സാമ്പത്തിക, വ്യാപാര, നിക്ഷേപ മേഖലകളിലെ പുരോഗതിയും പശ്ചിമേഷ്യൻ സാഹചര്യങ്ങളും വിലയിരുത്തി ഷെയ്ഖ് അബ്ദുള്ളയും എസ്. ജയശങ്കറും
അബുദാബി —ഇന്ത്യയും യുണൈറ്റഡ് അറബ് എമിറേറ്റ്സും തമ്മിലുള്ള സമഗ്ര സാമ്പത്തിക-തന്ത്രപ്രധാന പങ്കാളിത്തം കൂടുതൽ ശക്തിപ്പെടുത്തുന്നതിനായി ഇരുരാജ്യങ്ങളിലെയും വിദേശകാര്യ മന്ത്രിമാർ അബുദാബിയിൽ കൂടിക്കാഴ്ച നടത്തി.
യുഎഇ ഉപപ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് അബ്ദുള്ള ബിൻ സായിദ് അൽ നഹ്യാനും ഇന്ത്യൻ വിദേശകാര്യ മന്ത്രി ഡോ. എസ്. ജയശങ്കറും തമ്മിലായിരുന്നു ചർച്ച. ഇരുരാജ്യങ്ങളും തമ്മിൽ നിലവിലുള്ള സമഗ്ര സാമ്പത്തിക പങ്കാളിത്ത കരാറിന്റെ (സിഇപിഎ – CEPA) പശ്ചാത്തലത്തിൽ വ്യാപാരം, ധനകാര്യം, നിക്ഷേപം എന്നീ മേഖലകളിലെ പുതിയ സാധ്യതകൾ ഇരുവരും അവലോകനം ചെയ്തു.
ഇന്ത്യയും യുഎഇയും തമ്മിലുള്ള ബന്ധം പരസ്പര വിശ്വാസത്തിലും ദീർഘകാല സഹകരണത്തിലും അധിഷ്ഠിതമാണെന്ന് ഷെയ്ഖ് അബ്ദുള്ള വ്യക്തമാക്കി. ജനങ്ങളുടെ ക്ഷേമത്തിനും ഇരുരാജ്യങ്ങളുടെയും വികസന ലക്ഷ്യങ്ങൾക്കും ഉതകുന്ന സംയുക്ത പദ്ധതികൾ വേഗത്തിലാക്കാൻ കൂടിക്കാഴ്ചയിൽ ധാരണയായി.
സാമ്പത്തിക വിഷയങ്ങൾക്ക് പുറമെ പശ്ചിമേഷ്യയിലെയും രാജ്യാന്തര തലത്തിലെയും പുതിയ സംഭവവികാസങ്ങളും ഇരുനേതാക്കളുടെയും ശ്രദ്ധയിൽ വന്നു. സമുദ്ര സുരക്ഷ, ഊർജ വിതരണ ശൃംഖലയുടെ സ്ഥിരത, മേഖലാ സമാധാനം തുടങ്ങിയ വിഷയങ്ങളിൽ പരസ്പര സഹകരണം തുടരുമെന്ന് ഇരുപക്ഷവും വ്യക്തമാക്കി.
ഉഭയകക്ഷി വിനിമയങ്ങൾ ശക്തമാക്കുന്നതിനൊപ്പം നയതന്ത്ര തലത്തിലുള്ള ആശയവിനിമയങ്ങൾ തടസ്സമില്ലാതെ മുന്നോട്ടുകൊണ്ടുപോകാനും ചർച്ചയിൽ തീരുമാനമായിട്ടുണ്ട്.
