യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാന്റെ ദ്വിദിന ഫ്രാൻസ് സന്ദർശനം സമാപിച്ചു. ആഗോള പ്രശ്‌നങ്ങളിൽ സമ്മർദ്ദം ചെലുത്താൻ നടപടിയെടുക്കണമെന്ന് സംയുക്ത പ്രസ്താവന പുറപ്പെടുവിച്ചതോടെയായിരുന്നു പര്യടനത്തിന് സമാപനമായത്.
നേതാക്കളുമായുള്ള കൂടിക്കാഴ്ച്ചയ്ക്കു ശേഷം ഫ്രഞ്ച് പ്രസിഡന്റ് ഇമ്മാനുവൽ മക്രോയ്ക്ക് നന്ദി രേഖപ്പെടുത്തി ഇന്ന് (ചൊവ്വ) ഉച്ചതിരിഞ്ഞ് ഷെയ്ഖ് മുഹമ്മദ്, ഓർലി വിമാനത്താവളത്തിൽ നിന്നു പുറപ്പെട്ടു. പ്രസിഡന്റായ ശേഷം ഷെയ്ഖ് മുഹമ്മദ് നടത്തിയ ആദ്യ ഔദ്യോഗിക പര്യടനത്തിൽ ഒട്ടേറെ ചർച്ചകളും കരാറുകളിൽ ഒപ്പുവച്ചു. സ്വദേശത്തും വിദേശത്തും വാർത്താപ്രാധാന്യം നേടിയ സന്ദർശനമായിരുന്നു ഇത്. ആഗോള സുസ്ഥിരതയെ ബാധിക്കുന്ന പ്രതിസന്ധികളെ നേരിടാൻ നടപടി വേണമെന്ന് ഷെയ്ഖ് മുഹമ്മദും മക്രോയും സംയുക്ത പ്രസ്താവനയിൽ ആവശ്യപ്പെട്ടു. യുക്രെയ്‌നിലെ യുദ്ധം, ജനങ്ങളിൽ അതിന്റെ ഭയാനകമായ ആഘാതം, മാനുഷിക സാഹചര്യം, ലോകത്തെങ്ങുമുള്ള ചരക്ക് വിപണികളിൽ അതിന്റെ സ്വാധീനം എന്നിവയെക്കുറിച്ച് ഇരു നേതാക്കളും ആശങ്ക പ്രകടിപ്പിച്ചു.
സംഘർഷത്തിന് പരിഹാരം കാണുന്നതിന് നയതന്ത്രപരമായ ശ്രമങ്ങൾ ഊർജിതമാക്കേണ്ടതിന്റെ ആവശ്യകത അവർ അടിവരയിട്ടു പറഞ്ഞു, ഇക്കാര്യത്തിൽ പ്രസിഡന്റ് മക്രോയുടെ തുടർച്ചയായ ശ്രമങ്ങളെ ഷെയ്ഖ് മുഹമ്മദ് അഭിനന്ദിച്ചു.
