കോഴിക്കോട്: ചെറുവണ്ണൂരിൽ ഓട്ടത്തിനിടെ കാറിന് തീപിടിച്ച് എട്ടുമാസം ഗർഭിണിയായ യുവതി വെന്തുമരിച്ചു. പൂവുത്തുംചാലിൽ ലാലുവിന്റെ ഭാര്യ സോന (28) ആണ് മരിച്ചത്.
ലാലുവിനെ പരിക്കുകളോടെ കോഴിക്കോട് ഗവ. മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. കക്കറ മുക്ക് റോഡിൽ എടോളി താഴെ വെള്ളിയാഴ്ച രാത്രി 9.15ഓടെയായിരുന്നു നാടിനെ നടുക്കിയ ദുരന്തം. ആശുപത്രിയിൽ പോയി മടങ്ങുകയായിരുന്ന ദമ്പതികൾ സഞ്ചരിച്ച കാറിനാണ് തീ പിടിച്ചത്. പിൻസീറ്റിലായിരുന്നു സോന ഇരുന്നിരുന്നത്. തീപിടിത്തത്തെ തുടർന്ന് കാറിനുള്ളിൽ ഇരുവരും കുടുങ്ങിക്കിടന്നതായി നാട്ടുകാർ പറഞ്ഞു.
സംഭവം കണ്ട നാട്ടുകാർ ഉടൻ രക്ഷാപ്രവർത്തനം ആരംഭിച്ചു. സമീപത്തെ നെൽവയലിൽ നിന്ന് വെള്ളം കോരിയൊഴിച്ചാണ് തീ നിയന്ത്രണവിധേയമാക്കാൻ ശ്രമിച്ചത്. തുടർന്ന് പേരാമ്പ്ര യൂണിറ്റിലെ അഗ്നിരക്ഷാസേനയും സ്ഥലത്തെത്തി രക്ഷാപ്രവർത്തനത്തിൽ പങ്കെടുത്തു.
സോനയെ രക്ഷിക്കാനായില്ല. തീപിടിത്തത്തിന്റെ കാരണം സംബന്ധിച്ച് അന്വേഷണം ആരംഭിച്ചതായി അധികൃതർ അറിയിച്ചു.
