പൊതുപ്രവർത്തന-പാർലമെന്ററി രംഗങ്ങളിലെ സമഗ്ര സംഭാവനകൾ പരിഗണിച്ചാണ് ബഹുമതി; നവംബർ 14-ന് ദുബായിൽ പുരസ്‌കാരം സമ്മാനിക്കും
ദുബായ് : മുൻ മുഖ്യമന്ത്രിയും പ്രമുഖ മുസ്‌ലിം ലീഗ് നേതാവുമായിരുന്ന സി.എച്ച്. മുഹമ്മദ് കോയയുടെ സ്മരണാർഥം ദുബായ് കെ.എം.സി.സി കോഴിക്കോട് ജില്ലാ കമ്മിറ്റി ഏർപ്പെടുത്തിയ ഈ വർഷത്തെ സി.എച്ച്. രാഷ്ട്രസേവാ പുരസ്‌കാരത്തിന് മുതിർന്ന കോൺഗ്രസ് നേതാവും മുൻ ആഭ്യന്തര മന്ത്രിയുമായ രമേശ് ചെന്നിത്തല അർഹനായി.
പി.എ. സൽമാൻ ഇബ്രാഹിം ചെയർമാനും പൊയിൽ അബ്ദുല്ല, എം.സി. വടകര, ടി.ടി. ഇസ്‌മായിൽ, സി.കെ. സുബൈർ എന്നിവർ അംഗങ്ങളുമായ ജൂറിയാണ് പുരസ്‌കാര ജേതാവിനെ തെരഞ്ഞെടുത്തത്. പൊതുരംഗത്തും നിയമസഭാ-പാർലമെന്ററി രംഗങ്ങളിലും രമേശ് ചെന്നിത്തല കാഴ്ചവെച്ച ദീർഘകാലത്തെ സംഭാവനകൾ കണക്കിലെടുത്താണ് അംഗീകാരമെന്ന് ജൂറി ദുബായിൽ നടത്തിയ വാർത്താസമ്മേളനത്തിൽ അറിയിച്ചു.
ഒരു ലക്ഷം രൂപയും പ്രശസ്തിപത്രവും അടങ്ങുന്നതാണ് പുരസ്‌കാരം. നവംബർ 14-ന് വൈകിട്ട് ആറിന് ദുബായ് ഖിസൈസിലെ ഹാംപ്ടൺ ഹൈറ്റ്സ് ഇന്റർനാഷണൽ സ്‌കൂളിൽ (പി.എ. ഇബ്രാഹിം ഹാജി നഗർ) നടക്കുന്ന സി.എച്ച്. ഇന്റർനാഷണൽ സമ്മിറ്റിൽ വെച്ച് പുരസ്‌കാരം സമ്മാനിക്കും.
ഭരണാധികാരി, എഴുത്തുകാരൻ, വിദ്യാഭ്യാസ പരിഷ്കർത്താവ്, പത്രപ്രവർത്തകൻ എന്നീ നിലകളിൽ ജനപക്ഷത്ത് നിലയുറപ്പിക്കുകയും മതസൗഹാർദം കാത്തുസൂക്ഷിക്കാൻ നേതൃത്വം നൽകുകയും ചെയ്ത വ്യക്തിത്വമായിരുന്നു സി.എച്ച്. മുഹമ്മദ് കോയയെന്ന് ഭാരവാഹികൾ അനുസ്മരിച്ചു. ഇന്നത്തെ സാമൂഹിക-രാഷ്ട്രീയ സാഹചര്യത്തിൽ സി.എച്ചിന്റെ സന്ദേശത്തിന് വലിയ പ്രസക്തിയുണ്ടെന്നും സമ്മേളനം ഇത് പൊതുസമൂഹത്തിലേക്ക് ഉയർത്തിക്കാട്ടുമെന്നും അവർ പറഞ്ഞു.
എൻ.കെ. പ്രേമചന്ദ്രൻ എം.പി, സി.പി. ജോൺ, ഡോ. ശശി തരൂർ എം.പി, ഇ.ടി. മുഹമ്മദ് ബഷീർ എം.പി, കെ.സി. വേണുഗോപാൽ എം.പി, പ്രൊഫ. കെ.എം. ഖാദർ മൊയ്തീൻ എന്നിവരാണ് മുൻവർഷങ്ങളിൽ ഈ ബഹുമതിക്ക് അർഹരായത്.
നവംബറിൽ നടക്കുന്ന പുരസ്‌കാര സമർപ്പണ ചടങ്ങിൽ മുസ്‌ലിം ലീഗ് സംസ്ഥാന പ്രസിഡന്റ് സയ്യിദ് സാദിഖ് അലി ശിഹാബ് തങ്ങൾ, അഖിലേന്ത്യാ ജനറൽ സെക്രട്ടറി പി.കെ. കുഞ്ഞാലിക്കുട്ടി, പി.കെ. നവാസ് എം.എൽ.എ, അറബ് പ്രമുഖർ, പ്രവാസി വ്യവസായ-സാംസ്കാരിക നേതാക്കൾ തുടങ്ങിയവർ പങ്കെടുക്കും.
ദുബായിൽ നടന്ന വാർത്താസമ്മേളനത്തിൽ ജൂറി ചെയർമാൻ പി.എ. സൽമാൻ ഇബ്രാഹിമിനൊപ്പം ദുബായ് കെ.എം.സി.സി കോഴിക്കോട് ജില്ലാ കമ്മിറ്റി പ്രസിഡന്റ് കെ.പി. മുഹമ്മദ്, ജനറൽ സെക്രട്ടറി സയ്യിദ് ജലീൽ മഷ്‌ഹൂർ, മറ്റ് ഭാരവാഹികൾ തുടങ്ങിയവർ പങ്കെടുത്തു.
