അബുദാബിയിലും അൽ ദഫ്രയിലും സുഗമമായ ഗതാഗതവും വിദ്യാർത്ഥികളുടെ സുരക്ഷയും ഉറപ്പാക്കാൻ വിപുലമായ പട്രോളിങ്
അബുദാബി — സെപ്റ്റംബർ 1, 2026 : പുതിയ അധ്യയന വർഷത്തിന് തുടക്കം കുറിച്ചുകൊണ്ട് ക്ലാസ് മുറികളിലേക്ക് തിരിച്ചെത്തിയ വിദ്യാർത്ഥികൾക്ക് മധുരവും സമ്മാനങ്ങളും ട്രാഫിക് ബോധവൽക്കരണ സന്ദേശങ്ങളും നൽകി അബുദാബി പോലീസ്. സ്കൂൾ പരിസരങ്ങളിൽ വിദ്യാർത്ഥികളുടെ സുരക്ഷ ഉറപ്പാക്കുന്നതിനൊപ്പം ഗതാഗതക്കുരുക്ക് ഒഴിവാക്കാനുള്ള വിപുലമായ ക്രമീകരണങ്ങളും പോലീസ് ഏർപ്പെടുത്തി.
അബുദാബി ട്രാഫിക് ആൻഡ് സെക്യൂരിറ്റി പട്രോൾസ് ഡയറക്ടറേറ്റും ‘വി ആർ ഓൾ പോലീസ്’ (We Are All Police) സന്നദ്ധ സേനാംഗങ്ങളും ചേർന്നാണ് സ്കൂളുകളിൽ ഈ ബോധവൽക്കരണ കാമ്പയിൻ സംഘടിപ്പിച്ചത്. 2026–2027 അധ്യയന വർഷത്തിൽ ക്ലാസുകളിലേക്ക് മടങ്ങിയെത്തിയ കുട്ടികളെയും രക്ഷിതാക്കളെയും ഉദ്യോഗസ്ഥർ നേരിട്ടെത്തി ആശംസകൾ അറിയിച്ചു.
യുഎഇയിലുടനീളം ഓഗസ്റ്റ് 31 തിങ്കളാഴ്ചയാണ് പുതിയ അധ്യയന വർഷം ആരംഭിച്ചത്. വിദ്യാഭ്യാസ മന്ത്രാലയം അംഗീകരിച്ച കലണ്ടർ പ്രകാരം 2027 ജൂലൈ 2-നാണ് ഈ അധ്യയന വർഷം അവസാനിക്കുന്നത്.
സ്കൂളുകൾ തുറക്കുന്ന ആദ്യ ദിനം മുതൽ തന്നെ പ്രധാന റോഡുകളിലും സ്കൂൾ മേഖലകളിലും പോലീസിന്റെ നേരിട്ടുള്ള സാന്നിധ്യം ഉറപ്പുവരുത്തിയിട്ടുണ്ടെന്ന് അബുദാബി ട്രാഫിക് ആൻഡ് സെക്യൂരിറ്റി പട്രോൾസ് വിഭാഗം ഡയറക്ടർ ബ്രിഗേഡിയർ സുഹൈൽ സയ്യാഹ് അൽ മസ്റൂയി വ്യക്തമാക്കി. കുട്ടികളിൽ റോഡ് സുരക്ഷാ അവബോധം വളർത്തുന്നതിനൊപ്പം രക്ഷിതാക്കൾക്ക് സുരക്ഷിതമായി കുട്ടികളെ സ്കൂളിലെത്തിക്കാനുള്ള സഹായങ്ങളും ഉദ്യോഗസ്ഥർ നൽകുന്നുണ്ട്.
അൽ ദഫ്ര മേഖലയിലും വിപുലമായ സുരക്ഷാ പദ്ധതികളാണ് നടപ്പാക്കിയിട്ടുള്ളതെന്ന് അൽ ദഫ്ര ട്രാഫിക് ആൻഡ് സെക്യൂരിറ്റി പട്രോൾസ് ഡയറക്ടർ കേണൽ സൈഫ് മുഹമ്മദ് നായിഫ് അൽ ആമിരി പറഞ്ഞു. സ്കൂൾ ബസുകൾക്കും മറ്റ് വാഹനങ്ങൾക്കും സുഗമമായി സഞ്ചരിക്കാൻ ആവശ്യമായ ക്രമീകരണങ്ങൾ വഴി ഗതാഗതക്കുരുക്ക് ഒഴിവാക്കാനും കാൽനടയാത്രക്കാരായ കുട്ടികളുടെ സുരക്ഷ ഉറപ്പാക്കാനും പ്രത്യേക ശ്രദ്ധ നൽകുന്നുണ്ട്.
സ്കൂൾ പരിസരങ്ങളിൽ നിശ്ചിത വേഗപരിധി പാലിക്കണമെന്നും കുട്ടികളെ ഇറക്കുമ്പോഴും കയറ്റുമ്പോഴും ട്രാഫിക് നിയമങ്ങൾ കർശനമായി പാലിക്കണമെന്നും പോലീസ് ഡ്രൈവർമാരോട് നിർദേശിച്ചു.
