ദുബായ്:ഉപഭോക്താക്കളുടെ സംതൃപ്തി അളക്കുന്നതിനും സേവന നിലവാരം മെച്ചപ്പെടുത്തുന്നതിനുമായി ദുബായ് ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സ് (GDRFA) ‘കമ്മ്യൂണിറ്റി ഹാപ്പിനസ് സർവേ’ക്ക് തുടക്കമിട്ടു. ‘നിങ്ങളുടെ സന്തോഷമാണ് ഞങ്ങളുടെ വിജയത്തിന്റെ അളവുകോൽ’ എന്ന ടാഗ്ലൈനോടെയാണ് ജി ഡി ആർ എഫ് എ പൊതുജനങ്ങളുടെ അഭിപ്രായം തേടുന്നത്.ദുബായിലെ എല്ലാ വിസ സേവനങ്ങളും, ദുബായ് രാജ്യാന്തര വിമാനത്താവളത്തിലെ ഇമിഗ്രേഷൻ സേവന നടപടി അടക്കം കൈകാര്യം ചെയ്യുന്ന സർക്കാർ സ്ഥാപനമാണ് ദുബായ് ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സ്
ജനറൽ ഡയറക്ടറേറ്റിന്റെ കീഴിലുള്ള എല്ലാ സേവനങ്ങളെക്കുറിച്ചുമുള്ള അഭിപ്രായങ്ങൾ പൊതുജനങ്ങൾക്ക് സർവേയിലൂടെ പങ്കുവെക്കാം. ഇംഗ്ലീഷ്, അറബിക് ഭാഷകളിൽ ലഭ്യമായ ഓൺലൈൻ ലിങ്ക് വഴിയാണ് സർവേയിൽ പങ്കെടുക്കേണ്ടത്.ഉപയോക്താക്കളിൽ നിന്ന് ലഭിക്കുന്ന പ്രതികരണങ്ങൾ വിശദമായി വിലയിരുത്തി നിലവിലെ സേവനങ്ങളിലെ ന്യൂനതകൾ പരിഹരിക്കാനും, കൂടുതൽ മികച്ച സേവനങ്ങൾ ജനങ്ങളിലേക്ക് എത്തിക്കാനുമാണ് ജിഡിആർഎഫ്എ ഇതിലൂടെ ലക്ഷ്യമിടുന്നത്.
യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂമിന്റെ നിർദ്ദേശങ്ങൾക്കനുസൃതമായാണ് ജനസന്തുഷ്ടി മുൻനിർത്തി ഇത്തരം സർവേ പദ്ധതികൾ നടപ്പിലാക്കുന്നതെന്ന് ജിഡിആർഎഫ്എ മേധാവി ലഫ്. ജനറൽ മുഹമ്മദ് അഹ്‌മദ്‌ അൽ മർറി പറഞ്ഞു.ഉപയോക്താക്കളുടെ പങ്കാളിത്തം സേവനങ്ങൾ മെച്ചപ്പെടുത്തുന്നതിൽ നിർണായകമാണെന്നും, ജനങ്ങളുടെ ആവശ്യങ്ങളും പ്രതീക്ഷകളും കൃത്യമായി മനസ്സിലാക്കാൻ ഈ സർവേ സഹായിക്കുമെന്നും അദ്ദേഹം കൂട്ടിച്ചേർത്തു
വിവിധ സിസ്റ്റങ്ങളും നടപടിക്രമങ്ങളും ഭാവിയിൽ വികസിപ്പിക്കുന്നതിനും മെച്ചപ്പെടുത്തുന്നതിനുമുള്ള പങ്കാളിത്തത്തിന്റെ ഭാഗമായി, പൊതുസമൂഹത്തിന്റെ സന്തോഷവും സംതൃപ്തിയും അളക്കുകയാണ് സർവേയിലെചോദ്യാവലിയുടെ പ്രാഥമിക ലക്ഷ്യം.സമൂഹത്തിന്റെ സന്തോഷം അളക്കുക
സ്ഥാപനത്തിന്റെ പ്രവർത്തനങ്ങളോടുള്ള സമൂഹത്തിന്റെ മനോഭാവം, പങ്കാളിത്തം, നിലവിലെ സംവിധാനങ്ങൾ എന്നിവ വിലയിരുത്താൻ ഈ സർവ്വേ സഹായിക്കും. ഇത് വഴി ലഭിക്കുന്ന വിവരങ്ങളുടെ അടിസ്ഥാനത്തിൽ, കൂടുതൽ കാര്യക്ഷമവും സംതൃപ്തി നൽകുന്നതുമായ സേവനങ്ങളും നടപടിക്രമങ്ങളും ഭാവിയിൽ ആസൂത്രണം ചെയ്യാൻ ഡയറക്ടറേറ്റിന് സാധിക്കും.സർവേയിൽ നൽകുന്ന വിവരങ്ങളുടെ സ്വകാര്യത (Confidentiality) ഉറപ്പുവരുത്തുമെന്ന് അധികൃതർ അറിയിച്ചു.
ഫോട്ടോ : സർവേയിൽ പങ്കെടുക്കാൻ ജി ഡി ആർ എഫ് എ ദുബായ് പുറത്തിറക്കിയ ക്യു ആർ കോഡ് അടങ്ങിയ ബ്രോഷർ
ഫോട്ടോ : ലഫ് : ജനറൽ മുഹമ്മദ് അഹ്‌മദ്‌ അൽ മർറി
ഓൺലൈൻ ലിങ്ക് :-
