ലാൻഡ് ക്രൂയിസർ ശ്രേണിയിൽ പുതിയ കുഞ്ഞൻ കരുത്തൻ; ലാൻഡ് ക്രൂയിസർ എഫ്‌ജെ യുഎഇയിൽ അവതരിപ്പിച്ചു

2.7 ലിറ്റർ എൻജിനും ക്ലാസിക് ലാഡർ ഫ്രെയിം ഷാസിയുമായി എക്സ്.ഇ.ആർ, ജി.എക്സ്.ആർ വേരിയന്റുകളിൽ അൽ-ഫുത്തൈം ടൊയോട്ട പുതിയ മോഡൽ നിരത്തിലിറക്കി.

ദുബായ്, ഒക്ടോബർ 13, 2026 : ജനപ്രിയ ഓഫ്-റോഡർ നിരയായ ലാൻഡ് ക്രൂയിസറിലേക്ക് പുതിയ കോംപാക്റ്റ് മോഡലായ ലാൻഡ് ക്രൂയിസർ എഫ്‌ജെ (Land Cruiser FJ) യുഎഇ വിപണിയിൽ ഔദ്യോഗികമായി പുറത്തിറക്കി അൽ-ഫുത്തൈം ടൊയോട്ട.

ലാൻഡ് ക്രൂയിസർ 300, പ്രാഡോ, 70 സീരീസ് എന്നിവയ്ക്ക് ഒപ്പമാണ് അഞ്ച് സീറ്റുള്ള ഈ പുതിയ മോഡൽ ഇടംപിടിക്കുന്നത്. ലാൻഡ് ക്രൂയിസറുകളുടെ പാരമ്പര്യമായ കരുത്തും ദൃഢതയും നിലനിർത്തിക്കൊണ്ടുതന്നെ നഗരയാത്രകൾക്കും ഓഫ്-റോഡ് ഡ്രൈവിംഗിനും ഒരുപോലെ ഇണങ്ങുന്ന തരത്തിലാണ് ഇതിന്റെ നിർമ്മാണം.

റോബസ്റ്റ് ലാഡർ-ഫ്രെയിം പ്ലാറ്റ്‌ഫോമിൽ നിർമ്മിച്ച ഈ വാഹനത്തിന് 4,610 എംഎം നീളവും 2,580 എംഎം വീൽബേസുമാണുള്ളത്. ലാൻഡ് ക്രൂയിസർ പ്രാഡോയേക്കാൾ 270 എംഎം കുറവാണ് ഇതിന്റെ വീൽബേസ്. 5.5 മീറ്റർ മാത്രമുള്ള ടേണിംഗ് റേഡിയസ് ഇടുങ്ങിയ നിരത്തുകളിലും മണൽക്കാടുകളിലും വാഹനം അനായാസം തിരിക്കാൻ ഡ്രൈവർക്ക് സൗകര്യമൊരുക്കുന്നു.

2.7 ലിറ്റർ ഫോർ-സിലിണ്ടർ പെട്രോൾ എൻജിനാണ് വാഹനത്തിന് കരുത്തുപകരുന്നത്. 164 എച്ച്പി കരുത്തും 245 എൻഎം ടോർക്കും ഉത്പാദിപ്പിക്കുന്ന ഈ എൻജിൻ സിക്സ്-സ്പീഡ് ഓട്ടോമാറ്റിക് ഗിയർബോക്സുമായാണ് ഘടിപ്പിച്ചിരിക്കുന്നത്. പാർട്ട്-ടൈം ഫോർ-വീൽ ഡ്രൈവ് സിസ്റ്റമാണ് ഇതിലുള്ളത്. കഠിനമായ ഓഫ്-റോഡ് പ്രതലങ്ങൾ തരണം ചെയ്യാൻ ഇലക്ട്രിക് റിയർ ഡിഫറൻഷ്യൽ ലോക്ക്, ഡൗൺഹിൽ അസിസ്റ്റ് കൺട്രോൾ, ഹിൽ സ്റ്റാർട്ട് അസിസ്റ്റ് കൺട്രോൾ എന്നിവയും സജ്ജീകരിച്ചിട്ടുണ്ട്.

മുൻവശത്ത് ഹൈ-മൗണ്ട് ഡബിൾ-വിഷ്ബോണും പിന്നിൽ ഫോർ-ലിങ്ക് റിജിഡ് ആക്സിലുമാണ് സസ്പെൻഷൻ ചുമതലകൾ നിർവഹിക്കുന്നത്. ബോഡിക്ക് കീഴെയുള്ള പ്രത്യേക ബ്രേസിംഗുകളും ഹൈ-ടെൻസൈൽ സ്റ്റീലും റോഡിലെ കുലുക്കങ്ങൾ കുറയ്ക്കാനും സ്ഥിരത നിലനിർത്താനും സഹായിക്കുന്നു.

പഴയകാല എഫ്‌ജെ40 മോഡലുകളെ അനുസ്മരിപ്പിക്കുന്ന ബോക്സി രൂപഭംഗിയും പിന്നിലെ ഡോറിൽ ഘടിപ്പിച്ച സ്പെയർ വീലും യു-ആകൃതിയിലുള്ള എൽഇഡി ലൈറ്റുകളും വാഹനത്തിന് വേറിട്ട ലുക്ക് നൽകുന്നുണ്ട്. വൈറ്റ് പേൾ, ആഷ്, ബ്ലാക്ക്, വെങ്കലം (ബ്രോൺസ്), സ്മോക്കി ബ്ലൂ എന്നിങ്ങനെ അഞ്ച് മോണോടോൺ നിറങ്ങളിലാണ് വാഹനം ലഭ്യമാവുക.

അഞ്ചുപേർക്ക് സുഖകരമായി യാത്ര ചെയ്യാവുന്ന ക്യാബിനിൽ 765 ലിറ്റർ ബൂട്ട് സ്പേസ് ലഭ്യമാണ്. 60:40 അനുപാതത്തിൽ രണ്ടാം നിര സീറ്റുകൾ മടക്കിവെച്ചാൽ ലഗേജ് ശേഷി 1,522 ലിറ്ററായി ഉയർത്താം. വയർലെസ് ആപ്പിൾ കാർപ്ലേ പിന്തുണയ്ക്കുന്ന 12.3 ഇഞ്ച് വലിയ ഇൻഫോടെയ്ൻമെന്റ് സ്ക്രീനും ഉൾപ്പെടുത്തിയിട്ടുണ്ട്.

എക്സ്.ഇ.ആർ (EXR), ജി.എക്സ്.ആർ (GXR) എന്നീ രണ്ട് ട്രിമ്മുകളിലാണ് വാഹനം ലഭിക്കുക. എക്സ്.ഇ.ആറിൽ 17 ഇഞ്ച് അലോയ് വീലുകൾ നൽകുമ്പോൾ, ഉയർന്ന വേരിയന്റായ ജി.എക്സ്.ആറിൽ 18 ഇഞ്ച് അലോയ് വീലുകളും ടൊയോട്ട സേഫ്റ്റി സെൻസ് 3 (TSS 3) ആക്ടീവ് സുരക്ഷാ പാക്കേജും പനോരമിക് വ്യൂ ക്യാമറയും ബ്ലൈൻഡ് സ്പോട്ട് മോണിറ്ററും ഉൾപ്പെടുത്തിയിരിക്കുന്നു.

സാധാരണക്കാർക്കും ഓഫ്-റോഡ് യാത്രാപ്രേമികൾക്കും ഒരുപോലെ പ്രയോജനപ്പെടുന്ന സമഗ്രമായ ഒരു ഡ്രൈവിംഗ് അനുഭവമാണ് ലാൻഡ് ക്രൂയിസർ എഫ്‌ജെയിലൂടെ ലഭ്യമാക്കുന്നതെന്ന് അൽ-ഫുത്തൈം ടൊയോട്ട മാനേജിംഗ് ഡയറക്ടർ ജാക്വസ് ബ്രെന്റ് വ്യക്തമാക്കി. യുഎഇയിലെ അൽ-ഫുത്തൈം ഷോറൂമുകൾ വഴി ഉപഭോക്താക്കൾക്ക് വാഹനം ബുക്ക് ചെയ്യാം.