അബുദാബി: ഈദ് അവധിക്കാലത്ത് അബുദാബി ബാപ്സ് ഹിന്ദു മന്ദിർ സന്ദർശിക്കുന്നതിന് മുൻകൂർ രജിസ്ട്രേഷൻ ആവശ്യമാണെന്ന് അധികൃതർ അറിയിച്ചു. സന്ദർശകർ “മന്ദിർ അബുദാബി” ആപ്പ് അല്ലെങ്കിൽ വെബ്‌സൈറ്റ് വഴിയാണ് രജിസ്റ്റർ ചെയ്യേണ്ടത്. രജിസ്റ്റർ ചെയ്തവർ നിശ്ചിത സമയത്ത് ഹിന്ദു മന്ദിറിൽ എത്തിച്ചേരണമെന്നും അധികൃതർ നിർദേശിച്ചു.ദുബായ് പൊലീസുമായി സഹകരിച്ചാണ് ക്ഷേത്രം അധികൃതർ ക്രമീകരണങ്ങൾ ഏർപ്പെടുത്തുന്നത്. മുൻകൂർ രജിസ്ട്രേഷൻ ഇല്ലാതെ എത്തുന്ന സന്ദർശകർക്ക് പ്രവേശനം ഉറപ്പാക്കാൻ സാധിക്കില്ല. തുറന്നതിനുശേഷം, മന്ദിർ അതിന്‍റെ ആദ്യ വർഷത്തിൽ 2.2 ദശലക്ഷത്തിലധികം സന്ദർശകരെ സ്വാഗതം ചെയ്തു. 2024 ലെ ഈദ് സമയത്ത്, 60,000-ത്തിലധികം ഭക്തർ മിഡിൽ ഈസ്റ്റിലെ ആദ്യത്തെ പരമ്പരാഗത ഹിന്ദു ശിലാ ക്ഷേത്രം സന്ദർശിച്ചു.ധാരാളം സന്ദർശകരുടെ വരവ് പ്രതീക്ഷിച്ച്, ക്ഷേത്രം അതിന്‍റെ ഓൺ-സൈറ്റ് പാർക്കിംഗ് സൗകര്യങ്ങൾ വികസിപ്പിക്കുകയും തണലുള്ള കാത്തിരിപ്പ് കേന്ദ്രങ്ങൾ ഏർപ്പെടുത്തുകയും ചെയ്തു.ഈദ് ദിവസങ്ങളിൽ , രാവിലെ 9 മണി മുതൽ രാത്രി 8 മണി വരെയായിരിക്കും പ്രവേശന സമയം. തിങ്കളാഴ്ച, ക്ഷേത്രത്തിൽ സന്ദർശകർക്ക് പ്രവേശനം ഉണ്ടാകില്ല.
