തിങ്കൾ മുതൽ ബുധൻ വരെ വരും ദിവസങ്ങളിൽ മഴ ശക്തമായേക്കാമെന്ന് ദേശീയ കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്
ദുബായ്, ഓഗസ്റ്റ് 15, 2026:യുഎഇയിലെ വടക്കൻ, കിഴക്കൻ പ്രദേശങ്ങളിൽ ഞായറാഴ്ച ചാറ്റൽമഴയ്ക്ക് സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം (NCM) അറിയിച്ചു. രാജ്യത്തുടനീളം താപനിലയും ആർദ്രതയും ഉയർന്ന നിലയിൽ തുടരുമെങ്കിലും ചിലയിടങ്ങളിൽ അന്തരീക്ഷം മേഘാവൃതമായിരിക്കും.
ശനിയാഴ്ച രാജ്യത്ത് പൊതുവെ വരണ്ട കാലാവസ്ഥയായിരിക്കും അനുഭവപ്പെടുക. ഉൾനാടൻ പ്രദേശങ്ങളിൽ താപനില 49 ഡിഗ്രി സെൽഷ്യസ് വരെ ഉയർന്നേക്കാം. തീരദേശ മേഖലകളിൽ 40 മുതൽ 45 ഡിഗ്രി സെൽഷ്യസ് വരെയും മലയോര മേഖലകളിൽ 32 മുതൽ 38 ഡിഗ്രി സെൽഷ്യസ് വരെയുമായിരിക്കും ചൂട്. ശനിയാഴ്ച രാത്രിയിലും ഞായറാഴ്ച പുലർച്ചെയും തീരദേശങ്ങളിൽ മൂടൽമഞ്ഞിന് സാധ്യതയുണ്ട്.
ഞായറാഴ്ച ഉച്ചയ്ക്ക് ശേഷം വടക്കൻ, കിഴക്കൻ പ്രദേശങ്ങളിൽ ഭാഗികമായി മേഘാവൃതമായ അന്തരീക്ഷവും ചെറിയ രീതിയിലുള്ള മഴയും പ്രതീക്ഷിക്കാം. മണിക്കൂറിൽ 30 കിലോമീറ്റർ വരെ വേഗതയിൽ കാറ്റ് വീശാനും സാധ്യതയുണ്ട്.
എന്നാൽ തിങ്കളാഴ്ച മുതൽ കാലാവസ്ഥയിൽ കൂടുതൽ മാറ്റങ്ങൾ പ്രകടമാകും. കിഴക്കൻ, തെക്കൻ മേഖലകളിൽ അന്തരീക്ഷത്തിൽ ശക്തമായ കാർമേഘങ്ങൾ (Convective clouds) രൂപപ്പെടുകയും തിങ്കൾ മുതൽ ബുധൻ വരെ മഴയ്ക്ക് സാധ്യത വർധിക്കുകയും ചെയ്യും. ഇതോടൊപ്പം മണിക്കൂറിൽ 40 കിലോമീറ്റർ വേഗതയിൽ വീശിയടിക്കുന്ന കാറ്റ് പൊടിക്കാറ്റിനും കാരണമായേക്കാം.
പരമ്പരാഗതമായി വേനൽക്കാലത്തിന്റെ ഏറ്റവും ഉയർന്ന ഘട്ടമായ ‘അൽ ഖൈസ്’ (Al Qayz) കാലയളവിന്റെ അവസാന ഘട്ടത്തിലൂടെയാണ് യുഎഇ ഇപ്പോൾ കടന്നുപോകുന്നത്. ഓഗസ്റ്റ് 11-ന് ആരംഭിച്ച ‘മരാഖിയാത്ത് അൽ ഖലാഇദ്’ സെപ്റ്റംബർ 3 വരെ തുടരുമെന്ന് എമിറേറ്റ്സ് അസ്ട്രോണമി സൊസൈറ്റി ചെയർമാൻ ഇബ്രാഹിം അൽ ജർവാൻ വ്യക്തമാക്കി. ഓഗസ്റ്റ് 24-ഓടെ ‘സുഹൈൽ’ നക്ഷത്രം മാനത്ത് ദൃശ്യമാകുന്നതോടെ കടുത്ത ചൂടിന് ശമനമുണ്ടാകുമെന്നാണ് വിലയിരുത്തൽ.
