ദുബായ്: പ്രവാസജീവിതം കൂടുതൽ ഫലപ്രദമാക്കുന്നതിനും സാമ്പത്തികമായി ശാക്തീകരിക്കുന്നതിനും ലക്ഷ്യമിട്ട് ദുബായ് കെഎംസിസി തിരൂരങ്ങാടി മണ്ഡലം കമ്മിറ്റി സംഘടിപ്പിച്ച ഇൻസ്പയർ 2025 പരിപാടി ശ്രദ്ധേയമായി. “പ്രവാസി സമ്പാദ്യവും സന്തോഷവും” എന്ന വിഷയത്തെ ആസ്പദമാക്കി സംഘടിപ്പിച്ച ഈ ചടങ്ങ്, വിവിധ സമ്പാദ്യശീലങ്ങളെക്കുറിച്ച് പ്രവാസികൾക്ക് ആഴത്തിലുള്ള ഉൾക്കാഴ്ച നൽകുന്ന വേദിയായി മാറി. ദുബായ് കെഎംസിസിയുടെ പ്രധാന ഹാളിൽ നടന്ന പരിപാടിയിൽ നിരവധി പ്രവാസികൾ പങ്കെടുത്തു.
സാധാരണക്കാരായ പ്രവാസികൾക്ക് അവരുടെ സാമ്പത്തിക ഭാവിയെക്കുറിച്ച് ചിന്തിക്കാൻ പ്രേരിപ്പിക്കുന്ന ഒന്നായി ഈ വേദി മാറി.സാമ്പത്തിക വിദഗ്ധനും ടാക്സ് & ഇൻവെസ്റ്റ്മെന്റ് എക്സ്പെർട്ടുമായ സി.എ. റിൻഷാദ് നയിച്ച അവബോധ ക്ലാസ്സ് ഏറെ പ്രയോജനകരമായി. നാട്ടിലും വിദേശത്തും സാമ്പത്തിക നിക്ഷേപം നടത്തുന്നതിനെക്കുറിച്ചും, ഭാവിക്കുവേണ്ടി എങ്ങനെ സാമ്പത്തിക സുരക്ഷിതത്വം ഉറപ്പാക്കാമെന്നും പരിപാടിയിൽ വിശദമായ അവബോധം നൽകി. ചെലവുകൾ നിയന്ത്രിക്കേണ്ടതിന്റെ പ്രാധാന്യം, വിവിധതരം നിക്ഷേപ മാർഗ്ഗങ്ങൾ, പെൻഷൻ പദ്ധതികൾ, ഇൻഷുറൻസ് എന്നിവയെക്കുറിച്ചെല്ലാം അദ്ദേഹം വിവരങ്ങൾ പങ്കുവെച്ചു.ദുബായ് കെഎംസിസി തിരൂരങ്ങാടി മണ്ഡലം കമ്മിറ്റി പ്രസിഡന്റ് വി.സി. സൈതലവി അധ്യക്ഷത വഹിച്ചു. ദുബായ് കെഎംസിസി സീനിയർ വൈസ് പ്രസിഡന്റ് ചെമ്മുക്കൻ യാഹുമോൻ ഹാജി പരിപാടി ഉദ്ഘാടനം ചെയ്തു. ആക്ടിങ് സെക്രട്ടറി അബ്ദുൽ ഖാദർ അരിപ്പാമ്പ്ര, ടാക്സ് കൺസൾട്ടന്റ് ദുൽഖിഫിൽ തുടങ്ങിയവർ ആശംസകൾ നേർന്നു. അബ്ദുൽ ഹക്കീം ഹുദവി കരിങ്കപ്പാറ ഖിറാഅത്ത് നിർവഹിച്ചു.തിരൂരങ്ങാടി മണ്ഡലം കമ്മിറ്റി ജനറൽ സെക്രട്ടറി ജബ്ബാർ ക്ലാരി സ്വാഗതവും, ട്രഷറർ സാദിഖ് തിരൂരങ്ങാടി നന്ദിയും പറഞ്ഞു. പ്രവാസികൾക്ക് സാമ്പത്തിക സാക്ഷരത നൽകുന്നതിനും മെച്ചപ്പെട്ട സാമ്പത്തിക തീരുമാനങ്ങൾ എടുക്കുന്നതിനും ഇത്തരം പരിപാടികൾ ഏറെ സഹായകമാണെന്നും ഇത് മനസ്സിലാക്കിയാണ് ചടങ്ങ് സംഘടിപ്പിച്ചതെന്നും ദുബായ് കെഎംസിസി തിരൂരങ്ങാടി മണ്ഡലം കമ്മിറ്റി അറിയിച്ചു.
