ദുബായ് : നഗര വികസനം, ജനസംഖ്യാ വളർച്ച, മെച്ചപ്പെട്ട ജീവിത നിലവാരം എന്നിവയെ പിന്തുണയ്ക്കാൻ ലക്ഷ്യമിട്ട് റോഡ് അടിസ്ഥാന സൗകര്യങ്ങളും പൊതുഗതാഗത സംവിധാനങ്ങളും മെച്ചപ്പെടുത്താനുള്ള ഭരണ നേതൃത്വത്തിന്റെ നിർദേശങ്ങൾക്കനുസൃതമായി ദുബൈ റോഡ്സ് ആൻഡ് ട്രാൻസ്പോർട്ട് അതോറിറ്റി (ആർ.ടി.എ) അൽ മുസ്തഖ്ബാൽ സ്ട്രീറ്റ് വികസന പദ്ധതിക്ക് കരാർ നൽകി. സാബീൽ പാലസ് സ്ട്രീറ്റുമായുള്ള കവല മുതൽ ഫിനാൻഷ്യൽ സെന്റർ സ്ട്രീറ്റ് വരെ 633 ദശലക്ഷം ദിർഹം ചെലവിൽ ഈ പദ്ധതി നീളുന്നു.
1,700 മീറ്റർ നീളത്തിൽ പാലങ്ങളുടെയും തുരങ്കങ്ങളുടെയും നിർമാണം, ഓരോ ദിശയിലേക്കും മൂന്ന് മുതൽ നാല് വരെ വരിയുള്ള പാതകളുടെ വീതി കൂട്ടൽ എന്നിവ ഇതിൽ ഉൾപ്പെടുന്നു. ഈ പദ്ധതി വികസന ഇടനാഴിയുടെ ശേഷി 33% വർധിപ്പിക്കും. ഇരു ദിശകളിലേക്കും മണിക്കൂറിൽ 6,600 വാഹനങ്ങളിൽ നിന്ന് 8,800 വാഹനങ്ങളായും, യാത്രാ സമയം 13ൽ നിന്ന് 6 മിനുട്ടായും കുറയ്ക്കും.
അൽ മുസ്തഖ്ബാൽ സ്ട്രീറ്റ് വികസന പദ്ധതി ട്രേഡ് സെന്റർ റൗണ്ട് എബൗട്ടിന്റെ വികസനം ഉൾപ്പെടുന്ന വിശാലമായ പദ്ധതിയുടെ ഭാഗമാണെന്ന് ദുബൈ റോഡ്സ് ആൻഡ് ട്രാൻസ്പോർട്ട് അതോറിറ്റി (ആർ.ടി.എ) എക്സിക്യൂട്ടിവ് ഡയരക്ടർ ബോർഡ് ചെയർമാനും ഡയരക്ടർ ജനറലുമായ മത്തർ അൽ തായർ പറഞ്ഞു. കഴിഞ്ഞ വർഷം അവസാന പാദത്തിൽ ഇതിന്റെ നിർമാണ പ്രവർത്തനങ്ങൾ ആരംഭിച്ചു. വിശേഷിച്ചും ദുബൈ വേൾഡ് ട്രേഡ് സെന്റർ പോലെയുള്ള നിരവധി പ്രമുഖ വാണിജ്യ, റെസിഡൻഷ്യൽ, വികസന മേഖലകൾക്ക് ഈ പദ്ധതി സേവനം നൽകും.
നാല് പതിറ്റാണ്ടിലേറെയായി അന്താരാഷ്ട്ര പരിപാടികൾക്കും പ്രദർശനങ്ങൾക്കുമായി മേഖലയിലെ പ്രധാന വേദിയാണ് വേൾഡ് ട്രേഡ് സെന്റർ. ജൈടെക്സ്, അറേബ്യൻ ട്രാവൽ മാർക്കറ്റ്, അറബ് ഹെൽത്ത്, ഗൾഫുഡ്, ട്രാൻസ്പോർട്ട് എക്സിബിഷൻ തുടങ്ങിയ പ്രധാന ആഗോള പ്രദർശനങ്ങളും സമ്മേളനങ്ങളും ഇവിടെയാണ് നടന്നു വരുന്നത്.
മിഡിൽ ഈസ്റ്റ്, ആഫ്രിക്ക, ദക്ഷിണേഷ്യ എന്നിവയുടെ പ്രമുഖ സാമ്പത്തിക കേന്ദ്രമായ ദുബൈ ഇന്റർനാഷണൽ ഫിനാൻഷ്യൽ സെന്ററിനും (ഡി.ഐ.എഫ്.സി) ഈ പദ്ധതി സേവനം നൽകുന്നതാണ്. സാബീൽ, ഡൗൺ ടൗൺ ദുബൈ, ബിസിനസ് ബേ എന്നിവയുൾപ്പെടെയുള്ള പ്രധാന മേഖലകളിലേക്കുള്ള കണക്റ്റിവിറ്റി ഇത് കൂടുതൽ മെച്ചപ്പെടുത്തും. ഏകദേശം അര ദശലക്ഷം താമസക്കാർക്കും സന്ദർശകർക്കും ഈ പദ്ധതി പ്രയോജനപ്പെടുമെന്ന് പ്രതീക്ഷിക്കുന്നതായും അൽ തായർ വ്യക്തമാക്കി.
