ദുബായ്: ദുബായ് എമിറേറ്റിലെ വീസ അപേക്ഷാ-സേവന കേന്ദ്രമായ ആമർ സെന്ററുകളിലെ കാര്യക്ഷമത ഉയർത്തുന്നതിനുള്ള പരിശീലന പദ്ധതിയ്ക്ക് ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്‌സ് അഫയേഴ്‌സ് (GDRFA) ദുബായ് തുടക്കമിട്ടു. ഇതിന്റെ ഭാഗമായി ആദ്യത്തെ സമഗ്ര പരിശീലന ടൂൾകിറ്റ് പുറത്തിറക്കി.കേന്ദ്രങ്ങളിലെ സേവന നിലവാരം മെച്ചപ്പെടുത്തുന്നതിനും ജീവനക്കാർക്ക് കൃത്യമായ അറിവ് നൽകുന്നതിനും ലക്ഷ്യമിട്ടുള്ള ഒരു സുപ്രധാന ചുവടുവെപ്പിന്റെ ഭാഗമായാണ് ഈ പരിശീലനം.സ്ഥാപനപരമായ മികവും മികച്ച ഉപഭോക്തൃ സേവനവും ഉറപ്പാക്കുന്ന ഒരു തൊഴിൽ സംസ്കാരം വളർത്തുക എന്ന ജി.ഡി.ആർ.എഫ്.എ ദുബായുടെ ലക്ഷ്യത്തിന്റെ ഭാഗമായാണ് പദ്ധതി നടപ്പിലാക്കുന്നത്.
കഴിഞ്ഞ രണ്ട് മാസത്തിനുള്ളിൽ, പുതിയതായി നിയമിച്ച 80% ആമർ സെന്റർ ജീവനക്കാർക്ക് ഈ പരിശീലനം നൽകി കഴിഞ്ഞു. നടപടിക്രമങ്ങൾ, പെരുമാറ്റരീതികൾ, നിയമപരമായ കാര്യങ്ങൾ എന്നിവയെല്ലാം ഉൾക്കൊള്ളുന്നതായിരുന്നു ഈ സമഗ്ര പരിശീലനം. സ്ഥാപനപരമായ അറിവ് കൈമാറുന്നതിനും സേവന മികവ് വർദ്ധിപ്പിക്കുന്നതിനും ഈ പരിശീലന കിറ്റ് ഒരു ഏകീകൃത മാർഗ്ഗനിർദ്ദേശമായി വർത്തിക്കും.പ്രൊഫഷണൽ മര്യാദകൾ, സേവനങ്ങളെക്കുറിച്ചുള്ള വിവരങ്ങൾ, രേഖകൾ സമർപ്പിക്കേണ്ട രീതി, പുതിയ ഇൻഡെക്സിംഗ് സംവിധാനം, ഭരണപരമായ നിയമലംഘനങ്ങളും പിഴകളും എന്നിവയെല്ലാം പരിശീലനത്തിൽ ഉൾപ്പെടുത്തിയിട്ടുണ്ടെന്ന് ജനറൽ ഡയറക്ടറേറ്റ് അറിയിച്ചു.ഉപഭോക്താക്കളുമായി നേരിട്ട് ഇടപെടുന്ന ജീവനക്കാർക്ക് എളുപ്പത്തിൽ മനസ്സിലാക്കാവുന്നതും പ്രായോഗികവുമായ രീതിയിലാണ് ഈ വിവരങ്ങൾ തയ്യാറാക്കിയിരിക്കുന്നത്.”സേവന നിലവാരം ജീവനക്കാരെ ശാക്തീകരിക്കുന്നതിലൂടെയാണ് ആരംഭിക്കുന്നതെന്ന് ഞങ്ങൾ വിശ്വസിക്കുന്നു. നടപടിക്രമപരമായ അറിവ് ഏകീകരിക്കുന്നത് ഉപഭോക്താക്കൾക്ക് കൂടുതൽ സുഗമവും കാര്യക്ഷമവുമായ അനുഭവം നൽകാൻ സഹായിക്കും. ഈ പരിശീലന കിറ്റ് ഒരു പഠനോപകരണം എന്നതിലുപരി, ജി ഡി ആർ എഫ് എ -യുടെ ലക്ഷ്യങ്ങൾക്ക് അനുസൃതമായ ഒരു മൂല്യാധിഷ്ഠിതവും പ്രൊഫഷണലുമായ സംസ്കാരം വളർത്തുന്നതിനുള്ള ഒരു തന്ത്രപരമായ ചുവടുവെപ്പാണെന്ന് എൻട്രി ആൻഡ് റെസിഡൻസ് പെർമിറ്റ്‌സ് വിഭാഗം ഡയറക്ടർ ജനറൽ അസിസ്റ്റന്റ് ബ്രിഗേഡിയർ ജനറൽ ഖലഫ് അഹമ്മദ് അൽ ഗൈത്ത് പറഞ്ഞു.
ഈ പുതിയ പരിശീലന പരിപാടി, തൊഴിൽ അന്തരീക്ഷം മെച്ചപ്പെടുത്തുന്നതിലൂടെയും നൂതന ആശയങ്ങൾ പ്രോത്സാഹിപ്പിക്കുന്നതിലൂടെയും സേവന നിലവാരം ഉയർത്തുന്നതിലൂടെയും സ്ഥാപനത്തിന്റെ ഖ്യാതി വർദ്ധിപ്പിക്കാൻ ലക്ഷ്യമിട്ടുള്ള നിരവധി പദ്ധതികളുടെ ഭാഗമാണ്. ഇത് പൊതുജനങ്ങളുടെ വിശ്വാസം വർദ്ധിപ്പിക്കുകയും ദുബായിലെ താമസാനുമതി സേവനങ്ങൾക്കായുള്ള ഒരു പ്രധാന കേന്ദ്രമായി ആമർ സെന്ററുകളെ ശക്തിപ്പെടുത്തുകയും ചെയ്യും. തുടർച്ചയായ പുരോഗതിക്കും, പുതിയ കാര്യങ്ങൾ പഠിക്കുന്നതിനും, മനുഷ്യവിഭവശേഷി വികസിപ്പിക്കുന്നതിനും ജനറൽ ഡയറക്ടറേറ്റ് നൽകുന്ന പ്രാധാന്യം ഈ പദ്ധതിയിലൂടെ വ്യക്തമാകുന്നുവെന്നും ജി ഡി ആർ എഫ് എ വിശദീകരിച്ചു.
