ദുബായ്: വേനൽക്കാല അവധിക്കാലം ആരംഭിച്ചതോടെ കുറഞ്ഞ ചെലവിൽ സ്റ്റേക്കേഷൻ സൗകര്യങ്ങളും ഹോളിഡേ ഹോമുകളും തേടുന്നവരെ ലക്ഷ്യമിട്ട് ഓൺലൈൻ തട്ടിപ്പുകൾ വർധിക്കുന്നതായി ദുബായ് പൊലീസ് മുന്നറിയിപ്പ് നൽകി. സാമൂഹിക മാധ്യമങ്ങളിലൂടെയും വിവിധ വെബ്സൈറ്റുകളിലൂടെയും പ്രചരിക്കുന്ന വ്യാജ ഷാലെറ്റ്, ഹോളിഡേ ഹോം വാടക പരസ്യങ്ങളാണ് പ്രധാനമായും തട്ടിപ്പുകാർ ഉപയോഗിക്കുന്നതെന്ന് അധികൃതർ വ്യക്തമാക്കി.
ഓൺലൈൻ തട്ടിപ്പുകളെക്കുറിച്ച് പൊതുജനങ്ങളിൽ അവബോധം സൃഷ്ടിക്കുന്നതിനായി ദുബായ് പൊലീസ് നടപ്പിലാക്കുന്ന “Be Aware of Fraud” ക്യാംപെയ്നിന്റെ ഭാഗമായാണ് പുതിയ മുന്നറിയിപ്പ് പുറത്തിറക്കിയത്.
വിപണിവിലയേക്കാൾ വളരെ കുറഞ്ഞ നിരക്കിൽ ആകർഷകമായ വാടക ഓഫറുകൾ പരസ്യം ചെയ്ത് ആളുകളെ കുടുക്കുകയാണ് തട്ടിപ്പുകാരുടെ രീതി. പണം കൈമാറിയതിന് ശേഷമാണ് പരസ്യത്തിൽ കാണിച്ചിരുന്ന വസ്തു യഥാർത്ഥത്തിൽ നിലവിലില്ലെന്നോ തെറ്റായ വിവരങ്ങൾ നൽകിയതാണെന്നോ ഇരകൾ തിരിച്ചറിയുന്നത്.
ഇത്തരമൊരു തട്ടിപ്പിൽ അടുത്തിടെ ഒരു കുടുംബത്തിന്റെ ഉപജീവനമാർഗമായ വ്യക്തിക്ക് 8,000 ദിർഹം നഷ്ടമായതായി ദുബായ് പൊലീസ് അറിയിച്ചു. സാമൂഹിക മാധ്യമത്തിൽ കണ്ട ആകർഷകമായ ഷാലെറ്റ് വാടക പരസ്യത്തെ തുടർന്നാണ് ഇയാൾ പരസ്യദാതാവിനെ സമീപിച്ചത്. ബുക്കിംഗ് തുകയും പിന്നീട് തിരികെ ലഭിക്കുമെന്ന പേരിൽ ഇൻഷുറൻസ് ഫീസും അടയ്ക്കാൻ ആവശ്യപ്പെട്ടതിനെ തുടർന്ന് ഇയാൾ 8,000 ദിർഹം കൈമാറുകയായിരുന്നു.
പണം ലഭിച്ചതിന് പിന്നാലെ തട്ടിപ്പുകാരൻ ഫോൺ ഓഫ് ചെയ്യുകയും എല്ലാ ആശയവിനിമയ മാർഗങ്ങളും അവസാനിപ്പിക്കുകയും ചെയ്തു. ഇതോടെ നഷ്ടപ്പെട്ട തുക തിരിച്ചുപിടിക്കാൻ സാധിക്കാതെ വന്നു.
ഇത് ഒറ്റപ്പെട്ട സംഭവമല്ലെന്നും സമാന രീതിയിലുള്ള നിരവധി പരാതികൾ ലഭിച്ചിട്ടുണ്ടെന്നും പൊലീസ് അറിയിച്ചു. യഥാർത്ഥ ഷാലെറ്റുകളുടെയും ഹോളിഡേ ഹോമുകളുടെയും പ്രൊഫഷണൽ ചിത്രങ്ങളും വിവരങ്ങളും മോഷ്ടിച്ച് കുറഞ്ഞ നിരക്കിൽ വീണ്ടും ഓൺലൈനിൽ പ്രസിദ്ധീകരിച്ചാണ് തട്ടിപ്പുകാർ ആളുകളെ ആകർഷിക്കുന്നത്.
ബുക്കിംഗ് അഡ്വാൻസ്, ഡോക്യുമെന്റ് ചാർജ്, റിസർവേഷൻ ഫീസ്, തിരികെ ലഭിക്കുമെന്ന പേരിലുള്ള ഇൻഷുറൻസ് തുക തുടങ്ങിയ വിവിധ കാരണങ്ങൾ ചൂണ്ടിക്കാട്ടി മുൻകൂർ പണം ആവശ്യപ്പെടുന്നതാണ് ഇവരുടെ പ്രധാന തന്ത്രം. പലപ്പോഴും വസ്തു നേരിട്ട് കാണുന്നതിന് മുമ്പോ ഔദ്യോഗിക കരാർ ഒപ്പിടുന്നതിന് മുമ്പോ തന്നെ പണം അടയ്ക്കാൻ സമ്മർദം ചെലുത്താറുണ്ട്.
പരസ്യപ്പെടുത്തിയ വസ്തു യഥാർത്ഥത്തിൽ ഇല്ലാത്തതാണെന്നോ അല്ലെങ്കിൽ അതിന്റെ യഥാർത്ഥ ഉടമയ്ക്ക് തട്ടിപ്പുമായി യാതൊരു ബന്ധവുമില്ലെന്നോ പിന്നീട് ഇരകൾ തിരിച്ചറിയുന്നു. അതേസമയം, തട്ടിപ്പുകാർ അക്കൗണ്ടുകൾ ഇല്ലാതാക്കുകയും ആശയവിനിമയ മാർഗങ്ങൾ അടച്ചുപൂട്ടുകയും ചെയ്ത് പണവുമായി കടന്നുകളയുന്നു.
വസ്തുവിന്റെ സ്ഥാനം, സൗകര്യങ്ങൾ, വിപണി മൂല്യം എന്നിവയുമായി താരതമ്യം ചെയ്യുമ്പോൾ അസാധാരണമായി കുറഞ്ഞ വാടക നിരക്ക് കാണുന്നത് പ്രധാന മുന്നറിയിപ്പ് സൂചനയാണെന്ന് ദുബായ് പൊലീസ് ചൂണ്ടിക്കാട്ടി. വിലക്കുറവിന്റെ ആകർഷണം മുതലെടുത്ത് ആളുകളെ വേഗത്തിൽ തീരുമാനമെടുക്കാൻ പ്രേരിപ്പിക്കുകയാണ് തട്ടിപ്പുകാരുടെ ലക്ഷ്യമെന്നും അധികൃതർ പറഞ്ഞു.
വാടകയ്ക്ക് താമസസൗകര്യങ്ങൾ ബുക്ക് ചെയ്യുമ്പോൾ വ്യക്തിപരമായി സ്ഥലം സന്ദർശിച്ച് പരിശോധന നടത്തുകയും അത് യഥാർത്ഥമാണെന്ന് ഉറപ്പുവരുത്തുകയും ചെയ്ത ശേഷമേ പണം കൈമാറാവൂ എന്ന് പൊലീസ് നിർദേശിച്ചു. വിദേശരാജ്യങ്ങളിലെ താമസസൗകര്യങ്ങൾ ബുക്ക് ചെയ്യുമ്പോൾ സേവനം നൽകുന്ന കമ്പനിയുടെയോ വ്യക്തിയുടെയോ വിശ്വാസ്യത പരിശോധിക്കണമെന്നും അധികൃതർ ആവശ്യപ്പെട്ടു.
വസ്തുവിന്റെ ഉടമസ്ഥാവകാശം, കരാറുകളുടെ ആധികാരികത, രേഖകളുടെ സാധുത എന്നിവ ഉറപ്പുവരുത്തുകയും ഔദ്യോഗികവും അംഗീകൃതവുമായ മാർഗങ്ങളിലൂടെ മാത്രം ഇടപാടുകൾ നടത്തുകയും വേണം. വ്യക്തിഗത അല്ലെങ്കിൽ പരിചയമില്ലാത്ത ബാങ്ക് അക്കൗണ്ടുകളിലേക്ക് പണം അയക്കരുതെന്നും മുന്നറിയിപ്പിൽ പറയുന്നു.
സംശയാസ്പദമായ വെബ്സൈറ്റുകളെയോ തട്ടിപ്പ് ശ്രമങ്ങളെയോ കുറിച്ച് ഉടൻ തന്നെ ബന്ധപ്പെട്ട അധികാരികളെ അറിയിക്കണമെന്നും ദുബായ് പൊലീസ് അഭ്യർഥിച്ചു. അവധിക്കാലങ്ങളിൽ ഇത്തരം തട്ടിപ്പുകൾ കൂടുതൽ സജീവമാകുന്നതിനാൽ ജാഗ്രതയും മുൻകരുതലും മാത്രമാണ് സാമ്പത്തിക നഷ്ടങ്ങൾ ഒഴിവാക്കാനുള്ള പ്രധാന മാർഗമെന്നും അധികൃതർ ഓർമ്മിപ്പിച്ചു.
