യുഎഇയുടെ ചില ഭാഗങ്ങളില്‍ ഇടിയോടുകൂടിയ മഴ. ദുബൈ അല്‍ ഖൂസ്, അല്‍ ഐനിലെ വിവിധ പ്രദേശങ്ങള്‍, റാസ് അല്‍ ഖൈമ, ഷാര്‍ജ, അജ്മാന്‍ എന്നിവിടങ്ങളില്‍ മഴ അനുഭവപ്പെട്ടു. അന്തരീക്ഷം പൂര്‍ണമായി മേഘാവൃതമാണ്. നാളെ മുതല്‍ രാജ്യത്ത് ശക്തമായ മഴയ്ക്ക് സാധ്യതയുണ്ടെന്ന് ദേശീയ കാലാവസ്ഥാനിരീക്ഷണ കേന്ദ്രം മുന്നറിയിപ്പ് നല്‍കുന്നുണ്ട്.
ശക്തമായ കാറ്റിന് സാധ്യതയുണ്ടെന്നും മുന്നറിയിപ്പുണ്ട്. മണിക്കൂറില്‍ 40 കിലോമീറ്റര്‍ വേഗത്തില്‍ കാറ്റുവീശാനിടയുണ്ട്. ദൂരക്കാഴ്ച കുറയുമെന്നതിനാല്‍ വാഹനമോടിക്കുന്നവര്‍ ജാഗ്രത പാലിക്കണമെന്നും അധികൃതര്‍ നിര്‍ദേശിച്ചു. ചൊവ്വാഴ്ചയോടെ മഴയുടെ തീവ്രത കുറയുമെന്നാണ് കണക്കുകൂട്ടല്‍.
