ദുബൈ കെ.എം.സി.സി കാസർഗോഡ് ജില്ലാ കമ്മിറ്റിയുടെ ‘മദ്ഹേ മദീന’ റബീഹ് കോൺഫറൻസിൽ പ്രമുഖ പണ്ഡിതൻ പ്രഭാഷണം നടത്തി.
ദുബൈ, യു.എ.ഇ:പ്രവാചകൻ മുഹമ്മദ് നബിയുടെ ജീവിതചര്യയും സേവന മാതൃകയും ഓരോ പൊതുപ്രവർത്തകനും വഴികാട്ടിയാകണമെന്ന് പ്രമുഖ പ്രഭാഷകനും ഇസ്ലാമിക പണ്ഡിതനുമായ സിംസാറുൽ ഹഖ് ഹുദവി പ്രസ്താവിച്ചു. ദുബൈ കെ.എം.സി.സി കാസർഗോഡ് ജില്ലാ കമ്മിറ്റി അബുഹൈൽ പി.എ. ഇബ്രാഹിം ഹാജി ഓഡിറ്റോറിയത്തിൽ സംഘടിപ്പിച്ച ‘മദ്ഹേ മദീന റബീഹ് കോൺഫറൻസിൽ’ മുഖ്യപ്രഭാഷണം നടത്തുകയായിരുന്നു അദ്ദേഹം.
സമൂഹത്തിന്റെ താഴെത്തട്ടിലുള്ളവരുടെ പ്രയാസങ്ങൾ കണ്ടറിഞ്ഞ് സഹായിക്കാനും സത്യസന്ധതയോടെ ജനസേവനം നടത്താനും പൊതുപ്രവർത്തകർ മുന്നോട്ടുവരണമെന്ന് ഹുദവി ആഹ്വാനം ചെയ്തു. സ്നേഹം, സഹനം, കാരുണ്യം, വിനയം എന്നിവ മുൻനിർത്തിയുള്ള പ്രവാചക മാതൃക വ്യക്തിജീവിതത്തിലും കുടുംബത്തിലും സമൂഹത്തിലും സമാധാനം കൊണ്ടുവരുമെന്നും അദ്ദേഹം കൂട്ടിച്ചേർത്തു.
മൗലിദ് ആഘോഷങ്ങളും നബിദിന പരിപാടികളും വെറും ചടങ്ങുകളായി മാറാതെ പ്രവാചക ചര്യയെ അടുത്തറിയാനും ജീവിതത്തിൽ പകർത്താനുമുള്ള അവസരങ്ങളാക്കി മാറ്റണമെന്ന് അദ്ദേഹം ഓർമ്മിപ്പിച്ചു. കുടുംബബന്ധങ്ങൾ ദൃഢമാക്കുന്നതിനും മാതാപിതാക്കളെ ആദരിക്കുന്നതിനും അയൽവാസികളോട് കാരുണ്യം കാണിക്കുന്നതിനും പ്രവാചകൻ കാണിച്ചുതന്ന പാത വിശ്വാസികൾ പിന്തുടരണമെന്നും അദ്ദേഹം വിശദീകരിച്ചു.
ദുബൈ കെ.എം.സി.സി കാസർഗോഡ് ജില്ലാ കമ്മിറ്റി പ്രസിഡന്റ് സലാം കന്യപ്പാടി ചടങ്ങിൽ അധ്യക്ഷത വഹിച്ചു. ജില്ലാ ആക്ടിംഗ് സെക്രട്ടറി അഷ്റഫ് ബായാർ സ്വാഗതവും ദുബൈ കെ.എം.സി.സി ആക്ടിംഗ് സെക്രട്ടറി അഫ്സൽ മെത്തമ്മൽ ഉദ്ഘാടനവും നിർവഹിച്ചു.
ചടങ്ങിൽ സിംസാറുൽ ഹഖ് ഹുദവിയെ ദുബൈ കെ.എം.സി.സി സംസ്ഥാന സെക്രട്ടറി അഡ്വ. ഇബ്രാഹിം ഖലീൽ പൊന്നാട അണിയിച്ച് ആദരിച്ചു. ജില്ലാ കമ്മിറ്റിയുടെ ഉപഹാരം ഡോ. അബൂബക്കർ കുറ്റിക്കോൽ സമ്മാനിച്ചു. കെ.പി.എ. സലാം, റയീസ് തലശ്ശേരി, അഹമ്മദ് ബിച്ചി കോഴിക്കോട്, ഹനീഫ് ചെർക്കള, അഷ്റഫ് കൊടുങ്ങല്ലൂർ, ഹസൻ ചാലിൽ, സ്പിക് അബ്ദുല്ല, സലാം ഹാജി വെൽഫിറ്റ് തുടങ്ങിയ പ്രമുഖർ പങ്കെടുത്തു.
ദുബൈ എസ്.കെ.എസ്.എസ്.എഫ് കാസർഗോഡ് ജില്ലാ കമ്മിറ്റിയുടെ നേതൃത്വത്തിൽ നടന്ന ‘ഇശ്ഖ് മജ്ലിസിന്’ യാക്കൂബ് മൗലവി, ഖാലിദ് ബാഖവി, സീദി ഉസ്താദ്, സവാദ് ഹനീഫി, മുഹമ്മദ് ഉസ്താദ് തൃക്കരിപ്പൂർ എന്നിവർ നേതൃത്വം നൽകി. ജില്ലാ ട്രഷറർ ഡോ. ഇസ്മായിൽ മൊഗ്രാൽ നന്ദി രേഖപ്പെടുത്തി.
