നവംബർ എട്ടിന് റാസൽഖൈമ ഇന്ത്യൻ അസോസിയേഷൻ ഹാളിൽ നടന്ന വാർഷിക സമ്മേളനത്തിലാണ് പുതിയ ഭാരവാഹികളെ തിരഞ്ഞെടുത്തത്.
റാസൽഖൈമ, യുഎഇ — യുവകലാസാഹിതി റാസൽഖൈമ യൂണിറ്റിന്റെ പുതിയ ഭാരവാഹികളെ തിരഞ്ഞെടുത്തു. സന്ധ്യ വെള്ളാപ്പിള്ളിൽ (പ്രസിഡന്റ്), അജിത് നാരായണൻ (സെക്രട്ടറി), മഹേഷ് വാളകം (ട്രഷറർ) എന്നിവരാണ് പ്രധാന ഭാരവാഹികൾ. ഷിബു പി. പിള്ള, സനൂജ് പുളിക്കൽ എന്നിവരെ വൈസ് പ്രസിഡന്റുമാരായും ബിന്ദു മനോജ്, അസീസ് അന്താറത്തറ എന്നിവരെ ജോയിന്റ് സെക്രട്ടറിമാരായും തിരഞ്ഞെടുത്തു.
നവംബർ എട്ടിന് റാസൽഖൈമ ഇന്ത്യൻ അസോസിയേഷൻ ഹാളിൽ നടന്ന വാർഷിക സമ്മേളനം യുവകലാസാഹിതി യുഎഇ കേന്ദ്ര കമ്മിറ്റി പ്രസിഡന്റ് സുഭാഷ് ദാസ് ഉദ്ഘാടനം ചെയ്തു. യൂണിറ്റ് പ്രസിഡന്റ് പ്രദോഷ് കിന്നരേശൻ അധ്യക്ഷത വഹിച്ചു. സെക്രട്ടറി സലിം ചന്ദനത്ത് സ്വാഗതവും മഹേഷ് വാളകം നന്ദിയും പറഞ്ഞു.
യുവകലാസാഹിതി യുഎഇ കേന്ദ്ര കമ്മിറ്റി സഹരക്ഷാധികാരിയും ഷാർജ ഇന്ത്യൻ അസോസിയേഷൻ കമ്മിറ്റി അംഗവുമായ പ്രദീഷ് ചിതറ, ഷാർജ ഇന്ത്യൻ അസോസിയേഷൻ ട്രഷററും യുഎഇ കേന്ദ്ര കമ്മിറ്റി അംഗവുമായ ജിബി, വനിത കലാസാഹിതി യുഎഇ കൺവീനർ നിംഷ ഷാജി, കേന്ദ്ര കമ്മിറ്റി അംഗവും ദുബായ് യൂണിറ്റ് സെക്രട്ടറിയുമായ സർഗ്ഗ റോയ്, റാസൽഖൈമ യൂണിറ്റ് രക്ഷാധികാരി ഷിജോയ് ചന്ദ്രൻ എന്നിവർ സമ്മേളനത്തിന് ആശംസകൾ നേർന്നു.
സമ്മേളനത്തോടനുബന്ധിച്ച് വിഭവസമൃദ്ധമായ ഓണസദ്യയും ബാലകലാസാഹിതി കുട്ടികളുടെയും വനിത കലാസാഹിതി അംഗങ്ങളുടെയും വിവിധ കലാപരിപാടികളും അരങ്ങേറി.










