്ത്. കുറഞ്ഞ നിരക്കിൽ വിമാനയാത്ര ഒരുക്കിയാണ് പദ്ധതി നടപ്പാക്കുന്നത്.
ഏപ്രിൽ 9ന് നടക്കുന്ന നിയമസഭാ തെരഞ്ഞെടുപ്പിൽ വോട്ട് രേഖപ്പെടുത്താൻ നാട്ടിലേക്ക് പോകാൻ ആഗ്രഹിക്കുന്ന പ്രവാസികൾക്ക് ആശ്വാസകരമാകുന്ന രീതിയിലാണ് ഈ സൗകര്യം. തെരഞ്ഞെടുപ്പ് സമയങ്ങളിൽ വിമാന നിരക്കുകൾ ഉയരുന്നത് വലിയ ബുദ്ധിമുട്ടുണ്ടാക്കാറുള്ളതിനാൽ, അതിന് പരിഹാരമായാണ് ഈ ഇടപെടൽ.
കൂടുതൽ യാത്രക്കാരുള്ള റൂട്ടുകളിൽ ചാർട്ടേഡ് വിമാനങ്ങൾ ഉൾപ്പെടെയുള്ള പ്രത്യേക സർവീസുകൾ ഒരുക്കും. ഗ്രൂപ്പുകളായി യാത്ര ചെയ്യുന്നവർക്ക് മുൻഗണനയും പ്രത്യേക ആനുകൂല്യങ്ങളും ലഭ്യമാക്കുമെന്ന് സംഘാടകർ അറിയിച്ചു.
യു.എ.ഇയിലെ വിവിധ എമിറേറ്റുകളിൽ നിന്ന് കേരളത്തിലേക്കുള്ള പ്രധാന സെക്ടറുകളിലാണ് ഈ സേവനം പ്രാഥമികമായി ലഭ്യമാക്കുക. ജനാധിപത്യ പ്രക്രിയയിൽ പ്രവാസികളുടെ സജീവ പങ്കാളിത്തം ഉറപ്പാക്കുകയാണ് പദ്ധതിയുടെ പ്രധാന ലക്ഷ്യമെന്ന് ഭാരവാഹികൾ വ്യക്തമാക്കി.
വോട്ട് ചെയ്യാൻ നാട്ടിലേക്ക് യാത്ര ചെയ്യാൻ താല്പര്യമുള്ളവർ ഓൺലൈൻ രജിസ്ട്രേഷൻ ഫോമിലൂടെ അപേക്ഷിക്കണം. കൂടുതൽ വിവരങ്ങൾക്ക് ബന്ധപ്പെട്ട ജില്ലാ കമ്മിറ്റികളുമായി ബന്ധപ്പെടാമെന്നും നാഷണൽ കമ്മിറ്റി പ്രസിഡന്റ് സുനിൽ അസീസ് അറിയിച്ചു.
