ദുബായ്: ജപ്പാനിലെ ഒസാക്ക ആതിഥേയത്വം വഹിക്കുന്ന എക്സ്പോ 2025 ലെ യു എ ഇ യുടെ പവിലിയൻ യു എ ഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം സന്ദർശിച്ചു. ഈന്തപ്പനയിൽ നിന്ന് പ്രചോദനം ഉൾക്കൊണ്ട് രൂപകൽപന ചെയ്ത പവലിയൻ മനോഹരമാണെന്ന് ഷെയ്ഖ് മുഹമ്മദ് അഭിപ്രായപ്പെട്ടു.“ പവലിയൻ ഭൂതകാലത്തിന്റെ ആധികാരികതയോടുള്ള നമ്മുടെ പ്രതിബദ്ധതയെയും ഭാവിയോടുള്ള നമ്മുടെ അഭിനിവേശത്തെയും പ്രതിനിധീകരിക്കുന്നു,” അദ്ദേഹം കൂട്ടിച്ചേർത്തു.ബഹിരാകാശം, ആരോഗ്യ സംരക്ഷണ നവീകരണം, സുസ്ഥിര സംരംഭങ്ങൾ എന്നിവയിലെ യുഎഇയുടെ പദ്ധതികളുടെ വിശദാംശങ്ങൾ പവലിയനിൽ പ്രദർശിപ്പിക്കുന്നുണ്ടെന്ന് അദ്ദേഹം പറഞ്ഞു.പവലിയന്റെ രൂപകൽപ്പനയ്ക്കും വികസനത്തിനും മേൽനോട്ടം വഹിച്ചതിന് ഷെയ്ഖ മറിയം ബിൻത് മുഹമ്മദ് ബിൻ സായിദിന് അദ്ദേഹം പ്രത്യേക നന്ദി അറിയിച്ചു.
“ജപ്പാനുമായുള്ള ഞങ്ങളുടെ ബന്ധം 1972 മുതൽ ആരംഭിച്ചതാണ്. ഇന്ന്, ആഗോളതലത്തിൽ പങ്കാളിത്തത്തിലൂടെയും അന്താരാഷ്ട്ര പരിപാടികൾക്ക് ആതിഥേയത്വം വഹിക്കുന്നതിലൂടെയും ലോകത്തിലെ എല്ലാ രാജ്യങ്ങളുമായുള്ള തങ്ങളുടെ ബന്ധം ശക്തമാണെന്നും അദ്ദേഹം കൂട്ടിച്ചേർത്തു.
