ഷാർജ ∙:ഷാർജ ഗവൺമെന്റ് കമ്യൂണിക്കേഷൻ അവാർഡിന്റെ (എസ്ജിസിഎ) 12-ാമത് പതിപ്പിനായുള്ള അപേക്ഷകൾ ക്ഷണിച്ചു. ഈ വർഷം 23 വിഭാഗങ്ങളിലായാണ് അപേക്ഷകൾ സ്വീകരിക്കുന്നത്. ഇതിൽ മികച്ച ഇന്റഗ്രേറ്റഡ് കമ്മ്യൂണിക്കേഷൻ സിസ്റ്റം, ഗവൺമെന്റ് കമ്യൂണിക്കേഷനിലെ മികച്ച ഇന്നൊവേഷൻ, ബെസ്റ്റ് ക്രൈസിസ് കമ്യൂണിക്കേഷൻ സ്ട്രാറ്റജി, ബെസ്റ്റ് ഇൻവെസ്റ്റ്മെന്റ് ഇൻ സോഫ്റ്റ് പവർ ടു സപോർട്ട് കമ്യൂണിക്കേഷൻ പ്രോഗ്രാമുകൾ എന്നിങ്ങനെ നാല് രാജ്യാന്തര വിഭാഗങ്ങളും ഉൾപ്പെടുന്നു. ജൂലൈ 24 വരെ ഔദ്യോഗിക വെബ്സൈറ്റായ https://gca.sgmb.ae/en വഴി അപേക്ഷകൾ സമർപ്പിക്കാം.മികച്ച ഇന്റഗ്രേറ്റഡ് കമ്യൂണിക്കേഷൻ സിസ്റ്റം വിഭാഗം, പൊതുജന വിശ്വാസം വർധിപ്പിക്കുന്നതിനായി തന്ത്രപരമായ ആസൂത്രണവും ഉള്ളടക്ക വികസനവും സംയോജിപ്പിച്ച് നൂതന സംവിധാനങ്ങൾ നടപ്പിലാക്കിയ സ്ഥാപനങ്ങളെ ആദരിക്കും. സാങ്കേതികവിദ്യയിലൂടെയും ക്രിയാത്മകമായ പരിഹാരങ്ങളിലൂടെയും ആശയവിനിമയം മെച്ചപ്പെടുത്തിയ സംരംഭങ്ങൾക്ക് ഗവൺമെന്റ് കമ്യൂണിക്കേഷനിലെ മികച്ച ഇന്നൊവേഷൻ വിഭാഗം അംഗീകാരം നൽകും.പ്രതിസന്ധി ഘട്ടങ്ങളിൽ ഫലപ്രദവും സുതാര്യവുമായ തന്ത്രങ്ങൾ നടപ്പിലാക്കിയവർക്ക് മികച്ച ക്രൈസിസ് കമ്യൂണിക്കേഷൻ സ്ട്രാറ്റജി വിഭാഗം പുരസ്കാരം ലഭിക്കും. കല, സംസ്കാരം, കായികം, വിദ്യാഭ്യാസം, മാധ്യമങ്ങൾ എന്നിവയുടെ സ്വാധീനം ആശയവിനിമയ ലക്ഷ്യങ്ങൾക്കായി ഉപയോഗിച്ചവരെ സോഫ്റ്റ് പവറിലെ മികച്ച നിക്ഷേപം വിഭാഗം തിരഞ്ഞെടുക്കും. കഴിഞ്ഞ വർഷം 44 രാജ്യങ്ങളിൽ നിന്നായി 3,800-ൽ അധികം എൻട്രികളാണ് എസ്ജിസിഎക്ക് ലഭിച്ചത്.
