ഷാർജ: യു.എ.ഇ സുപ്രീം കൗൺസിൽ അംഗവും ഷാർജ ഭരണാധികാരിയുമായ ശൈഖ് ഡോ. സുൽത്താൻ ബിൻ മുഹമ്മദ് അൽ ഖാസിമി 1,578 സ്കോളർഷിപ്പുകൾക്ക് അംഗീകാരം നൽകി.ഷാർജ യൂണിവേഴ്സിറ്റിയിലെയും, അമേരിക്കൻ യൂണിവേഴ്‌സിറ്റി ഓഫ് ഷാർജയിലെയും 2025-’26 അധ്യയന വർഷത്തെ പുതിയ ബിരുദ വിദ്യാർത്ഥികൾക്കാണീ സ്‌കോളർഷിപ്പുകൾ ലഭിക്കുക.ഇതനുസരിച്ച്, ഷാർജ യൂണിവേഴ്‌സിറ്റി വിദ്യാർത്ഥികൾക്ക് 1,400 സ്‌കോളർഷിപ്പുകളും, അമേരിക്കൻ യൂണിവേഴ്‌സിറ്റി ഓഫ് ഷാർജ വിദ്യാർത്ഥികൾക്ക് 178 സ്‌കോളർഷിപ്പുകളുമാണ് നൽകുക.സ്‌കോളർഷിപ്പ് അപേക്ഷാ സമയ പരിധി 2025 ഓഗസ്റ്റ് 10 വരെ നീട്ടാൻ ശൈഖ് സുൽത്താൻ നിർദേശിച്ചിട്ടുണ്ട്.ഷാർജ ബ്രോഡ്കാസ്റ്റിംഗ് അതോറിറ്റി സംപ്രേഷണം ചെയ്ത ‘ഡയരക്ട് ലൈൻ’ പരിപാടിയിൽ ഷാർജ ഇലക്ട്രിസിറ്റി, വാട്ടർ ആൻഡ് ഗ്യാസ് അതോറിറ്റി (സീവ)യിലെ സ്കോളർഷിപ് പ്രോഗ്രാം ഡയരക്ടർ അംന അൽ ഉവൈസാണ് അവതാരകൻ മുഹമ്മദ് അൽ റഈസിക്കൊപ്പം ഈ പ്രഖ്യാപനം നടത്തിയത്.
നിർദിഷ്ട മാനദണ്ഡങ്ങൾക്കനുസൃതമായി, സീവ അതിന്റെ ഔദ്യോഗിക വെബ്‌സൈറ്റ് വഴി സ്കോളർഷിപ് അപേക്ഷകൾ സ്വീകരിക്കുന്നത് തുടരുമെന്ന് അൽ ഉവൈസ് വ്യക്തമാക്കി.
