അബുദാബി: ആഫ്രിക്കൻ രാജ്യങ്ങളിൽ എബോള വൈറസ് വ്യാപനം റിപ്പോർട്ട് ചെയ്യപ്പെടുന്ന സാഹചര്യത്തിൽ യുഎഇ വിദേശകാര്യ മന്ത്രാലയം പൗരന്മാർക്ക് യാത്രാ മുന്നറിയിപ്പ് നൽകി. യുഗാണ്ട, ഡെമോക്രാറ്റിക് റിപ്പബ്ലിക് ഓഫ് കോംഗോ, ദക്ഷിണ സുഡാൻ എന്നീ രാജ്യങ്ങളിലേക്ക് അടിയന്തര ആവശ്യങ്ങൾ ഒഴികെ യാത്ര ചെയ്യുന്നത് ഒഴിവാക്കണമെന്ന് മന്ത്രാലയം നിർദേശിച്ചു.
നിലവിൽ ഈ രാജ്യങ്ങളിൽ കഴിയുന്ന യുഎഇ പൗരന്മാർ ആരോഗ്യ-സുരക്ഷാ നിർദേശങ്ങൾ കർശനമായി പാലിക്കണമെന്നും പ്രാദേശിക ഭരണകൂടങ്ങളുടെ നിർദേശങ്ങൾ പിന്തുടരണമെന്നും മന്ത്രാലയം അറിയിച്ചു. വിദേശത്തുള്ള പൗരന്മാർ മന്ത്രാലയത്തിന്റെ പ്രത്യേക ഡിജിറ്റൽ രജിസ്ട്രേഷൻ സംവിധാനത്തിൽ വിവരങ്ങൾ രേഖപ്പെടുത്തുകയും അടിയന്തര സാഹചര്യങ്ങളിൽ ബന്ധപ്പെട്ട അധികാരികളുമായി ബന്ധപ്പെടുകയും വേണമെന്നും നിർദേശിച്ചിട്ടുണ്ട്.
അതേസമയം, എബോള വൈറസ് വ്യാപനവുമായി ബന്ധപ്പെട്ട ആശങ്കകൾക്കിടയിലും ഏത് സാഹചര്യത്തെയും നേരിടാൻ യുഎഇ സജ്ജമാണെന്ന് ആരോഗ്യ മന്ത്രാലയവും ദേശീയ ദുരന്തനിവാരണ അതോറിറ്റിയും വ്യക്തമാക്കി. രാജ്യത്തെ ആരോഗ്യ നിരീക്ഷണ സംവിധാനങ്ങൾ അന്താരാഷ്ട്ര മാനദണ്ഡങ്ങൾക്കനുസൃതമായി നിരന്തരം വിലയിരുത്തുന്നുണ്ടെന്നും നിലവിൽ ആശങ്കപ്പെടേണ്ട സാഹചര്യമില്ലെന്നും അധികൃതർ അറിയിച്ചു.
ബഹ്‌റൈനിൽ 30 ദിവസത്തെ പ്രവേശന വിലക്ക്
എബോള വൈറസ് വ്യാപനം തടയുന്നതിനുള്ള മുൻകരുതൽ നടപടികളുടെ ഭാഗമായി ബഹ്‌റൈൻ ദക്ഷിണ സുഡാൻ, കോംഗോ, യുഗാണ്ട എന്നീ രാജ്യങ്ങളിൽ നിന്നുള്ള യാത്രക്കാർക്ക് താൽക്കാലിക പ്രവേശന വിലക്ക് ഏർപ്പെടുത്തി. ഈ രാജ്യങ്ങളിൽ നിന്നുള്ള വിദേശ പൗരന്മാർക്ക് 30 ദിവസത്തേക്ക് ബഹ്‌റൈനിലേക്ക് പ്രവേശനം അനുവദിക്കില്ല.
എബോള ഭീഷണിയുടെ പശ്ചാത്തലത്തിൽ ഇത്തരമൊരു നിയന്ത്രണം നടപ്പാക്കുന്ന ആദ്യ ഗൾഫ് രാജ്യമാണ് ബഹ്‌റൈൻ. ആരോഗ്യ സുരക്ഷ ഉറപ്പാക്കുന്നതിനും വൈറസ് രാജ്യത്തേക്ക് പ്രവേശിക്കുന്നത് തടയുന്നതിനുമാണ് ഈ നടപടി സ്വീകരിച്ചതെന്ന് അധികൃതർ അറിയിച്ചു.
ജോർദാനും നിയന്ത്രണം പ്രഖ്യാപിച്ചു
ബഹ്‌റൈന്റെ നടപടിക്ക് പിന്നാലെ ജോർദാനും കോംഗോ, യുഗാണ്ട എന്നീ രാജ്യങ്ങളിൽ നിന്നുള്ള യാത്രക്കാർക്ക് പ്രവേശന നിയന്ത്രണം ഏർപ്പെടുത്തി. രോഗവ്യാപനം തടയുന്നതിനുള്ള പ്രതിരോധ നടപടികളുടെ ഭാഗമായാണ് ഈ തീരുമാനം.
എബോള വൈറസ് വ്യാപനത്തെ തുടർന്ന് വിവിധ രാജ്യങ്ങൾ യാത്രാ നിയന്ത്രണങ്ങളും വിമാനത്താവള പരിശോധനകളും ശക്തമാക്കുന്ന സാഹചര്യത്തിൽ അന്താരാഷ്ട്ര യാത്രക്കാർ യാത്രയ്ക്ക് മുമ്പ് ബന്ധപ്പെട്ട രാജ്യങ്ങളിലെ ഏറ്റവും പുതിയ യാത്രാ മാർഗനിർദേശങ്ങൾ പരിശോധിക്കണമെന്ന് ആരോഗ്യ വിദഗ്ധർ നിർദേശിക്കുന്നു.
