യുഎഇയില്‍ സ്വകാര്യമേഖലയില്‍ സ്വദേശിവത്കരണം ഈ വര്‍ഷം 6 ശതമാനമായി വര്‍ദ്ധിപ്പിക്കും. അടുത്ത വര്‍ഷത്തോടെ സ്വദേശിവല്‍ക്കരണം 8 ശതമാനമായി ഉര്‍ത്താനാണ് മാനവ വിഭവശേഷി സ്വദേശീവല്‍ക്കരണ മന്ത്രാലയം ലക്ഷ്യമിടുന്നത്. . 2026 അവസാനത്തോടെ 10 ശതമാനം ലക്ഷ്യം കൈവരിക്കുക എന്നതാണ് ആത്യന്തിക ലക്ഷ്യം.
സ്വത്ത്, വിദ്യാഭ്യാസം, നിര്‍മാണം, ആരോഗ്യ സംരക്ഷണം തുടങ്ങി 14 മേഖലകളിലെ സ്വകാര്യ ഉടമസ്ഥതയിലുള്ള കമ്പനികള്‍ക്ക് സ്വദേശിവത്കരണം ബാധകമാണ്. കഴിഞ്ഞ വര്‍ഷം ജനുവരി ഒന്നു മുതലാണ് രാജ്യത്ത് സ്വദേശിവല്‍ക്കരണം നടപ്പാക്കിത്തുടങ്ങിയത്.
അതേസമയം, യുഎഇയുടെ സ്വദേശിവത്കരണ നിയമങ്ങള്‍ മറികടക്കാനുള്ള ശ്രമത്തില്‍ 1,200-ലേറെ കമ്പനികള്‍ നിയമലംഘനം നടത്തിയതായി കണ്ടെത്തിയിരുന്നു. നിയമങ്ങള്‍ മറികടക്കാന്‍ കമ്പനികള്‍ 1,963 സ്വദേശികളെയാണ് അനധികൃതമായി കമ്പനികളില്‍ നിയമിച്ചതെന്ന് മന്ത്രാലയം അറിയിച്ചു. 2022 പകുതി മുതല്‍ 2024 മാര്‍ച്ച് 14 വരെയുള്ള കാലയളവിലാണ് നിയമനം നടന്നിരിക്കുന്നത്.
