ദുബായ്: വിവാഹത്തിന് ഒരുങ്ങുന്ന യുഎഇ സ്വദേശികളായ യുവതീയുവാക്കൾക്ക് കൂടുതൽ ആനുകൂല്യങ്ങൾ ലഭ്യമാക്കുന്നതിനായി ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സ് (ജി.ഡി.ആർ.എഫ്.എ) ദുബായ് കമ്മ്യൂണിറ്റി ഡെവലപ്മെന്റ് അതോറിറ്റിയുമായി (സി.ഡി.എ) ഒരു ധാരണാപത്രത്തിൽ ഒപ്പുവെച്ചു. ഷെയ്ഖ ഹിന്ദ് ബിന്ത് മക്തൂം ഫാമിലി പ്രോഗ്രാമിന് കീഴിലുള്ള ‘ദുബായ് വെഡ്ഡിംഗ്സ്’ പദ്ധതിയുടെ ഗുണഭോക്താക്കൾക്ക് ജി.ഡി.ആർ.എഫ്.എയുടെ ‘ഹാപ്പിനസ് കാർഡ്’ സൗജന്യമായി നൽകുന്നതാണ് കരാറിന്റെ പ്രധാന ലക്ഷ്യം.
‘ഇയർ ഓഫ് ദ ഫാമിലി’യുടെ ഭാഗമായി എമിറാത്തി കുടുംബങ്ങളുടെ സ്ഥിരതയും ജീവിതനിലവാരവും ഉയർത്തുന്നതിനാണ് ഈ സംയുക്ത സംരംഭം നടപ്പാക്കുന്നത്. ദുബായ് സോഷ്യൽ അജണ്ട 33-ന്റെ ലക്ഷ്യങ്ങൾ കൈവരിക്കുന്നതിനും കുടുംബശാക്തീകരണത്തിനും ഈ സഹകരണം സഹായകമാകും.
ജനറൽ ഡയറക്ടറേറ്റിന്റെ ഹെഡ് കോർട്ടേഴ്സിൽ നടന്ന ചടങ്ങിൽ ജി.ഡി.ആർ.എഫ്.എ ദുബായ് മേധാവി ലഫ് :ജനറൽ മുഹമ്മദ് അൽ മർറിയും സി.ഡി.എ ഡയറക്ടർ ജനറൽ ഹെസ്സ ബിന്ത് ഈസ ബുഹുമൈദും ഇത് സംബന്ധിച്ചുള്ള ധാരണ പത്രത്തിൽ ഒപ്പുവച്ചു.സി.ഡി.എയുടെ സോഷ്യൽ ഡെവലപ്മെന്റ് സെക്ടർ എക്സിക്യൂട്ടീവ് ഡയറക്ടർ ഷെയ്ഖ അഹമ്മദ് അബ്ദുൽറഹ്മാൻ അൽ ജർമാനും ഇരുസ്ഥാപനങ്ങളിലെയും മുതിർന്ന ഉദ്യോഗസ്ഥരും പരിപാടിയിൽ സംബന്ധിച്ചു
കരാർ പ്രകാരം ‘ദുബായ് വെഡ്ഡിംഗ്സ്’ പദ്ധതിയുടെ ഗുണഭോക്താക്കൾക്ക് ഹാപ്പിനസ് കാർഡ് സൗജന്യമായി ലഭിക്കും. ഇതിലൂടെ വിവിധ സ്ഥാപനങ്ങളിൽ നിന്ന് പ്രത്യേക ഓഫറുകളും വിലക്കിഴിവുകളും മറ്റ് ആനുകൂല്യങ്ങളും ലഭ്യമാകും. കാർഡിന്റെ സേവനങ്ങളും ഉപയോഗ രീതിയും ഗുണഭോക്താക്കളെ പരിചയപ്പെടുത്തുന്നതിനായി ബോധവത്കരണ പരിപാടികളും സംഘടിപ്പിക്കും.സർക്കാർ സ്ഥാപനങ്ങൾ തമ്മിലുള്ള സഹകരണം സാധാരണ സേവനങ്ങളിൽ ഒതുങ്ങുന്നതല്ലെന്നും ജനങ്ങളുടെ ജീവിതത്തിൽ യഥാർഥ മാറ്റം സൃഷ്ടിക്കുന്ന സംയോജിത പദ്ധതികൾ രൂപപ്പെടുത്താനുള്ള വേദിയാണിതെന്നും ലഫ്: ജനറൽ മുഹമ്മദ് അൽ മർറി പറഞ്ഞു. വിവാഹ ജീവിതത്തിന് തുടക്കമിടുന്ന സ്വദേശി യുവജനങ്ങൾക്ക് പ്രയോജനകരമായ ആനുകൂല്യങ്ങൾ നൽകുന്നതിലൂടെ കുടുംബസ്ഥിരത ശക്തിപ്പെടുത്തുകയാണ് ഈ പങ്കാളിത്തത്തിന്റെ ലക്ഷ്യമെന്നും അദ്ദേഹം വ്യക്തമാക്കി.
യു എ ഇ സ്വദേശി- കുടുംബങ്ങളുടെ സ്ഥിരത ഉറപ്പാക്കാനും വിവാഹത്തിന് ഒരുങ്ങുന്ന യുവജനങ്ങൾക്ക് കൂടുതൽ പിന്തുണ നൽകാനും സർക്കാർ സ്ഥാപനങ്ങളുടെ സംയോജിത പ്രവർത്തനം അനിവാര്യമാണെന്ന് സി.ഡി.എ ഡയറക്ടർ ജനറൽ ഹെസ്സ ബിന്ത് ഈസ ബുഹുമൈദ് പറഞ്ഞു. വിവാഹത്തിന് തയ്യാറെടുക്കുന്ന പൗരന്മാർക്ക് ലഭിക്കുന്ന ആനുകൂല്യങ്ങളുടെ വ്യാപ്തി വർധിപ്പിക്കുന്നതിൽ ഈ പങ്കാളിത്തം നിർണായകമാകുമെന്നും അവർ കൂട്ടിച്ചേർത്തു.ധാരണാപത്രം ഒപ്പുവെച്ച ചടങ്ങിൽ, അന്നേദിവസം വിവാഹിതരായ രണ്ട് എമിറാത്തി ദമ്പതികൾക്ക് ഹാപ്പിനസ് കാർഡ് കൈമാറി.
എമിറാത്തി കുടുംബങ്ങളുടെ ക്ഷേമം ശക്തിപ്പെടുത്തുകയും ജനകീയ സേവനങ്ങളുടെ വ്യാപ്തി വർധിപ്പിക്കുകയും ദുബായെ ജീവിതനിലവാരത്തിലും സാമൂഹിക വികസനത്തിലും ലോകത്തിന് മാതൃകയാക്കുകയും ചെയ്യുന്നതിന് ഈ പങ്കാളിത്തം കൂടുതൽ കരുത്തേകുമെന്ന് അധികൃതർ അറിയിച്ചു.
