ദുബൈ: ഈദുൽ ഫിത്ർ ആഘോഷങ്ങൾക്കായി ദുബൈയിലെത്തിയ സഞ്ചാരികൾക്ക് ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്‌സ് അഫയേഴ്‌സ് (ജി.ഡി.ആർ.എഫ്.എ) ഗംഭീര വരവേൽപ് നൽകി. ദുബൈ അന്താരാഷ്ട്ര വിമാനത്താവളത്തിൽ എത്തിയ യാത്രക്കാരെ പ്രത്യേക സമ്മാനങ്ങളും, പാസ്‌പോർട്ടിൽ ‘ഈദ് ഇൻ ദുബൈ’ എന്ന പ്രത്യേക സ്റ്റാമ്പും പതിച്ചാണ് സ്വീകരിച്ചത്. കൂടാതെ, യു.എ.ഇ വൈസ് പ്രസിഡന്‍റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാശിദ് ആൽ മക്തൂമിന്‍റെ ജീവചരിത്രമായ ‘ടു ബി ദ ഫസ്റ്റ്’ എന്ന പുസ്തകവും ജി.ഡി.ആർ.എഫ്.എ യാത്രക്കാർക്ക് സമ്മാനിച്ചു.യാത്രക്കാർക്ക് സന്തോഷകരമായ ഈദ് അനുഭവം നൽകുന്നതിനായി വിമാനത്താവളത്തിലെ നടപടിക്രമങ്ങൾ വേഗത്തിലും സുഗമമായും പൂർത്തിയാക്കാൻ ജി.ഡി.ആർ.എഫ്.എ ഉദ്യോഗസ്ഥർ പ്രത്യേക ശ്രദ്ധ ചെലുത്തി. ഈദിന്‍റെ ആദ്യ ദിവസം, യാത്രക്കാർക്ക് ലഭിക്കേണ്ട സേവനം ഉറപ്പാക്കാനും ഈദ് ആശംസകൾ നേരാനും ദുബൈ വിമാനത്താവളത്തിൽ ഉന്നത ഉദ്യോഗസ്ഥർ സന്ദർശനം നടത്തി.ജി.ഡി.ആർ.എഫ്.എ ഡയറക്ടർ ജനറൽ, ലഫ്റ്റനന്‍റ് ജനറൽ മുഹമ്മദ് അഹ്മദ് അൽ മർറി, അസി. ഡയറക്ടർ മേജർ ജനറൽ ഉബൈദ് മുഹൈർ ബിൻ സുറൂർ എന്നിവരടക്കമുള്ള ഉന്നത ഉദ്യോഗസ്ഥരാണ് എയർപോർട്ടിൽ സന്ദർശനം നടത്തിയത്.ഈദ് കാലത്ത് സഞ്ചാരികൾക്ക് സന്തോഷകരമായ അനുഭവം ഉറപ്പാക്കുന്നതിന്‍റെ ഭാഗമായാണ് ഉദ്യോഗസ്ഥർ ഒരുമിച്ച് എയർപോർട്ടിൽ പര്യടനം നടത്തിയത്. വിമാനത്താവളത്തിലെ പ്രവർത്തനങ്ങൾ ഉദ്യോഗസ്ഥർ പരിശോധിച്ചു. ഈദ് അവധിക്കാലത്ത് വർധിച്ച യാത്രത്തിരക്ക് കണക്കിലെടുത്ത്, യാത്രക്കാർക്ക് സൗകര്യപ്രദമായ യാത്രാനുഭവം ഉറപ്പാക്കുന്നതിനായി കൂടുതൽ ജീവനക്കാരെ എയർപോർട്ടിൽ വിന്യസിച്ചിരുന്നു
