തിരുവനന്തപുരം: എംഡിഎസ് കോഴ്സുകളിലേക്കുള്ള ദേശീയതല പ്രവേശന പരീക്ഷയായ നീറ്റ്-എംഡിഎസ് 2026 മേയ് 2ന് നടത്തുമെന്ന് നാഷണൽ ബോർഡ് ഓഫ് എക്സാമിനേഷൻസ് ഇൻ മെഡിക്കൽ സയൻസസ് അറിയിച്ചു. പരീക്ഷയ്ക്ക് ഓൺലൈൻ അപേക്ഷ സമർപ്പിക്കാനുള്ള അവസാന തീയതി മാർച്ച് 30 ആണ്.
ജനറൽ, ഒബിസി, ഇഡബ്ല്യുഎസ് വിഭാഗങ്ങൾക്ക് അപേക്ഷ ഫീസ് 3500 രൂപയും എസ്.സി/എസ്.ടി, ഭിന്നശേഷി വിഭാഗങ്ങൾക്ക് 2500 രൂപയുമാണ്.
ബി.ഡി.എസ് ബിരുദമുള്ളവരും സംസ്ഥാന ഡെന്റൽ കൗൺസിലിൽ രജിസ്റ്റർ ചെയ്തവരുമാണ് അപേക്ഷിക്കാൻ അർഹർ. നിർബന്ധമായ 12 മാസത്തെ റോട്ടേറ്ററി ഇന്റേൺഷിപ്പ് 2026 മേയ് 31നകം പൂർത്തിയാക്കിയിരിക്കണം.
മേയ് 2ന് ഉച്ചയ്ക്ക് 2 മുതൽ 5 വരെ കമ്പ്യൂട്ടർ അധിഷ്ഠിത പരീക്ഷയായാണ് നീറ്റ്-എംഡിഎസ് നടക്കുക. ബി.ഡി.എസ് നിലവാരത്തിലുള്ള 240 മൾട്ടിപ്പിൾ ചോയ്സ് ചോദ്യങ്ങളാണ് പരീക്ഷയിൽ ഉണ്ടാകുക. ശരിയുത്തരത്തിന് നാല് മാർക്കും തെറ്റായ ഉത്തരത്തിന് ഒരു മാർക്ക് കുറവും ലഭിക്കും. അഡ്മിറ്റ് കാർഡ് ഏപ്രിൽ 29ന് ലഭ്യമാകും.
കേരളത്തിൽ എറണാകുളം, കണ്ണൂർ, കൊല്ലം, കോട്ടയം, കോഴിക്കോട്, മലപ്പുറം, തിരുവനന്തപുരം, തൃശൂർ എന്നിവിടങ്ങളിൽ പരീക്ഷാ കേന്ദ്രങ്ങൾ ഉണ്ടായിരിക്കും. ജൂൺ 2ന് ഫലം പ്രഖ്യാപിക്കും.
ജനറൽ, ഇഡബ്ല്യുഎസ് വിഭാഗങ്ങൾക്ക് 50 ശതമാനം, എസ്.സി/എസ്.ടി/ഒബിസി വിഭാഗങ്ങൾക്ക് 40 ശതമാനം, ജനറൽ ഭിന്നശേഷി വിഭാഗങ്ങൾക്ക് 45 ശതമാനം മാർക്ക് നേടണം യോഗ്യതയ്ക്കായി.
രാജ്യത്തെ വിവിധ സർവകലാശാലകളിലും സ്ഥാപനങ്ങളിലും നടത്തുന്ന എംഡിഎസ് കോഴ്സുകളിലേക്കുള്ള പ്രവേശനത്തിന് നീറ്റ്-എംഡിഎസ് യോഗ്യത നിർബന്ധമാണ്. അഖിലേന്ത്യ ക്വോട്ടയും സംസ്ഥാന ക്വോട്ടയും ഉൾപ്പെടെയുള്ള സീറ്റുകളിലേക്ക് പ്രവേശനം റാങ്ക് ലിസ്റ്റ് അടിസ്ഥാനമാക്കി നടത്തും.
