ദുബായ്: ഗതാഗതം സുഗമമാക്കുന്നതിന്റെയും തിരക്ക് കുറക്കുന്നതിന്റെയും ഭാഗമായി ടൗൺ സ്‌ക്വയറിലേക്കും കൈറ്റ് ബീച്ചിലേക്കും ആർ ടി എ ഓരോ എക്സിറ്റുകൾ വീതം തുറന്നു.ടൗൺ സ്‌ക്വയറിലേക്കും തിരിച്ചുമുള്ള റോഡിൽ ഒരു പുതിയ എക്സിറ്റ് തുറന്നത് യാത്രക്കാർക്കും താമസക്കാർക്കും ആശ്വാസമായി.2025 ഫെബ്രുവരിയിൽ പ്രദേശത്ത് റോഡ് നിർമാണ പദ്ധതികൾ പ്രഖ്യാപിച്ചതിന് ശേഷം ആർ ടി എ ഈ പ്രദേശത്തെ E611 റോഡുമായി ബന്ധിപ്പിച്ചു.ടൗൺ സ്‌ക്വയർ, മിറ എന്നിവയുൾപ്പെടെയുള്ള പ്രദേശത്തേക്കും തിരിച്ചുമുള്ള ഗതാഗതം മെച്ചപ്പെടുത്തുന്നതിലൂടെ അൽ ഖുദ്ര റോഡിലെ ഗതാഗതം ലഘൂകരിക്കാൻ സാധിക്കുമെന്ന് ആർ‌ടി‌എ വ്യക്തമാക്കി.തിരക്കേറിയ സമയങ്ങളിൽ ഈ മേഖലയിൽ നിന്ന് പുറത്തുകടക്കാൻ പത്ത് മിനിറ്റിന്റെ സ്ഥാനത്ത് ഒരു മണിക്കൂർ വരെ സമയമെടുക്കുന്നുണ്ടെന്ന് താമസക്കാർ സമൂഹ മാധ്യമ പ്ലാറ്റ്‌ഫോമുകളിൽ പരാതിപ്പെട്ടിരുന്നു. ഇതുകൂടി കണക്കിലെടുത്താണ് ആർ ടി എ യുടെ നടപടി. കൈറ്റ് ബീച്ചിനെ ജുമൈറ സ്ട്രീറ്റുമായി ബന്ധിപ്പിക്കുന്ന പുതിയ എക്സിറ്റ് ഉമ്മു സുഖീം 1 ലാണ് തുറന്നത്.പുതിയ റൂട്ട് സംബന്ധിച്ച വിശദാംശങ്ങൾ അടങ്ങുന്ന വീഡിയോ അധികൃതർ X പ്ലാറ്റ് ഫോമിൽ പോസ്റ്റ് ചെയ്തിട്ടുണ്ട്.
