അബുദാബി: ∙ യുഎഇ ഉപപ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് അബ്ദുല്ല ബിൻ സായിദ് അൽ നഹ്യാനും കനേഡിയൻ വിദേശകാര്യ മന്ത്രി അനിത ആനന്ദും ഒട്ടാവയിൽ കൂടിക്കാഴ്ച നടത്തി. ഇരു രാജ്യങ്ങളും തമ്മിലുള്ള ഉഭയകക്ഷി ബന്ധങ്ങൾ ശക്തിപ്പെടുത്തുന്നതിനെക്കുറിച്ചും ഭാവിയിലെ സഹകരണ സാധ്യതകളെക്കുറിച്ചും നേതാക്കൾ വിശദമായി ചർച്ച ചെയ്തു.സാമ്പത്തികം, വിദ്യാഭ്യാസം, നിക്ഷേപം, വ്യാപാരം, സാങ്കേതികവിദ്യ, ഊർജം തുടങ്ങിയ പ്രധാന മേഖലകളിൽ സഹകരണം വർധിപ്പിക്കുന്നതിനുള്ള പുതിയ അവസരങ്ങൾ യോഗത്തിൽ വിലയിരുത്തി. വളർച്ചയിലും വികസനത്തിലുമുള്ള യുഎഇയുടെ പ്രതിബദ്ധത ഊന്നിപ്പറഞ്ഞ ഷെയ്ഖ് അബ്ദുല്ല ഇരു രാജ്യങ്ങളും തമ്മിലുള്ള ബന്ധം കൂടുതൽ മുന്നോട്ട് കൊണ്ടുപോകാനുള്ള യുഎഇയുടെ താൽപര്യം ആവർത്തിച്ചു.രാജ്യാന്തര സമാധാനത്തിലും സുരക്ഷയിലുമുള്ള അവയുടെ സ്വാധീനം കണക്കിലെടുത്ത് സമീപകാല പ്രാദേശികവും രാജ്യാന്തരവുമായ സംഭവവികാസങ്ങളും ചർച്ചാവിഷയമായി. രാജ്യാന്തര സഹകരണ സഹമന്ത്രി റീം ബിൻത് ഇബ്രാഹിം അൽ ഹാഷിമി, വ്യവസായ, നൂതന സാങ്കേതിക മന്ത്രി ഡോ. സുൽത്താൻ ബിൻ അഹമ്മദ് അൽ ജാബർ, വിദേശ വ്യാപാര സഹമന്ത്രി ഡോ. താനി ബിൻ അഹമ്മദ് അൽ സെയൂദി, വിദേശകാര്യ മന്ത്രിയുടെ പ്രതിനിധി സുൽത്താൻ അൽ മൻസൂരി, സാമ്പത്തിക, വ്യാപാര കാര്യ സഹമന്ത്രി സയീദ് മുബാറക് അൽ ഹാജെരി, കാനഡയിലെ യുഎഇ സ്ഥാനപതി അബ്ദുൽറഹ്മാൻ അലി അൽ നെയാദി എന്നിവരും പങ്കെടുത്തു.
