ദുബായ് : മൃതദേഹം നാട്ടിൽ എത്തിക്കുന്നത് അടക്കം പ്രവാസികളുടെ വിഷയങ്ങളിൽ കോൺസൽ ജനറൽ സതീഷ്കുമാർ ശിവന് നിവേദനം നൽകി ദുബായ് കെഎംസിസി. മൃതദേഹം നാട്ടിൽ എത്തിക്കുന്നതുമായി ബന്ധപ്പെട്ടു നടക്കുന്ന ചൂഷണം അവസാനിപ്പിക്കുന്നതിനു കർശന നടപടികൾ സ്വീകരിച്ചിട്ടുണ്ടെന്നും കെഎംസിസി ഉൾപ്പെടെയുള്ള അംഗീകൃത സംഘടനകളെയും അസോസിയേഷനുകളെയും മാത്രം ആശ്രയിക്കാൻ പ്രവാസി ഇന്ത്യക്കാർക്ക് ബോധവൽക്കരണം നൽകുമെന്നും കോൺസൽ ജനറൽ പറഞ്ഞു.ദെയ്റ ബനിയാസിൽ ദുബായ് കെഎംസിസി ഓഫിസിലെ പാസ്പോർട്ട് സേവാ കേന്ദ്രം വഴി സ്വീകരിക്കുന്ന പാസ്പോർട്ട് അപേക്ഷകളുടെ എണ്ണം വർധിപ്പിക്കണമെന്നും കൂടുതൽ കൗണ്ടറുകൾ അനുവദിക്കണമെന്നും നിവേദനത്തിൽ ആവശ്യപ്പെട്ടു. കെഎംസിസി സംസ്ഥാന വൈസ് പ്രസിഡന്റ് മുഹമ്മദ് പട്ടാമ്പി, സെക്രട്ടറിമാരായ ഇബ്രാഹിം ഖലീൽ, വി.കെ അഹമ്മദ് ബിച്ചി എന്നിവർ കൂടിക്കാഴ്ചയിൽ പങ്കെടുത്തു.
