ഷാർജ: റമദാൻ മാസത്തോടനുബന്ധിച്ച് സംഘടിപ്പിക്കുന്ന ഷാർജ റമദാൻ നൈറ്റ്സ് മാർച്ച് 10 മുതൽ ആരംഭിക്കും. ഷാർജ എക്സ്പോ സെന്ററിൽ നടക്കുന്ന ഈ മേളയ്ക്ക് ഷാർജ ചേംബർ ഓഫ് കൊമേഴ്സ് ആൻഡ് ഇൻഡസ്ട്രിയുടെ പിന്തുണയുണ്ട്. ഷാർജ എക്സ്പോ സെന്റർ സംഘടിപ്പിക്കുന്ന റമദാൻ നൈറ്റ്സിന്റെ 43-ാമത് എഡിഷനാണ് ഈ വർഷം നടക്കുന്നത്.
വിനോദ-വിജ്ഞാന പരിപാടികളോടൊപ്പം മികച്ച ഷോപ്പിംഗ് അനുഭവവും സമ്മാനിക്കുന്ന തരത്തിലാണ് റമദാൻ നൈറ്റ്സ് 2026 ഒരുക്കിയിരിക്കുന്നത്. 10,000-ത്തിലധികം ഉൽപ്പന്നങ്ങൾ 75 ശതമാനം വരെ വിലക്കുറവിൽ ലഭ്യമാക്കുന്നതിനൊപ്പം പ്രത്യേക സമ്മാനങ്ങളും പ്രമോഷനുകളും ഉണ്ടായിരിക്കും.
പരമ്പരാഗത വസ്ത്രങ്ങൾ, ഗൃഹോപകരണങ്ങൾ, കരകൗശല വസ്തുക്കൾ, സുഗന്ധദ്രവ്യങ്ങൾ, പാനീയങ്ങൾ, ജനപ്രിയ റമദാൻ വിഭവങ്ങൾ എന്നിവ ഉൾപ്പെടെ നിരവധി ഉൽപ്പന്നങ്ങളാണ് പ്രദർശനത്തിൽ ഒരുക്കുക. പ്രമുഖ ബ്രാൻഡുകൾ വമ്പൻ ഓഫറുകളുമായി മേളയിൽ പങ്കെടുക്കും.
എമിറേറ്റിലെ താമസക്കാർക്കും സന്ദർശകർക്കും സന്തോഷകരമായ അന്തരീക്ഷത്തിൽ ഷോപ്പിംഗും വിനോദവും ഒരുമിച്ചുള്ള അനുഭവം നൽകുകയാണ് ലക്ഷ്യമെന്ന് അധികൃതർ അറിയിച്ചു. 13 ദിവസത്തെ പ്രദർശനത്തിൽ വിവിധ വിനോദ പരിപാടികൾ, പ്രത്യേക ഓഫറുകൾ, പുതുമയാർന്ന പരിപാടികൾ എന്നിവയും ഉണ്ടാകും.
പ്രദർശനം എല്ലാ ദിവസവും വൈകുന്നേരം 5 മുതൽ പുലർച്ചെ 1 വരെ തുറന്നിരിക്കും. ഈദ് അൽ ഫിത്തർ സമയത്ത് വൈകുന്നേരം 3 മുതൽ രാത്രി 12 വരെ പ്രദർശനം പ്രവർത്തിക്കും.
English Summary : The 43rd edition of Sharjah Ramadan Nights will begin on March 10 at Expo Centre Sharjah, organized by Expo Centre Sharjah with the support of the Sharjah Chamber of Commerce and Industry.
The 13-day event will feature over 10,000 products with discounts of up to 75%, along with special promotions and prizes. Visitors can explore traditional clothing, handicrafts, perfumes, household items, beverages, and popular Ramadan foods.
A Heritage Village showcasing Arab culture, along with entertainment programs and family activities, will also be a major attraction. The exhibition will run daily from 5 PM to 1 AM, and from 3 PM to midnight during Eid Al-Fitr.
