ആനിമേഷൻ, കോമിക്സ് രംഗത്തെ അന്താരാഷ്ട്ര പ്രമുഖർ പങ്കെടുക്കുന്ന നാലാം പതിപ്പിൽ പുതിയ മാർക്കറ്റ് പ്ലാറ്റ്ഫോമും
ഷാർജ, യു.എ.ഇ — ഓഗസ്റ്റ് 27, 2026:ഷാർജ ആനിമേഷൻ ആൻഡ് കോമിക്സ് കോൺഫറൻസിന്റെ (SACC) നാലാമത് പതിപ്പ് ഒക്ടോബർ 22 മുതൽ 25 വരെ ഷാർജയിലെ അൽ ജാദയിൽ നടക്കുമെന്ന് ഷാർജ ബുക്ക് അതോറിറ്റി അറിയിച്ചു.
ആനിമേഷൻ, കോമിക്സ്, ചിത്രകല, പ്രസാധനം എന്നീ മേഖലകളെ ഒറ്റ പ്ലാറ്റ്ഫോമിൽ കോർത്തിണക്കിയാണ് ഇത്തവണത്തെ പരിപാടി സംഘടിപ്പിക്കുന്നത്. നാല് ദിവസം നീണ്ടുനിൽക്കുന്ന കോൺഫറൻസിൽ പ്രസാധകർ, എഴുത്തുകാർ, ആനിമേറ്റർമാർ, ചിത്രകാരന്മാർ എന്നിവർക്ക് അന്താരാഷ്ട്ര വിദഗ്ധരുമായി ആശയവിനിമയം നടത്താനും സഹകരിച്ച് പ്രവർത്തിക്കാനും അവസരമൊരുക്കും.
വ്യവസായ ബന്ധങ്ങൾ ശക്തിപ്പെടുത്തുന്നതിനായി ‘ആനിമേഷൻ ആൻഡ് കോമിക്സ് മാർക്കറ്റ്’ എന്ന പ്രത്യേക ബിസിനസ് പ്ലാറ്റ്ഫോമും ഇത്തവണ പുതുതായി ഉൾപ്പെടുത്തിയിട്ടുണ്ട്. പ്രാദേശിക സൃഷ്ടികളെ ആഗോള വിപണിയിലേക്ക് എത്തിക്കുകയാണ് ഇതിന്റെ പ്രധാന ലക്ഷ്യം.
അറബ് മേഖലയിലെ സർഗ്ഗാത്മക കഴിവുകളെ അന്താരാഷ്ട്ര തലത്തിലേക്ക് ഉയർത്താനാണ് ഈ സംരംഭത്തിലൂടെ ലക്ഷ്യമിടുന്നതെന്ന് ഷാർജ ബുക്ക് അതോറിറ്റി സി.ഇ.ഒ അഹമ്മദ് ബിൻ റക്കാദ് അൽ ആമേരി പറഞ്ഞു. സ്വന്തം സംസ്കാരത്തിൽ അധിഷ്ഠിതമായ കഥകളും കഥാപാത്രങ്ങളും സൃഷ്ടിക്കാൻ പ്രാപ്തിയുള്ള കലാകാരന്മാർ മേഖലയിലുണ്ടെന്നും, അവരെ ഉൽപ്പാദന-വിപണന മേഖലകളുമായി ബന്ധിപ്പിക്കുകയാണ് അതോറിറ്റി ചെയ്യുന്നതെന്നും അദ്ദേഹം വ്യക്തമാക്കി.
2025 മേയിൽ നടന്ന കോൺഫറൻസിന്റെ മൂന്നാം പതിപ്പിൽ 5,000-ത്തിലധികം സന്ദർശകരും എഴുപതിലധികം അന്താരാഷ്ട്ര വിദഗ്ധരും പങ്കെടുത്തിരുന്നു.
ഇത്തവണത്തെ പതിപ്പിൽ പ്രായോഗിക പരിശീലന കളരികൾ, പാനൽ ചർച്ചകൾ, ആനിമേഷൻ പ്രദർശനങ്ങൾ, ഫോറങ്ങൾ എന്നിവ ഉണ്ടായിരിക്കുമെന്ന് കോൺഫറൻസ് എക്സിക്യൂട്ടീവ് ഡയറക്ടർ ഖൗല അൽ മുജൈനി വ്യക്തമാക്കി. കലാകാരന്മാർക്ക് അവരുടെ പ്രോജക്റ്റുകൾ വിപണിയിൽ അവതരിപ്പിക്കാനും പ്രൊഫഷണൽ ശൃംഖല വികസിപ്പിക്കാനും ഇത് സഹായകരമാകുമെന്നും അവർ കൂട്ടിച്ചേർത്തു.
ഷാർജ ബുക്ക് അതോറിറ്റി അധ്യക്ഷ ഷെയ്ഖ ബദൂർ ബിന്ത് സുൽത്താൻ അൽ ഖാസിമിയുടെ മാർഗ്ഗനിർദേശപ്രകാരം മിഡിൽ ഈസ്റ്റിലെ സാംസ്കാരിക-സർഗ്ഗാത്മക വ്യവസായ മേഖലയെ ശക്തിപ്പെടുത്തുന്നതിന്റെ ഭാഗമായാണ് കോൺഫറൻസ് സംഘടിപ്പിക്കുന്നത്.
