ദുബായ്: ദുബായ് സർക്കാരിന്റെ വിവിധ പൊതുസേവനങ്ങൾ ഒരൊറ്റ ഡിജിറ്റൽ പ്ലാറ്റ്‌ഫോമിലൂടെ കൂടുതൽ എളുപ്പത്തിൽ ലഭ്യമാക്കുന്നതിനുള്ള നടപടികൾ ശക്തമാക്കി. ഇതിന്റെ ഭാഗമായി, 2027 ഫെബ്രുവരി അവസാനത്തോടെ ‘DubaiNow’ ആപ്പിലേക്ക് 180-ലധികം പുതിയ സേവനങ്ങൾ കൂടി ഉൾപ്പെടുത്തുമെന്ന് ഡിജിറ്റൽ ദുബായ് അധികൃതർ അറിയിച്ചു.
സർക്കാർ സേവനങ്ങളെ ഏകീകൃത ഡിജിറ്റൽ സംവിധാനത്തിലേക്ക് മാറ്റാനുള്ള ‘Digital Shared Channels Initiative’ പദ്ധതിയുടെ ഭാഗമായാണ് പുതിയ നീക്കം. സേവനങ്ങൾ വേഗത്തിലും ലളിതമായും ജനങ്ങളിലെത്തിക്കാൻ ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യയും വ്യാപകമായി ഉപയോഗിക്കും.
ഈ ലക്ഷ്യം മുന്നോട്ട് കൊണ്ടുപോകുന്നതിനായി ഡിജിറ്റൽ ദുബായ് വിവിധ സർക്കാർ വകുപ്പുകളുമായി ചേർന്ന് പ്രത്യേക പരിശീലന ക്യാമ്പും സംഘടിപ്പിച്ചു. സർക്കാർ സേവനങ്ങൾ ‘DubaiNow’ ആപ്പിലേക്ക് വേഗത്തിൽ ഏകീകരിക്കുന്നതിനുള്ള നടപടികളാണ് ക്യാമ്പിൽ പ്രധാനമായും ചർച്ച ചെയ്തത്.
Roads and Transport Authority, Dubai Police, Dubai Health Authority, Dubai Culture, Department of Finance തുടങ്ങി നിരവധി സർക്കാർ സ്ഥാപനങ്ങൾ ഈ പദ്ധതിയുടെ അടുത്ത ഘട്ടത്തിൽ സേവനങ്ങൾ ആപ്പിലേക്ക് മാറ്റുന്ന നടപടികൾക്ക് നേതൃത്വം നൽകും. പിന്നാലെ മറ്റ് സർക്കാർ വകുപ്പുകളും പദ്ധതിയിലേക്ക് ഘട്ടംഘട്ടമായി ചേരും.
Digital Dubai Government Establishment സിഇഒയായ Matar Al Hemeiri പറഞ്ഞു: “ദുബായിലെ സർക്കാർ സേവന വിതരണ രംഗത്ത് വലിയ മാറ്റത്തിന് തുടക്കമിടുന്ന പദ്ധതിയാണ് Digital Shared Channels Initiative. ജനങ്ങൾക്ക് കൂടുതൽ വ്യക്തവും ലളിതവുമായ ഡിജിറ്റൽ അനുഭവം നൽകുകയാണ് ലക്ഷ്യം. അതിന് എഐ അധിഷ്ഠിത സംവിധാനങ്ങളും ഉപയോഗപ്പെടുത്തുന്നു.”
ദുബായ് കിരീടാവകാശിയും യു.എ.ഇ ഉപപ്രധാനമന്ത്രിയുമായ Sheikh Hamdan bin Mohammed bin Rashid Al Maktoum നൽകിയ നിർദേശങ്ങളുടെ അടിസ്ഥാനത്തിലാണ് സേവനങ്ങൾ ഏകീകൃത ഡിജിറ്റൽ പ്ലാറ്റ്‌ഫോമിലേക്ക് മാറ്റുന്ന നടപടികൾ വേഗത്തിലാക്കുന്നതെന്നും അദ്ദേഹം വ്യക്തമാക്കി.
‘DubaiNow’ ആപ്പിലൂടെ ഒരു പ്ലാറ്റ്‌ഫോമിൽ നിന്നുതന്നെ വിവിധ സർക്കാർ സേവനങ്ങൾ ലഭ്യമാകുന്നതോടെ പൊതുജനങ്ങൾക്ക് ഓഫീസുകൾ കയറിയിറങ്ങേണ്ട സാഹചര്യം കുറയുകയും സേവനങ്ങൾ കൂടുതൽ വേഗത്തിലും വിശ്വാസ്യതയോടെയും ലഭ്യമാകുകയും ചെയ്യും. ദുബായിയെ ലോകത്തിലെ മികച്ച ഡിജിറ്റൽ സർക്കാർ സംവിധാനങ്ങളിലൊന്നാക്കി മാറ്റുകയെന്ന ലക്ഷ്യത്തിന്റെ ഭാഗമായാണ് ഈ നീക്കമെന്നാണ് അധികൃതർ പറയുന്നത്.
