പ്രകൃതിയോടിണങ്ങിയ മാതൃകകളുമായി കെജി തലം മുതൽ ഹയർ സെക്കൻഡറി വരെയുള്ള വിദ്യാർത്ഥികൾ; സന്ദർശകരായി യുഎഇയിലെ വിവിധ വിദ്യാലയങ്ങൾ.
ദുബായ്: ഗണിതശാസ്ത്രവും കലയും പ്രകൃതിയുമായി സമന്വയിപ്പിച്ച് ഷാർജ ഇന്ത്യ ഇൻ്റർനാഷണൽ സ്കൂളിൽ സംഘടിപ്പിച്ച “മാത് ഒ ആർട്ട്” ഗണിതശാസ്ത്ര പ്രദർശനം ശ്രദ്ധേയമായി. സ്കൂളിലെ കെജി തലം മുതൽ ഹയർ സെക്കൻഡറി വരെയുള്ള വിദ്യാർത്ഥികൾ ഒരുക്കിയ വൈവിധ്യമാർന്ന ഗണിത-കലാ ആവിഷ്കാരങ്ങൾ കാണാൻ യുഎഇയിലെ വിവിധ വിദ്യാലയങ്ങളിൽ നിന്നുള്ള നൂറുകണക്കിന് അധ്യാപകരും വിദ്യാർത്ഥികളുമാണ് ക്യാമ്പസിലെത്തിയത്.
ഗണിതം കേവലം അക്കങ്ങൾ മാത്രമല്ലെന്നും, അത് പ്രകൃതിയോടും സമൂഹത്തോടും യഥാർത്ഥ ജീവിതത്തോടും എത്രത്തോളം ചേർന്നുനിൽക്കുന്നുവെന്നും അടയാളപ്പെടുത്തുന്നതായിരുന്നു വിദ്യാർത്ഥികളുടെ ഭാവനയിൽ വിരിഞ്ഞ ഓരോ മാതൃകകളും. പ്രകൃതിക്കും പരിസ്ഥിതിക്കും ഇണങ്ങുന്ന രീതിയിൽ മനുഷ്യജീവിതം കൂടുതൽ ക്രിയാത്മകമായി എങ്ങനെ രൂപപ്പെടുത്താം എന്ന സന്ദേശവും ഈ പ്രദർശനം മുന്നോട്ടുവെച്ചു. വിദ്യാർത്ഥികളുടെ കഠിനാധ്വാനവും വൈവിധ്യമാർന്ന ചിന്തകളും പ്രകടമാക്കുന്നതായിരുന്നു പ്രദർശനത്തിലെ ഓരോ സ്റ്റാളുകളും.
ഇന്ത്യ ഇൻ്റർനാഷണൽ സ്കൂൾ പ്രിൻസിപ്പാൾ ഡോ. മജ്ഞു റെജി പ്രദർശനത്തിൻ്റെ ഔദ്യോഗിക ഉദ്ഘാടനം നിർവ്വഹിച്ചു. വിദ്യാർത്ഥികളുടെ സർഗ്ഗാത്മകതയെയും ശാസ്ത്രീയ അഭിരുചിയെയും അവർ അഭിനന്ദിച്ചു. ചടങ്ങിൽ പെയ്‌സ് (PACE) ഗ്രൂപ്പ് മാനേജിംഗ് ഡയറക്ടർ സൽമാൻ ഇബ്രാഹിം, സീനിയർ ഡയറക്ടർ ആസിഫ് മുഹമ്മദ് എന്നിവർ വിദ്യാർത്ഥികൾക്ക് ആശംസകൾ നേർന്നു സംസാരിച്ചു.
വിപുലമായ രീതിയിൽ സംഘടിപ്പിച്ച ഈ ഗണിതശാസ്ത്ര മേളയുടെ വിജയത്തിന് അസിസ്റ്റൻ്റ് ഡയറക്ടർ സഹാ ആസാദ്, വൈസ് പ്രിൻസിപ്പാൾ ഷിഫാന മുഈസ് എന്നിവർ പൂർണ്ണ പിന്തുണയുമായി ഒപ്പമുണ്ടായിരുന്നു. അധ്യാപകരായ ഫർഹാൻ, ഇസ്സുദ്ദിൻ, സതീശൻ എന്നിവരുടെ നേതൃത്വത്തിലാണ് ഈ വൻ പ്രദർശനം അണിയറയിൽ ഒരുങ്ങിയത്.
ആധുനിക വിദ്യാഭ്യാസ രംഗത്ത് ശാസ്ത്ര-ഗണിത പഠനങ്ങളെ കലയുമായി ബന്ധിപ്പിച്ചുള്ള ‘സ്റ്റീം’ (STEAM) രീതിക്ക് വലിയ പ്രാധാന്യമാണ് ലഭിച്ചുകൊണ്ടിരിക്കുന്നത്. യുഎഇയിലെ പ്രവാസി വിദ്യാർത്ഥികൾക്കിടയിൽ യുക്തിചിന്തയും പരിസ്ഥിതിബോധവും വളർത്താൻ ഇത്തരം വിപുലമായ സ്കൂൾ പ്രദർശനങ്ങൾ വലിയ പങ്കുവഹിക്കുന്നുണ്ട്.
