അബുദാബി: അബുദാബി, ദുബായ്, ഷാർജ എന്നിവിടങ്ങളിലെ ടൈംസ് എജ്യുക്കേഷൻ ശാഖകളിൽ നിന്ന് ബിരുദ പഠനം പൂർത്തിയാക്കിയ വിദ്യാർഥികളുടെ അക്കാദമിക് നേട്ടങ്ങൾ ആഘോഷിച്ച് കോൺവൊക്കേഷൻ 2026 സംഘടിപ്പിച്ചു. നവംബർ എട്ടിന് അബുദാബിയിലെ ഷെറാട്ടൺ ഹോട്ടലിലായിരുന്നു ചടങ്ങ്.


2026 ബാച്ചിലെ വിദ്യാർഥികളുടെ കഠിനാധ്വാനവും സമർപ്പണവും നേട്ടങ്ങളും അംഗീകരിക്കുന്ന ചടങ്ങിൽ ബിരുദധാരികൾ, കുടുംബാംഗങ്ങൾ, പ്രമുഖ വ്യക്തികൾ, വ്യവസായ രംഗത്തെ പ്രതിനിധികൾ, വിദ്യാഭ്യാസ മേഖലയിലെ പ്രമുഖർ എന്നിവർ പങ്കെടുത്തു.
ലിങ്കൺ യൂണിവേഴ്സിറ്റി മലേഷ്യ ചാൻസലറും ഡയറക്ടറുമായ ഡോ. അമിയ ഭൗമിക്, ലുലു ഗ്രൂപ്പ് ഇന്റർനാഷണൽ ഡയറക്ടർ ഓഫ് ഗ്ലോബൽ മാർക്കറ്റിങ് വി. നന്ദകുമാർ, ഇന്ത്യൻ നടനും ടെലിവിഷൻ അവതാരകനും റേഡിയോ ജോക്കിയുമായ മിഥുൻ രമേഷ്, ഓസ്ട്രേലിയയിലെ സിഡ്നിയിലുള്ള ലിങ്കൺ ഹയർ എജ്യുക്കേഷൻ ഇൻസ്റ്റിറ്റ്യൂട്ടിലെ സരോജ് ഗിമിറെ, അബുദാബി പൊലീസ് സെക്യൂരിറ്റി വിഭാഗം മേധാവി ആദിൽ സൈഫ് അമർ ഹസൻ എന്നിവർ ചടങ്ങിൽ വിശിഷ്ടാതിഥികളായി പങ്കെടുത്തു.



ടൈംസ് എജ്യുക്കേഷൻ മാനേജിങ് ഡയറക്ടർ ഡോ. സമീന ഹസീബിന്റെയും ചീഫ് എക്സിക്യൂട്ടീവ് ഓഫീസർ ഹസീബ് കെ. മജീദിന്റെയും നേതൃത്വത്തിലായിരുന്നു ചടങ്ങ്.
ഉന്നത വിദ്യാഭ്യാസത്തിന്റെ പ്രാധാന്യം, തുടർച്ചയായ പഠനം, തൊഴിൽപരമായ വളർച്ച എന്നിവ ഭാവിയിലെ നേതാക്കളെ വാർത്തെടുക്കുന്നതിൽ നിർണായകമാണെന്ന് വിശിഷ്ടാതിഥികൾ അഭിപ്രായപ്പെട്ടു. ബിരുദധാരികൾക്ക് ആശംസകൾ നേർന്നതിനൊപ്പം വിദ്യാർഥികളുടെ പഠനയാത്രയിൽ പിന്തുണ നൽകിയ രക്ഷിതാക്കൾ, അധ്യാപകർ, അക്കാദമിക് പങ്കാളികൾ, ജീവനക്കാർ എന്നിവരെയും ടൈംസ് എജ്യുക്കേഷൻ മാനേജ്മെന്റ് അഭിനന്ദിച്ചു.



യുഎഇയിലെ വിവിധ എമിറേറ്റുകളിലുള്ള വിദ്യാർഥികൾക്ക് മികച്ച വിദ്യാഭ്യാസ അവസരങ്ങൾ ഒരുക്കുന്നതിനും അവരുടെ അക്കാദമിക്, തൊഴിൽ ലക്ഷ്യങ്ങൾ കൈവരിക്കാൻ പിന്തുണ നൽകുന്നതിനുമുള്ള ടൈംസ് എജ്യുക്കേഷന്റെ പ്രവർത്തനങ്ങളിലെ മറ്റൊരു സുപ്രധാന നാഴികക്കല്ലായി കോൺവൊക്കേഷൻ 2026 മാറി.











