ഓഹരിയൊന്നിന് 1,065 മുതൽ 1,119 രൂപ വരെ വില നിശ്ചയിച്ചു; രാജ്യത്തെ ഏറ്റവും വലിയ പ്രാരംഭ ഓഹരി വിൽപനയിൽ എൻആർഐകൾക്കും പങ്കെടുക്കാം.
ദുബായ്, ഒക്ടോബർ 19 : ഇന്ത്യൻ ഓഹരി വിപണിയിലെ എക്കാലത്തെയും വലിയ ഐപിഒയുമായി മുകേഷ് അംബാനിയുടെ നേതൃത്വത്തിലുള്ള ജിയപ്ലാറ്റ്‌ഫോംസ് ലിമിറ്റഡ്. ഒക്ടോബർ 21 ബുധനാഴ്ച പൊതു സബ്‌സ്‌ക്രിപ്ഷനായി തുറക്കുന്ന ഐപിഒയിൽ ഓഹരിയൊന്നിന് 1,065 മുതൽ 1,119 രൂപ വരെയാണ് പ്രൈസ് ബാൻഡ് നിശ്ചയിച്ചിരിക്കുന്നത്.
വിപണിയിൽ നിന്ന് 30,213 കോടി രൂപ (ഏകദേശം 3.2 ബില്യൺ ഡോളർ അല്ലെങ്കിൽ 1,180 കോടി യുഎഇ ദിർഹം) സമാഹരിക്കാനാണ് കമ്പനി ലക്ഷ്യമിടുന്നത്. പ്രൈസ് ബാൻഡിന്റെ ഉയർന്ന പരിധി കണക്കിലെടുക്കുമ്പോൾ ജിയോ പ്ലാറ്റ്‌ഫോംസിന്റെ വിപണി മൂല്യം 108.3 ബില്യൺ ഡോളറിലെത്തും (ഏകദേശം 39,800 കോടി ദിർഹം). ലിസ്റ്റിംഗിനു ശേഷവും മാതൃസ്ഥാപനമായ റിലയൻസ് ഇൻഡസ്ട്രീസിന് കമ്പനിയിൽ 66.43 ശതമാനം ഓഹരി പങ്കാളിത്തം തുടരും.
ഓഹരി വിൽപന പൂർണ്ണമായും പുതിയ ഇക്വിറ്റി ഓഹരികൾ (ഫ്രഷ് ഇഷ്യൂ) വഴിയാണ് നടത്തുന്നത്. ഇതിലൂടെ ലഭിക്കുന്ന 27,500 കോടി രൂപ കമ്പനിയുടെ ടെലികോം വിഭാഗമായ റിലയൻസ് ജിയോ ഇൻഫോകോമിന്റെ ബാധ്യതകൾ കുറയ്ക്കാനാണ് പ്രധാനമായും ഉപയോഗിക്കുക. ഈ ഓഹരി വിൽപന നിക്ഷേപകരോടുള്ള വലിയ ഉത്തരവാദിത്തമാണെന്ന് ജിയോ പ്ലാറ്റ്‌ഫോംസ് ചെയർമാൻ ആകാശ് അംബാനി പ്രതികരിച്ചു. റിലയൻസിന്റെ വാർഷിക പൊതുയോഗത്തിൽ മുന്നോട്ടുവെച്ച പദ്ധതികളാണ് ഇപ്പോൾ പ്രാവർത്തികമാകുന്നത്.
ഓഹരികൾക്കായുള്ള ലേലം ഒക്ടോബർ 23 വെള്ളിയാഴ്ച അവസാനിക്കും.
ഗൾഫ് പ്രവാസികൾ അറിഞ്ഞിരിക്കേണ്ട കാര്യങ്ങൾ
യുഎഇ ഉൾപ്പെടെയുള്ള ഗൾഫ് രാജ്യങ്ങളിലെ പ്രവാസി ഇന്ത്യക്കാർക്ക് (എൻആർഐ), പിഐഒ (Persons of Indian Origin), ഒസിഐ (Overseas Citizens of India) കാർഡുള്ളവർക്ക് ജിയോ ഐപിഒയിൽ നിയമപരമായി പങ്കെടുക്കാം. എന്നാൽ ഇന്ത്യൻ പൗരത്വമോ വംശീയ പശ്ചാത്തലമോ ഇല്ലാത്ത മറ്റ് വിദേശ രാജ്യങ്ങളിലെ പൗരന്മാർക്ക് റീട്ടെയിൽ വിഭാഗത്തിൽ നേരിട്ട് അപേക്ഷിക്കാനാകില്ല.
ഐപിഒയിൽ പ്രവാസികൾക്കായി പ്രത്യേകം ക്വോട്ട നിശ്ചയിച്ചിട്ടില്ല. സാധാരണ റീട്ടെയിൽ നിക്ഷേപകർക്കൊപ്പമാണ് ഇവരും അപേക്ഷിക്കേണ്ടത്:
- റീട്ടെയിൽ ഇൻഡിവിജ്വൽ ഇൻവെസ്റ്റർ: 2 ലക്ഷം രൂപ വരെയുള്ള അപേക്ഷകൾ.
- നോൺ-ഇൻസ്റ്റിറ്റ്യൂഷണൽ ഇൻവെസ്റ്റർ (എൻഐഐ): 2 ലക്ഷം രൂപയ്ക്ക് മുകളിലുള്ള വലിയ തുകയുടെ അപേക്ഷകൾ.
റീട്ടെയിൽ വിഭാഗത്തിൽ അപേക്ഷിക്കാൻ കുറഞ്ഞത് ഒരു ലോട്ടിൽ 12 ഓഹരികളുണ്ടാകും. ഉയർന്ന പ്രൈസ് ബാൻഡായ 1,119 രൂപ പ്രകാരം ഒരു ലോട്ടിന് 13,428 രൂപ (ഏകദേശം 522 യുഎഇ ദിർഹം) ആവശ്യമായി വരും.
ആവശ്യമായ അക്കൗണ്ടുകൾ
പ്രവാസികൾക്ക് അപേക്ഷ സമർപ്പിക്കാൻ രണ്ട് കാര്യങ്ങൾ നിർബന്ധമാണ്:
- എൻആർഇ അല്ലെങ്കിൽ എൻആർഒ ബാങ്ക് അക്കൗണ്ട്: എൻആർഇ (NRE) അക്കൗണ്ട് വഴിയാണ് അപേക്ഷിക്കുന്നതെങ്കിൽ ഓഹരി വിൽക്കുമ്പോൾ ലഭിക്കുന്ന ലാഭവും മുതലും പൂർണ്ണമായും വിദേശത്തേക്ക് തിരിച്ചുകൊണ്ടുപോകാൻ (Repatriation) സാധിക്കും. എന്നാൽ എൻആർഒ (NRO) അക്കൗണ്ട് വഴിയുള്ള ഇടപാടുകൾക്ക് ആർബിഐയുടെയും നികുതി വകുപ്പിന്റെയും കർശന നിയന്ത്രണങ്ങളുണ്ടാകും.
- എൻആർഐ ഡീമാറ്റ്, ട്രേഡിങ് അക്കൗണ്ട്: ഓഹരികൾ ഡിജിറ്റൽ രൂപത്തിൽ ലഭിക്കാൻ പാൻ കാർഡുമായി ബന്ധിപ്പിച്ച എൻആർഐ ഡീമാറ്റ് അക്കൗണ്ട് അനിവാര്യമാണ്.
ഐപിഒകളിൽ നേരിട്ട് പങ്കെടുക്കാൻ പ്രവാസികൾക്ക് പോർട്ട്‌ഫോളിയോ ഇൻവെസ്റ്റ്‌മെന്റ് സ്കീം (PIS) അനുമതി ആവശ്യമില്ല. ലിസ്റ്റിംഗിനു ശേഷം ദ്വിതീയ വിപണിയിൽ (Secondary Market) നേരിട്ട് ഓഹരി വാങ്ങുന്നതിന് മാത്രമാണ് പിഐഎസ് അക്കൗണ്ട് നിർബന്ധമുള്ളത്.
അപേക്ഷിക്കേണ്ട വിധവും പ്രധാന തീയതികളും
ഇന്റർനെറ്റ് ബാങ്കിങ് വഴിയുള്ള ആസ്ബ (ASBA – Application Supported by Blocked Amount) സംവിധാനത്തിലൂടെയോ അല്ലെങ്കിൽ എൻആർഇ/എൻആർഒ അക്കൗണ്ടുമായി ബന്ധിപ്പിച്ച യുപിഐ (UPI) സംവിധാനം വഴിയോ അപേക്ഷിക്കാം. ആസ്ബ വഴി അപേക്ഷിക്കുമ്പോൾ ഓഹരി ലഭിക്കുന്നത് വരെ തുക അക്കൗണ്ടിൽ ബ്ലോക്ക് ചെയ്യപ്പെടുക മാത്രമേ ചെയ്യുകയുള്ളൂ.
യുപിഐ വഴി അപേക്ഷിക്കുന്നവർ ഒക്ടോബർ 23 വൈകുന്നേരം 5 മണിക്ക് മുൻപായി മാൻഡേറ്റ് അംഗീകരിക്കേണ്ടതാണ്.
ഒക്ടോബർ 26-ന് ഓഹരി അലോട്ട്‌മെന്റ് പൂർത്തിയാകും. ഓഹരി ലഭിക്കാത്തവരുടെ പണം അൺബ്ലോക്ക് ചെയ്യുന്നതും ഓഹരി ലഭിച്ചവർക്ക് ഡീമാറ്റ് അക്കൗണ്ടിലേക്ക് ക്രഡിറ്റ് ചെയ്യുന്നതും ഒക്ടോബർ 27-ന് നടക്കും. ഒക്ടോബർ 28 ബുധനാഴ്ച ജിയോ പ്ലാറ്റ്‌ഫോംസ് ഓഹരികൾ ബോംബെ സ്റ്റോക്ക് എക്‌സ്‌ചേഞ്ചിലും (BSE) നാഷണൽ സ്റ്റോക്ക് എക്‌സ്‌ചേഞ്ചിലും (NSE) ലിസ്റ്റ് ചെയ്യും.
