ദുബൈ: മേഖലയിലെ നിലവിലെ സാഹചര്യങ്ങൾ പരിഗണിച്ച് സുരക്ഷാ മുൻകരുതൽ നടപടികളുടെ ഭാഗമായി ദുബൈയിലെ പ്രമുഖ വിനോദസഞ്ചാര കേന്ദ്രമായ ഗ്ലോബൽ വില്ലേജിന്റെ തുറക്കൽ താൽക്കാലികമായി നീട്ടിയതായി മാനേജ്മെന്റ് അറിയിച്ചു. ഇതിനൊപ്പം ഈദ് ആഘോഷങ്ങളുടെ ഭാഗമായി സംഘടിപ്പിക്കാനിരുന്ന വെടിക്കെട്ടും ഡ്രോൺ ഷോയും റദ്ദാക്കിയതായും അധികൃതർ വ്യക്തമാക്കി.
സർക്കാർ നിർദേശങ്ങൾ പാലിച്ചുകൊണ്ട് അടുത്ത അറിയിപ്പ് ലഭിക്കുന്നതുവരെ ഗ്ലോബൽ വില്ലേജ് തുറക്കില്ല എന്നും അറിയിച്ചു. വീണ്ടും തുറക്കുന്ന തീയതി ഉൾപ്പെടെയുള്ള പുതിയ വിവരങ്ങൾ അറിയാൻ ഗ്ലോബൽ വില്ലേജിന്റെ ഔദ്യോഗിക വെബ്സൈറ്റ്, സോഷ്യൽ മീഡിയ പേജുകൾ എന്നിവ പരിശോധിക്കണമെന്ന് സന്ദർശകരോട് നിർദേശിച്ചു.
ദുബൈയിലെ ചില പ്രധാന വിനോദകേന്ദ്രങ്ങളും സുരക്ഷാ മുൻകരുതലുകളുടെ ഭാഗമായി താൽക്കാലികമായി അടച്ചിട്ടുണ്ട്. ദുബൈ പാർക്സ് ആൻഡ് റിസോർട്സ് നിലവിൽ പ്രവർത്തനം നിർത്തിയിരിക്കുകയാണ്. ഇതിനകം ടിക്കറ്റ് ബുക്ക് ചെയ്തിട്ടുള്ള സന്ദർശകർ യാത്രയ്ക്ക് മുമ്പ് ഔദ്യോഗിക വെബ്സൈറ്റിൽ നിന്ന് പുതിയ വിവരങ്ങൾ പരിശോധിക്കണമെന്ന് അധികൃതർ അറിയിച്ചു.
അതുപോലെ തന്നെ ഐൻ ദുബൈയും താൽക്കാലികമായി അടച്ചിട്ടിട്ടുണ്ട്. പ്രദേശത്തെ നിലവിലെ സാഹചര്യം കണക്കിലെടുത്ത് പൊതുജനങ്ങളുടെ സുരക്ഷ ഉറപ്പാക്കുന്നതിനായാണ് ഈ നടപടികൾ സ്വീകരിച്ചതെന്ന് അധികൃതർ വ്യക്തമാക്കി.
