ദുബായ് : യു.എ.ഇയിലെ ആഗസ്റ്റ് മാസത്തിലെ കാലാവസ്ഥാ വിശദാംശങ്ങൾ ദേശീയ കാലാവസ്ഥാ കേന്ദ്രം (എൻ.സി.എം) പ്രവചിച്ചു. ആഗസ്റ്റിൽ ശരാശരി 35.7° സെൽഷ്യസ് താപനിലയും, 72% ഈർപ്പവും ഉണ്ടാകുമെന്നും അധികൃതർ അറിയിച്ചു. ഇടയ്ക്കിടെ പൊടിപടലങ്ങളടങ്ങിയ കാറ്റുണ്ടാകുമെന്നും പ്രവചനത്തിൽ പറയുന്നു. ശരാശരി 5.3 മില്ലി മീറ്റർ മഴ ലഭിക്കുമെന്നാണ് കണക്കു കൂട്ടൽ. രാത്രിയിൽ തെക്കു-കിഴക്കൻ കാറ്റും; പകൽ സമയത്ത് വടക്ക്-പടിഞ്ഞാറൻ കാറ്റുമടിയ്ക്കും. യു.എ.ഇയിലുടനീളം ചൂടും ഈർപ്പവും രൂക്ഷമാകുന്നതോടെ കിഴക്കൻ-തെക്കൻ പ്രദേശങ്ങളിൽ മഴ മേഘങ്ങൾ രൂപപ്പെടാനും, രാത്രി 2നും 8നുമിടയിൽ മഴ പെയ്യാനും സാധ്യതയുണ്ട്. കാറ്റിന്റെ സ്പീഡ് മണിക്കൂറിൽ 40 കിലോ മീറ്റർ വരെ ഉയരാം. മണൽ-പൊടിക്കാറ്റ് മൂലം കാഴ്ച പരിധി കുറയാനും സാധ്യതയുണ്ട്. മഴയുള്ളപ്പോൾ വാഹനമോടിക്കുന്നവർ ജാഗ്രത പാലിക്കണമെന്നും ഇലക്ട്രോണിക് ഇൻഫർമേഷൻ ബോർഡുകളിൽ പ്രദർശിപ്പിച്ചിരിക്കുന്ന വേഗ പരിധി പാലിക്കണമെന്നും അബൂദബി പൊലിസ് നിർദേശിച്ചു.ഡ്രൈവർമാർ ജാഗ്രത പാലിക്കണമെന്നും സുരക്ഷിതമായി വാഹനമോടിക്കണമെന്നും പൊലിസ് മുന്നറിയിപ്പ് നൽകി.
അതിനിടെ, തിങ്കളാഴ്ച രാത്രി വരെ, പ്രത്യേകിച്ചും പടിഞ്ഞാറൻ പ്രദേശങ്ങളിൽ, ഈർപ്പം വർധിക്കുന്നതിനാൽ, മൂടൽമഞ്ഞ് രൂപപ്പെടാൻ ഇടയുണ്ടെന്നും മുന്നറിയിപ്പിൽ പറയുന്നു. അറേബ്യൻ ഗൾഫിലും ഒമാനിലും കടൽ താരതമ്യേന ശാന്തമായിരിക്കും.
