ഒക്ടോബർ 24-ന് അൽ ഹബ്‌തൂർ സിറ്റി ഹിൽട്ടൺ ഹോട്ടലിൽ ആർടിഎയുടെ 121-ാമത് ഓപ്പൺ ലേലം; രജിസ്ട്രേഷൻ തുടങ്ങി.
ദുബായ്, ഒക്ടോബർ 19, 2026 : ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (ആർടിഎ) സംഘടിപ്പിക്കുന്ന 121-ാമത് ഓപ്പൺ ലേലത്തിൽ 60 വിശിഷ്ട വാഹന നമ്പർ പ്ലേറ്റുകൾ വിൽപനയ്‌ക്കെത്തുന്നു.
ഒക്ടോബർ 24 ശനിയാഴ്ച ദുബായ് ഹിൽട്ടൺ അൽ ഹബ്‌തൂർ സിറ്റി ഹോട്ടലിലാണ് പൊതുലേലം നടക്കുകയെന്ന് ആർടിഎ അറിയിച്ചു. രണ്ട്, മൂന്ന്, നാല്, അഞ്ച് അക്കങ്ങളുള്ള ആകർഷകമായ നമ്പറുകളാണ് ഇത്തവണ വാഹന പ്രേമികൾക്കായി ഒരുക്കിയിരിക്കുന്നത്.
പ്രത്യേകം ശ്രദ്ധയാകർഷിക്കുന്ന BB 80, BB 18, CC 44 എന്നീ രണ്ട് അക്ക സൂപ്പർ നമ്പറുകളാണ് ലേലത്തിലെ പ്രധാന ഹൈലൈറ്റ്. AA, BB, CC, H, U, V, W, X, Y, Z എന്നീ പത്ത് കോഡുകളിലുള്ള നമ്പറുകൾ പട്ടികയിലുണ്ട്. മനപ്പാഠമാക്കാൻ എളുപ്പമുള്ളതും ഒരേ അക്കങ്ങൾ ആവർത്തിച്ചുവരുന്നതുമായ കോമ്പിനേഷനുകൾ ഇതിലുണ്ട്.
ലേലത്തിൽ പങ്കെടുക്കാൻ ആഗ്രഹിക്കുന്നവർക്കായി തിങ്കളാഴ്ച (ഒക്ടോബർ 19) മുതൽ രജിസ്ട്രേഷൻ ആരംഭിച്ചു. ആർടിഎയുടെ ഔദ്യോഗിക വെബ്സൈറ്റ് (www.rta.ae) വഴിയോ ഉമ്മു റമൂൽ, ദേര, അൽ ബർഷ എന്നിവിടങ്ങളിലെ കസ്റ്റമർ ഹാപ്പിനസ് സെന്ററുകൾ വഴിയോ രജിസ്റ്റർ ചെയ്യാം. ലേല ദിവസമായ ഒക്ടോബർ 24-ന് ഉച്ചയ്ക്ക് 2:00 മണി മുതൽ ഹോട്ടലിൽ നേരിട്ടെത്തിയും നടപടികൾ പൂർത്തിയാക്കാം.
പങ്കെടുക്കുന്നവർക്ക് ദുബായ് ട്രാഫിക് ഫയൽ നിർബന്ധമാണ്. 25,000 ദിർഹത്തിന്റെ റീഫണ്ടബിൾ സെക്യൂരിറ്റി ഡെപ്പോസിറ്റ് ചെക്കും മടക്കി ലഭിക്കാത്ത 120 ദിർഹം എൻട്രി ഫീസും നൽകണം. നമ്പർ ലഭിക്കാത്തവർക്ക് ലേലത്തിന് ശേഷം സെക്യൂരിറ്റി തുക തിരികെ ലഭിക്കും.
വിജയിക്കുന്നവർ ലേല തീയതി മുതൽ 10 പ്രവൃത്തിദിവസങ്ങൾക്കുള്ളിൽ ബാക്കി തുക പൂർണമായും അടച്ചുതീർക്കണം. നിശ്ചിത സമയത്തിനകം തുക അടച്ചില്ലെങ്കിൽ സെക്യൂരിറ്റി ഡെപ്പോസിറ്റ് കണ്ടുകെട്ടും. കൂടാതെ വീഴ്ച വരുത്തുന്നവരുടെ പേര് ആർടിഎയുടെ കരിമ്പട്ടികയിൽ ഉൾപ്പെടുത്തുകയും ചെയ്യും.
വിൽപ്പന തുകയ്ക്ക് യുഎഇയിലെ 5 ശതമാനം വാറ്റ് (VAT) ബാധകമായിരിക്കും. വ്യവസ്ഥകൾ പൂർണ്ണമായി പാലിക്കുന്ന ഏതൊരാൾക്കും പരിധിയില്ലാതെ എത്ര വിശിഷ്ട നമ്പറുകളും സ്വന്തമാക്കാം. അത്യപൂർവ നമ്പറുകൾ ശേഖരിക്കാൻ ആഗ്രഹിക്കുന്ന വാഹന ഉടമകൾക്കും നിക്ഷേപകർക്കും മികച്ച അവസരമാണ് ഇതെന്നും ആർടിഎ വ്യക്തമാക്കി.
