ദുബൈ: മറ്റ് ബാങ്കുകളുടെ എ.ടി.എമ്മുകളിൽ നിന്ന് പണം പിൻവലിക്കുമ്പോൾ ഈടാക്കിയിരുന്ന ഫീസ് ഒഴിവാക്കിയതായി ദുബൈയിലെ പ്രമുഖ വാണിജ്യ ബാങ്കായ Emirates NBD അറിയിച്ചു.
രാജ്യത്തിനകത്തെ മറ്റ് ബാങ്കുകളുടെ എ.ടി.എമ്മുകളിൽ നിന്നും ഗൾഫ് സഹകരണ കൗൺസിൽ (GCC) അംഗ രാജ്യങ്ങളിലെ ഏതെങ്കിലും ബാങ്കിന്റെ എ.ടി.എം കേന്ദ്രങ്ങളിൽ നിന്നുമുള്ള പണം പിൻവലിക്കുമ്പോൾ ഇനി ഫീസ് ഈടാക്കില്ലെന്ന് ബാങ്ക് വ്യക്തമാക്കി.
ഇതോടൊപ്പം ഡെബിറ്റ് കാർഡ് റീപ്ലേസ്മെന്റിന് ഈടാക്കിയിരുന്ന ഫീസും ഒഴിവാക്കിയതായി ബാങ്ക് അറിയിച്ചു. മേഖലയിൽ വിവിധ വെല്ലുവിളികൾ നേരിടുന്ന സാഹചര്യത്തിൽ ഉപഭോക്താക്കൾക്ക് ആശ്വാസം നൽകുന്നതിനാണ് ഈ തീരുമാനം എടുത്തതെന്ന് അധികൃതർ പറഞ്ഞു.
മാർച്ച് 31 വരെയാണ് ഈ ആനുകൂല്യം ലഭ്യമാകുക. ഉപഭോക്താക്കൾക്ക് കൂടുതൽ സൗകര്യപ്രദവും സുഗമവുമായ ബാങ്കിങ് അനുഭവം ഉറപ്പാക്കുന്നതിനുള്ള ബാങ്കിന്റെ പ്രതിബദ്ധതയാണ് ഈ നടപടിയിലൂടെ പ്രകടമാകുന്നതെന്ന് Emirates NBD വ്യക്തമാക്കി.
ഇതോടെ ഉപഭോക്താക്കൾക്ക് ആവശ്യമായ സമയത്ത് പണം പിൻവലിക്കാനും പുതിയ കാർഡിന് അപേക്ഷിക്കാനും തടസ്സമില്ലാതെ ബാങ്കിങ് സേവനങ്ങൾ ഉപയോഗിക്കാനും കഴിയും. സംശയങ്ങൾക്കും സഹായത്തിനുമായി ബാങ്കിന്റെ ഔദ്യോഗിക കോൺടാക്റ്റ് ചാനലുകൾ ലഭ്യമാണെന്നും അധികൃതർ കൂട്ടിച്ചേർത്തു.
അതേസമയം, യു.എ.ഇയിലെ സാമ്പത്തികവും ബാങ്കിങ് മേഖലയുമുള്ള ഉയർന്ന നിലവാരവും സ്ഥിരതയും പ്രകടിപ്പിക്കുന്നതായി യു.എ.ഇ സെൻട്രൽ ബാങ്ക് ഗവർണർ ഖാലിദ് മുഹമ്മദ് ബലാമ വ്യക്തമാക്കി.
