ഫോട്ടോ ഫിൽട്ടറുകൾ വഴി സ്വകാര്യ ചിത്രങ്ങൾ ചോർത്തി ഭീഷണിപ്പെടുത്തി പണം തട്ടിയ വൻ സംഘം പിടിയിലായത് ഒരു പരാതിയിൽ തുടങ്ങിയ അന്വേഷണത്തിലൂടെ.
ഷാർജ : ഫോട്ടോ എഡിറ്റിങ് ഫിൽട്ടറുകളിലൂടെ സ്വകാര്യ ചിത്രങ്ങൾ ചോർത്തി പതിനാല് രാജ്യങ്ങളിലെ സോഷ്യൽ മീഡിയ താരങ്ങളെയും ഇൻഫ്ലുവൻസർമാരെയും ബ്ലാക്ക്‌മെയിൽ ചെയ്ത അന്താരാഷ്ട്ര സൈബർ തട്ടിപ്പ് സംഘത്തെ ഷാർജ പോലീസ് പിടികൂടി.
ഷാർജ പോലീസിൽ ലഭിച്ച ഒരു പരാതിയുടെ അടിസ്ഥാനത്തിൽ നടത്തിയ ശാസ്ത്രീയ അന്വേഷണമാണ് വിവിധ രാജ്യങ്ങളിൽ വേരുകളുള്ള വൻ സൈബർ മാഫിയയെ പൂട്ടുന്നതിലേക്ക് വഴിതുറന്നത്. ഷാർജ ടിവിയിലെ ‘അൽ ശുർത്തി’ പരിപാടിയിലാണ് ഡിജിറ്റൽ ക്രൈംസ് വിഭാഗം തലവൻ ലെഫ്റ്റനന്റ് കേണൽ സഖർ അഹമ്മദ് നിർണായക ഓപ്പറേഷന്റെ വിശദാംശങ്ങൾ വ്യക്തമാക്കിയത്.
സോഷ്യൽ മീഡിയ അക്കൗണ്ടുകൾക്ക് വെരിഫിക്കേഷൻ ബ്ലൂ ടിക്ക് വാങ്ങി നൽകാമെന്നും ഫോളോവേഴ്സിനെ കൂട്ടി നൽകാമെന്നും വാഗ്ദാനം ചെയ്യുന്ന വ്യാജ ഓൺലൈൻ ഏജൻസികളുടെ മറവിലായിരുന്നു സംഘത്തിന്റെ പ്രവർത്തനം. സർക്കാർ ഏജൻസികളുമായി ബന്ധമുണ്ടെന്ന് തോന്നിപ്പിക്കുന്ന രീതിയിലായിരുന്നു ഇവരുടെ വെബ്സൈറ്റുകളും സമൂഹമാധ്യമ പേജുകളും.
ജനപ്രിയ എഡിറ്റിങ് ആപ്പുകളിലെ ഫോട്ടോ ഫിൽട്ടറുകളിലാണ് തട്ടിപ്പുകാർ പ്രധാനമായും കെണിയൊരുക്കിയത്. ഉപയോക്താക്കൾ തങ്ങളുടെ ഫോണുകളിൽ ഇത്തരം ഫിൽട്ടറുകൾ ഇൻസ്റ്റാൾ ചെയ്യുമ്പോഴും ഉപയോഗിക്കുമ്പോഴും വ്യക്തിഗത വിവരങ്ങളും ഫോണിലെ സ്വകാര്യ ചിത്രങ്ങളും ഉടമയറിയാതെ തട്ടിപ്പുകാരുടെ സെർവറുകളിലേക്ക് മാറ്റപ്പെട്ടു. പ്രധാനമായും വനിതാ ഇൻഫ്ലുവൻസർമാരെയാണ് ഇവർ നോട്ടമിട്ടത്.
ചോർത്തിയ ചിത്രങ്ങൾ പുറത്തുവിടുമെന്ന് കാണിച്ച് വിദേശ നമ്പറുകളിൽ നിന്ന് വിളിച്ചായിരുന്നു ആദ്യ ഭീഷണി. വൻ തുക മോചനദ്രവ്യമായി ആവശ്യപ്പെടുന്നതിനൊപ്പം മറ്റൊരു കുരുക്കും സംഘം ഒരുക്കിയിരുന്നു. അക്കൗണ്ട് വീണ്ടെടുത്തു നൽകാമെന്നും ചോർന്ന വിവരങ്ങൾ നീക്കം ചെയ്യാമെന്നും വാഗ്ദാനം ചെയ്ത് മറ്റൊരു വ്യാജ സൈബർ സെക്യൂരിറ്റി ഏജൻസിയുടെ രൂപത്തിലും ഇവർ ഇരകളെ സമീപിച്ചു. പ്രശ്നം പരിഹരിക്കാനെന്ന പേരിൽ വീണ്ടും പണം കൈക്കലാക്കി. സാങ്കേതിക സഹായം വാഗ്ദാനം ചെയ്യുന്ന വ്യാജ ടെക് സപ്പോർട്ട് ഗ്രൂപ്പുകളും ഇതിനായി പ്രവർത്തിച്ചു.
തട്ടിപ്പിനിരയായ വ്യക്തി നൽകിയ കൃത്യമായ പരാതി ഷാർജ പോലീസ് ഡിജിറ്റൽ ഇന്റലിജൻസ് ലാബിന് കൈമാറിയതോടെയാണ് നീക്കങ്ങൾ വേഗത്തിലായത്. അത്യാധുനിക ആർട്ടിഫിഷ്യൽ ഇന്റലിജൻസ് സാങ്കേതികവിദ്യയും ഡിജിറ്റൽ ഫോറൻസിക് പരിശോധനകളും ഉപയോഗിച്ച് സംഘത്തിന്റെ സർവറുകൾ തിരിച്ചറിഞ്ഞു. തുടർന്ന് അന്താരാഷ്ട്ര അന്വേഷണ ഏജൻസികളുമായി വിവരങ്ങൾ പങ്കുവെക്കുകയും 14 രാജ്യങ്ങളിലായി വ്യാപിച്ചു കിടന്ന സംഘാംഗങ്ങളെയും അവരുടെ താവളങ്ങളെയും നിയമത്തിന് മുന്നിൽ കൊണ്ടുവരികയും ചെയ്തു.
അപരിചിതമായ ആപ്പുകൾക്കും വെബ്സൈറ്റുകൾക്കും ക്യാമറ, ഗാലറി, ഫോൺ സ്റ്റോറേജ് അനുമതികൾ (permissions) നൽകരുതെന്ന് ഷാർജ പോലീസ് പൊതുജനങ്ങൾക്ക് മുന്നറിയിപ്പ് നൽകി. ഫോളോവേഴ്‌സ് വർധിപ്പിക്കാമെന്നോ നഷ്ടപ്പെട്ട അക്കൗണ്ടുകൾ വേഗത്തിൽ വീണ്ടെടുക്കാമെന്നോ ഉള്ള വാഗ്ദാനങ്ങൾ വിശ്വസിക്കരുത്. ബ്ലാക്ക്‌മെയിലിങ്ങിന് ഇരയായാൽ ഭയന്ന് പണം നൽകരുതെന്നും, അത് കൂടുതൽ ഭീഷണികൾക്ക് മാത്രമേ കാരണമാകൂ എന്നും പോലീസ് ഓർമ്മിപ്പിച്ചു. കോളുകളുടെ വിവരങ്ങളും സന്ദേശങ്ങളും തെളിവായി സൂക്ഷിച്ചു ഉടൻ തന്നെ പോലീസിനെ അറിയിക്കണമെന്നും അധികൃതർ വ്യക്തമാക്കി.
